Siku ya wakimbizi Afrika

NA FARAJA EZRA

 TANZANIA imewapatia Uraia zaidi ya wakimbizi 200,000 wakiwemo wazazi na watoto huku ikiwahifafhi zaidi ya wakimbizi wapatao 330,755 hadi kufikia Octoba 31 mwaka 2018. 

Akizungumza jijini Dar es Salaam katika kilele cha maadhimisho ya siku ya takwimu Afrika Waziri wa Fedha na Mipango Dk. Philip Mpango, alisema Tanzania ni miongoni mwa nchi inatoa misaada mikubwa kwa wakimbizi nchini.

 Dk. Mpango alibainisha kuwa miongoni mwa nchi zilizohifadhiwa ni pamoja na Burundi ikiwa na watu 245,964 na DRC 84,170 na wengineo kutoka nchi 15 kutoka nchi tofauti tofauti duniani. 

Alisema Tanzania kwa kushirikiana na Shirika la kuhudumia Wakimbizi la Umoja wa Mataifa (UNHCR) ilihakikisha kuwa zaidi ya asilimia 98 ya watoto kutoka DRC na asilimia 79 kutoka Burundi waliandikishwa kuanza Elimu hapa nchini. 

Kwa Mujibu wa takwimu za UNHCR mwaka 2018 Dk Mpango alieleza kuwa idadi ya wakimbizi imeongezeka karibu mara mbili kutoka watu Mil. 43.3 mwaka 2009 hadi kufikia watu Mil. 70.8 kwa mwaka 2018. "Ongezeko hili limechangiwa na sababu mbali mbali ikiwamo Vita, Unyanyasaji, Ukiukwaji wa haki za kibinadamu, Machafuko ya kisiasa ambayo yamesababisha kuobgezeka kwa wakimbizi nchini," alisema Dk. Mpango. 

Aidha wengi wa wakimbizi hao wanatoka katika nchi tano ambazo Ni Syria, Afghanistan, Sudani ya kusini Myanmar na Somalia huku nusu ya wakimbizi ni watoto wenye umri wa chibi ya miaka 18. Dk. Mpango aliwasisitiza Wizara ya Mambo ya ndani ya Nchi, NIDA, RITA na Ofisi ya Taifa ya Takwimu kuendelea kufanya kazi na Mashirika yanayoshughulikia wakimbizi UNHCR kwa kuweka mifumo imara ya upatikanaji wa takwimu za kiutawala zitakazo saidia serikali kutoa maamuzi ya haraka.

 Pia alisisitiza kutekeleza maagizo yaliyotolewa na Waziri Mkuu kuwataka TAMISEMI, Wizara ya Fedha na Ofisi ya Takwimu zihakikishe watakwimu wote walioko katika halmashauri zote wanaripoti kwa Mtakwimu Mkuu wa serikali. Agizo hilo litasaidia kuboresha na kuimarisha uzalishaji wa takwimu katika halmashauri zote ili kusimamia utoaji sahihi wa takwimu nchini. 

" Napenda kutoa wito kwa halmashauri zote nchini kuwa takwimu zitakazotumika ni lazima zihakikiwe na Mtakwimu wa halmashauri ambaye atapata maelekezo yakitaalam kutoka kwamtakwimu Mkuu wa serikali," alisema Dk.Mpango. 

Naye Mtakwimu Mkuu wa Serikali Ofisi ya Taifa ya Takwimu (NBS), Dk. Albina Chuwa alisema tatizo kubwa linalowakabiri watakwimu ni kuchagua namna bora ya kupelekea taarifa za takwimu kwa watumiaji kwa njia nyepesi. Alisema changamoto hiyo aipo Tanzania pekee bali kwa nchi zote duniani ambapo imebainishwa katika mkutano wa kamisheni ya umoja wa mataifa ya Takwimu ya mwaka 2013 kuwa tarehe 20 Octoba ya kila baada ya miaka mitano utakuwa ni siku ya Takwimu duniani.

 "Lengo ni kuhamasisha Matumizi mazuri ya Takwimu katika kutoa maamuzi pamoja na kufuatilia ajenda ya dunia"alisema Dkt. Chuwa Amewataka Wadau mbali mbali wa Maendeleo kuendelea kudumisha amani na Ushirikiano ili kujenga uchumi wa viwanda na kufikia malengo endelevu ya uchumi wa kati.