Dande Contact

TEMBELEA BLOG HII KWA MATUKIO YA KILA SIKU-MOBILE +255 713 623 958 / +255 784 623 958 EMAIL dande15us@gmail.com

h

h

CRDB

CRDB
.

Pages

MNAIGERIA ATIWA HATIANI KWA DAWA ZA KULEVYA

Na Janeth Jovin

MAHAKAMA Kuu ya Tanzania, Kitengo cha Makosa ya Rushwa na Uhujumu uchumi, imemtia hatiani raia wa Nigeria Christian Ugbechi baada ya kumkuta na hatia ya kusafirisha pipi 56 za dawa za kulevya aina ya heroin hydrochloride.

Uamuzi huo umefikiwa leo na Jaji Sirrilius Matupa  ambae amesema upande wa mashitaka katika kesi hiyo umeweza kuthibitisha pasipo kuacha shaka kupitia mashahidi wake 11 na vielelezo 22 waliofika mahakamani hapo kuthibitisha mashitaka hayo, kuwa mshitakiwa ametenda kosa hilo.

Amesema pamoja na mshtakiwa kujitetea kwamba alifanyiwa upekuzi mara tatu na hakukutwa na kitu chochote,  upande wa mashitaka ulipaswa kuleta ushahidi wa CCTV na kuongeza kuwa haikuwa lazima kuwapangia upande huo wa mashitaka mashahidi wa kuwaleta na kwamba walikuwepo mashahidi wengine waliothibitisha mashitaka.

Amesema Mkemia Mkuu wa serikali katika uchunguzi wake, amethibitisha dawa za kulevya alizozichunguza ndizo alizokutwa nazo mshitakiwa huyo.

Kabla ya kusomwa kwa adhabu Jaji Matupa aliuliza upande wa mashtaka kama walikuwa na lolote la kusema ambapo Wakili wa Serikali, Constantine Kakula amedai kuwa hawana kumbukumbu ya makosa ya nyuma ya mshitakiwa lakini wameiomba mahakama itoe adhabu kali ili iwe fundisho kwa watu wanaojihusisha na biashara ya dawa za kulevya.

Upande wa utetezi, Jeremiah Ntobesya aliomba mahakama kumpunguzia adhabu mteja wake kwa sababu ana mke na watoto wawili wanaomtegemea na pia mshtakiwa anasumbuliwa na matatizo ya moyo na kwamba amekaa gerezani kwa mwaka mmoja na nusu ambapo katika kipindi hicho chote alikuwa na tabia njema.

Pia alisema, pamoja na kwamba kifungu cha sheria kinaamuru mshtakiwa kuhukumiwa kifungo cha maisha gerezani lakini siyo lazima, itolewe adhabu hiyo, mahakama inaweza kuamua vinginevyo.
 
Kutokana na ubishani wa kisheria juu ya adhabu anayopaswa kusomewa mshitakiwa mahakama imesema itamsomea mshitakiwa huyo adhabu yake, Juni 21, 2019 (Ijumaa).

Mapema katika ushahidi wake, askari wa upelelezi kutoka Kituo cha  Uwanja wa ndege namba G 1782 D/C Peter alidai kuwa aliandika maelezo ya mshitakiwa huyo na katika mahojiano alimueleza kuwa amemeza pipi za dawa za kulevya.

Alidai baada ya kueleza hayo alimuweka mahabusu ili aweze kuzitoa na kwamba hadi  Januari 30,2018 saa 10:30  jioni alitoa pipi 23 alizomeza.

Pia alidai walichukua kielelezo hicho na pipi nyingine zilizokutwa kwenye begi na kuzipeleka kwa Mkemia Mkuu wa serikali ambapo kwa pamoja zilikutwa na uzito wa gramu 947.17.

"Matokeo ya uchunguzi yalionesha kuwa pipi zote zilikuwa ni dawa za kulevya ambazo ni heroin hydrochloride zilizochanganywa na paracetamol metronidazole na papavirine," alidai Peter.

Mkuu wa Kituo cha Uwanja wa ndege, Inspekta Dickson Haule alidai siku ya tukio majira ya saa 14:00 mchana akiwa ofisini alijulishwa na askari huyo wa upelelezi kuwa kuna mtuhumiwa amekamatwa na dawa za kulevya.

Haule alidai baada ya taarifa hiyo alienda Ofisi ya Polisi Interpol walipokuwa na alishuhudia mtuhumiwa akipekuliwa  ndipo aliona begi dogo la mgongoni kuna pipi 56 zikiwa zimeviringishwa ndani ya soksi mbili nyeusi.

Katika kesi hiyo, inadaiwa Januari 28, mwaka jana maeneo ya Uwanja wa Ndege wa Julius Nyerere (JNIA) wilayani Ilala mkoani Dar es Salaam, mshtakiwa alikutwa akisafirisha sha dawa za kulevya aina ya  Heroine hydrochloride zenye uzito wa gramu 947.57.

NEMC YATOA AGIZO KWA WAMILIKI WA KUMBI ZA STAREHE, BAA NA NYUMBA ZA IBADA

Na Mwandishi Wetu, Dar es Salaam
 
Baraza la Taifa la Hifadhi na Usimamizi wa Mazingira (NEMC) limeagiza wamiliki wote wa kumbi za starehe, Baa pamoja na nyumba za Ibada kuhakikisha wanadhibiti uchafuzi wa kelele katika maeneo ambayo ni makazi ya watu.
 
Akizungumza na waandishi wa habari jana ofisini kwake jijini Dar es Salaam, Mkurugenzi Mkuu wa NEMC, Dk. Samuel Gwamaka (pichani), amesema NEMC imepokea malalamiko mengi kutoka kwa wananchi sehemu mbalimbali nchini kutokana na kushimili kwa kelele na mitetemo chafuzi.
 
"Tumepokea malalamiko kutoka kwa wananchi mbalimbali juu ya kelele na mitetemo chafuzi zinazotoka katika maeneo ya Kumbi za starehe, baa pamoja na nyumba za ibada,"alisema Dkt Gwamaka.
 
Dkt Gwamaka alisema kuwa kwa mujibu wa sheria ya usimamizi wa Mazingira ya mwaka 2004 na kanuni zake zinakataza uwepo wa kelele na mitetemo chafuzi
Sheria na kanuni hizo zinakataza uwepo wa kelele na mitetemo chafuzi, hivyo ni vyema shughuli hizo zikaendeshwa katika maeneo yaliyorasimishwa au katika majengo yaliyojengwa katika muundo wa kudhibiti sauti zisitoke nje na kuwa kero kwa wananchi wa eneo husika, alisisitiza Dkt Gwamaka.
 
Hata hivyo NEMC imebaini kuwa tatizo hilo limechangiwa na Kumbi hizo, baa pamoja na nyumba za ibada kujengwa kwenye makazi ya watu.
 
Katika utafiti wetu, tumegundua kuwa tatizo hilo kwa kiasi kikubwa limechangiwa na ujenzi holela usiofuata sheria ya mipango miji hali ambayo ni rahisi sana kukuta viwanda, nyumba za kuabudia na kumbi za starehe katika makazi ya watu, alifafanua Dkt Gwamaka.
 
Agizo hilo limeungwa mkono na baadhi ya wananchi waliozungumza kwa nyakati tofauti kuonyesha kukerwa na uchafuzi huo wa kelele katika maeneo ya makazi hususani kwa nyakati za usiku.
 
“Binafsi naunga mkono tamko hili la NEMC kwa kuwa limekuja katika wakati ambao linauhitaji kwa wananchi kwani tumekuwa tukiathirika na uchafuzi wa kelele hususani kwa mikesha ya miziki na ibada zinazofanyika katika maeneo ya wazi ambayo pia ni makazi ya watu, alisema Bwana Yasini Mbalami mkazi wa Mbagala Kuu.
 
Mohammed Twaha ambaye ni mkazi wa Kigamboni kwa upande wake licha ya kupongeza tamko hilo la NEMC, alisema kuwa limechelewa kutolewa kwani maeneo mengi yamekuwa yakiathirika na kelele hizo zinazotokana na ala za muziki kutoka kwenye kumbi za starehe.
 
"Huku mitaani hali ni mbaya, kumbi za starehe na wakati mwingine ni maeneo ya wazi imekuwa ni wazalishaji wakubwa wa uchafuzi wa kelele hali inayotufanya tushindwe kulala vizuri hasa kwa wakati wa usiku", alisema Bw. Twaha.
 
Hata hivo NEMC imefanunua kuwa tamko hilo halihusu ibada fupi kama vile Adhana misikitini, Kengele za kanisani ambazo huita waamini kwenda kufanya ibada pamoja na ibada za muda mfupi.

AIRTEL YAONGEZA VIFAA ZAIDI YA 4,000 USAJILI WA ALAMA ZA VIDOLE

Meneja uhusiano wa Airtel Tanzania bw, Jackson Mmbando akionesha baadhi ya vifaa vipya kati ya 4,000 vilivyotolewa na Airtel kwaajili ya usajili wa alama za vidole. Airtel inaendelea na usajili huo na imeongeza vifaa Zaidi ya 4,000 ili kukamilisha zoezi hilo kama ilivyoagizwa na mamlaka ya mawasiliano (TCRA) kuwa kila mteja wake awe amesajiliwa hadi kufikia desemba mwaka huu. Meneja Uhusiano wa Airtel, Jackson Mmbando na Meneja usajili wa Airtel bi Angestina Mahatane wakionesha kati ya 4,000 vifaa vipya vilivyonunuliwa na Airtel ili kutumika katika usajili mpya wa teknolojia ya  mfumo wa alama za vidole. Airtel imetangaza kuongeza vifaa hivyo ili kutimiza agizo lilitolewa na mamlaka ya mawasiliano TCRA kuwa hadi desemba 31 wateja wote wa Airtel wawe wamesajiliwa upya kwa kutumia mfumo huo wa kisasa unaohusisha alama za vidole. 


Na Mwandishi Wetu

Kampuni ya simu za mkononi ya Airtel inayomilikiwa na Bharti Airtel pamoja na serikali ya jamuhuri ya muungano Tanzania imesaambaza vifaa vipya zaidi 4,000 kwaajili ya usajili unaotumia alama za vidole nchini huku wakiendea na usajili huo katika wiki ya utumishi wa umma inayoendelea kati ya 17 hadi 21 Juni huku.

Akielezea mikakati yao ya kusajili wateja wake nchini Meneja mawasiliano wa Airtel Tanzania Jackson Mmbando alisema “ vifaa zaidi ya 4,000 vimesambazwa katika maduka ya Airtel pamoja na taasisi mbalimbali za huduma kwa jamii ili kuendelea kuhudumia wateja wanapokwenda kusajili upya laini zao kwa kutumia alama za vidole”

Mmbando alitoa wito kwa wateja kuzingatia usajili huo muhimu kama ilivyoagizwa na mamlaka ya mawasiliano nchini (TCRA) ili kuepuka kuja kufungiwa laini zao ifikapo Desemba.

“Pia Tumeshapanga kushirikiana na uongozi wa taasisi binafsi na zile za serikali zaidi ya 40 ndani mwezi huu na mwezi Agosti ili kuendelea kuwasajili wafanyakazi na watumishi katika maeneo yao ya kazi bila wao kuja katika maduka yetu” alileza Mmbando

Taasisi tunazopanga kuzitembelea saa ni pamoja na Arusha Technical College (ATC), Eastern and Southern African Management Institute (ESAMI), Institute of Accountancy Arusha (IAA), Tumaini University Makumira (TUMA), University of Arusha (UoA).

zingine ni Institute of Finance Management (IFM) (Mwanza, Catholic University of Health and Allied Sciences (CUHAS), College of Business Education (CBE) Mwanza, Institute of Rural Development Planning (IRDP),Mwanza,St. Augustine University of Tanzania (SAUT), Tanzania Institute of Accountancy (TIA), Mwanza.

Kwa mkoa wa morogoro ni Muslim University of Morogoro (MUM), Sokoine University of Agriculture (SUA), Mzumbe University (MU).

Mkoa wa Mbeya na Iringa tutatembelea Mbeya University of Science and Technology (MUST), Mzumbe University –Mbeya University College (MUMCo), Tanzania Institute of Accountancy (TIA),Mbeya, Mkwawa University College of Education (MUCE), University of Iringa(UoI).

Zoezi la usajili kwa kutumia alama za vidole lilianza rasmi Mei 1 mwaka huu baada ya Mamlaka ya Mawasiliano Tanzania (TCRA) kuzindua mfumo huo na kisha kutoa mwongozo kwa makampuni yote ya simu kufanya usajili wa laini za simu upya kwa kutumia alama za vidole hadi Desemba mwaka huu kila mteja wake awe amesajiliwa.

NEC KUANZA UBORESHAJI WA DAFTARI LA KUDUMU LA WAPIGA KURA JULAI

 Na Janeth Jovin

TUME ya Taifa ya Uchaguzi (NEC) imesema kuwa Julai mwaka huu inatarajia kuanza zoezi la uboreshaji wa daftari la kudumu la wapiga kura nchini kwa awamu ya kwanza kwa kutumia teknolojia ya kieletroniki ya Biometriki. 

Teknolojia hiyo huchukua taarifa za mtu za kibaiolojia na kuzihifadhi katika kanzidata kwa ajili ya utambuzi  na ndio iliyotumika kuandikisha wapiga kura mwaka 2015.

Hayo yamebainishwa leo jijini Dar es Salaam na Mwenyekiti wa Tume Jaji Semistocles Kaijage wakati akifungua mkutano mahususi uliyowakutanisha wahariri wa vyombo vya habari, waandishi wa habari na maofisa wa NEC kwa lengo la kujadili kwa pamoja kuhusu uboreshaji wa daftari la kudumu la wapiga kura.

Jaji Kaijage alisema uboreshaji huo wa daftari la kudumu la wapiga kura utawahusu wapiga kura wapya ambao ni watanzania waliofikisha umri wa miaka 18 na  zaidi, wapiga kura walipoteza au kadi zao kuharibika, waliohama kutoka maeneo yao ya awali na kuhamia maeneo mengine ya uchaguzi pamoja na wale wanaorekebisha taarifa zao.

Alisema zoezi hilo la uhakiki wa vituo kwa upande wa Tanzania Bara liliongeza vituo vya kuandikisha wapiga kura kutoka vituo 36,549 hadi 37,407 na kwa upande wa Tanzania Zanzibar vituo vimeongezeka kutoka 380 hadi 407.

"Maandalizi mengine yaliyofanyika ni uboreshaji wa majaribio ambao ulilenga kutoa picha halisi ya uwezo wa vipuli vipya vilivyofungwa katika BVR Kits ikiwa ni pamoja na mfumo wa uandikishaji wapiga kura ambao utatumika katika zoezi rasmi la uboreshaji wa daftari la kudumu la wapiga kura litakaloanza hivi karibuni, " alisema. 

Alisema tume iliendesha zoezi la uboreshaji wa majaribio katika kata ya Kihonda iliyopo halmashauri ya Manispaa ya Morogoro na kata ya Kibuta iliyopo halmashauri ya Wilaya ya Kisarawe ili kupata mazingira tofauti ya kijiografia pamoja na idadi ya watu. 

"Uboreshaji huu wa majaribio umefanyika kwa mafanikio ambapo wananchi wengi walijitokeza, kwa upande wa uwezo wa vipuli na mfumo wa uandikishaji kumekuwa na mafanikio makubwa hasa upande wa betri za BVR Kits ambazo zimeonyesha uwezo wa kuhifadhi umeme kwa muda mrefu na hivyo kuweza kukabiliana na changamoto ya nishati ya umeme katika baadhi ya maeneo ambayo hayana miundombinu hiyo, " alisema. 

Alisema pamoja na mafanikio hayo kulikuwepo na changamoto mbalimbali ikiwamo ya wapiga kura kutokuwa na uhakika ama kukumbuka majina yao wanapokwenda kurekebisha taarifa zao hivyo kutumia muda mrefu kituoni kutafuta majina yao.

Aidha alisema kwa mara ya kwanza tume imetoa vibali kwa baadhi ya asasi za kiraia kwa ajili ya kutoa elimu ya mpiga kura wakati wa uboreshaji wa daftari hilo la kudumu la wapiga kura. 

"Pia tume imeandaa mwongozo wa utoaji wa elimu hiyo ya mpiga kura ambao asasi hizo za kiraia zitatakiwa kuufuata wakati wote wa uelimishaji umma kuhusu uboreshaji wa daftari, " alisema. 

Hata hivyo alisema katika kipindi cha kuelekea uboreshaji huo wa daftari, vyama vya siasa vimepatiwa orodha ya vituo vya kupigia kura nchi nzima ili viweze kuweka mawakala katika vituo vya kuandikisha wapiga kura. 

Alisema tume pia itavishirikisha vyama vya siasa katika eneo la kuteua watendaji wa uboreshaji vituoni ambao ni waandishi wa vituo, wasaidizi wa BVR Kits operators ambapo vyama vitapewa orodha ya majina ya watendaji hao ili vitoe maoni yao.

MASAUNI AONGOZA WANAJUMUIYA WA CHUO KIKUU CHA KIMATAIFA CHA KAMPALA (KIU) KUMUAGA MWANAFUNZI ANIFA

Kamanda wa Polisi Kanda Maalumu ya Dar es Salaam, Lazaro Mambosasa, akizungumza wakati wa ibada ya kumuaga  mwanafunzi wa Chuo Kikuu cha Kimataifa cha Kampala, Anifa Simpoliunus, aliyefariki baada ya kuvamiwa na vibaka maeneo karibu na chuo hicho.Ibada hiyo imefanyika nyumbani kwa marehemu Mbezi SalaSala,jijini Dar es Salaam. Mwili wa marehemu umesafirishwa kwenda mkoani Iringa kwa mazishi. Picha na Wizara ya Mambo ya Ndani ya Nchi.
Waombolezaji wakimsikiliza Naibu Waziri wa Wizara ya Mambo ya Ndani ya Nchi, Mhandisi Hamad Masauni (hayupo pichani) wakati wa ibada ya kuaga mwili wa  mwanafunzi wa Chuo Kikuu cha Kimataifa cha Kampala, Anifa Simpoliunus, aliyefariki baada ya kuvamiwa na vibaka maeneo karibu na chuo hicho.Ibada hiyo  imefanyika nyumbani kwa marehemu Mbezi SalaSala,jijini Dar es Salaam. Mwili wa marehemu umesafirishwa kwenda mkoani Iringa kwa mazishi.

IGP SIRRO AMETETA NA MAOFISA NA WAKAGUZI WA POLISI KATIKA VIWANJA VYA BWALO LA MAAFISA WA POLISI OYSTERBAY

Mkuu wa Jeshi la Polisi IGP Simon Sirro, akisalimiana na kamishna wa Operesheni na Mafunzo CP Liberatus Sabas, wakati alipowasili katika viwanja vya Bwalo la Maofisa wa Polisi Oysterbay  jijini Dar es Salaam kwa lengo la kuzungumza na Maofisa na Wakaguzi wa Jeshi hilo.
 Mkuu wa Jeshi la Polisi IGP Simon Sirro, akimsikiliza Mkuu wa Utawala wa Jeshi la Polisi DCP Lucas Mkondya (aliyesimama) wakati akitoa hotuba mbele ya maofisa na wakaguzi (hawapo Pichani) kwenye kikao cha kuwajengea uwezo wa kiutendaji na kuwakumbusha wajibu wao.
Mkuu wa Jeshi la Polisi IGP Simon Sirro (katikati) akiwa kwenye picha ya pamoja na makamishna wa jeshi hilo baada ya kumaliza mkutano uliowahusisha maofisa na wakaguzi kwa lengo la kuwajengea uwezo wa kiutendaji, kutoka kulia kwake ni Kamishna wa kamisheni ya Ushirikishwaji wa Jamii CP Mussa A. Mussa na kushoto kwake ni Kamishna wa Operesheni na Mafunzo CP Liberatus Sabas. (Picha na Jeshi la Polisi).

SEKRETARIETI YA MAADILI YA VIONGOZI WA UMMA INAENDELEA MALI ZA VIONGOZI WOTE WA UMMA

1.Mkuu wa Mkoa wa Tabora Aggrey Mwanri akifungua leo Mafunzo na maelekezo ya maadili ya siku moja kwa Viongozi wa Umma wa Sekretarieti ya Mkoa wa Tabora na Manispaa ya Tabora.
Kamishna wa  Sekretarieti ya Maadili ya Viongozi wa Umma  Jaji Mstaafu Harold Nsekela akitoa elimu  leo wakati wa mafunzo na maelekezo ya maadili ya siku moja kwa Viongozi wa Umma wa Sekretarieti ya Mkoa wa Tabora na Manispaa ya Tabora.
Baadhi ya washiriki wa Mafunzo na maelekezo ya maadili ya siku moja kwa Viongozi wa Umma wa Sekretarieti ya Mkoa wa Tabora na Manispaa ya Tabora. (Picha na Tiganya Vincent). 
 
 
Na Tiganya Vincent

Sekretarieti ya Maadili ya Viongozi wa Umma inaendelea na zoezi la kuhakiki kwa viongozi wote wa Umma wanaojaza fomu za tamko la rasilimali na madeni ili kuepusha mgongano wa maslahi miongoni mwao.

Kauli hiyo imetolewa leo na Kamishna wa Sekretarieti ya Maadili ya Viongozi wa Umma Jaji Mstaafu Harold Nsekela wakati wa Mafunzo na maelekezo ya maadili ya siku moja kwa Viongozi wa Umma wa Sekretarieti ya Mkoa wa Tabora na Manispaa ya Tabora.

Aidha Mh Nsekela amewata Viongozi hao kufanya kazi kwa Uadilifu kwa kufuata Sheria ya Maadili ya Viongozi wa Umma namba 13 ya mwaka 1995 ambayo inawataka Viongozi wa Umma kutekeleza Majukumu yao kwa Maslahi ya Taifa.

Alisema lengo ni kutaka viongozi wa umma wafanye kazi kwa kuzingatia maadili na kuweka maslahi ya Taifa mbele badala ya maslahi binafsi.

Mh Jaji Nsekela katika hotuba yake aliongeza kuwa mgongano wa maslahi kwa baadhi ya viongozi wa umma unaweza kulisababisha Taifa hasara ya kuwa na miradi inayotekelezwa chini ya viwango.

Katika hatua nyingine Kamishna huyo wa Sekretarieti ya Maadili ya Viongozi wa Umma aliwataka viongozi wote wanaohusika katika ujazaji wa fomu za tamko la rasilimali na madeni kutenga muda wa kutosha kujaza fomu zao kwa ufasaha.

Alisema mara nyingi Viongozi wanaojaza fomu za tamko la rasilimali na madeni wamekuwa wakisubiri siku za mwisho ndio wanaanza kujaza , jambo ambalo linaweza kusababisha kuachwa baadhi ya mali bila kuorodheshwa katika fomu hiyo ya Tamko.

Aliongeza kwamba Kiongozi wa Umma kujaza fomu za Tamko la Raslimali na Madeni ni takwa la Kisheria na ni lazima wala sio ombi. Na kwamba Kiongozi asipojaza fomu hizo na kuzirejesha kwa Kamishna wa Maadili kwa wakati ni kosa la kimaadili kisheria.

Alifafanua kwamba Kiongozi wa Umma anatakiwa kutoa Tamko lake la Raslimali na Madeni yake kila mwaka ifikapo mwishoni mwa Mwaka yaani tarehe 31 Desemba ya kila mwaka.

Mafunzo haya ya Maadili yamehudhuriwa na Viongozi wa Umma wa Manispaa zaidi ya Tabora zaidi ya 200 wakiwemo Wakurugenzi, Makamanda wa polisi na jeshi la wananchi, wakuu wa wilaya, Madiwani, wakuu wa Idara na Vitengo.s

PAMBANO LA CRDB NA WABUNGE KATIKA PICHA

 Mkurugenzi Mtendaji wa Benki ya CRDB Abdulmajid Nsekela na kapteni wa timu ya mpira wa miguu ya Benki ya CRDB akimtambulisha kwa Waziri Mkuu Mheshimiwa Kassim Majaliwa mchezaji wa timu Abdul Van Mohammed wakati timu hiyo ilipocheza na timu ya Bunge FC . Timu ya mpira wa miguu ya Benki ya CRDB iliifunga timu ya Bunge FC kwa mikwaju ya penati 3 kwa 1 katika Bonanza lililofanyika Uwanja wa Jamhuri jijini Dodoma.
 Mkurugenzi Mtendaji wa Benki ya CRDB Abdulmajid Nsekela akionyesha Kombe la Ushindi baada ya kukabidhiwa na Waziri Mkuu Mheshimiwa Kassim Majaliwa (wa pili kushoto). Timu ya mpira wa miguu ya Benki ya CRDB iliifunga timu ya Bunge FC kwa mikwaju ya penati 3 kwa 1 katika Bonanza lililofanyika Uwanja wa Jamhuri Dodoma.
Wafanyakazi wa Benki ya CRDB wakishangilia ushindi baada ya kuifunga timu ya Bunge FC kwa mikwaju ya penati 3 kwa 1 katika Bonanza lililofanyika Uwanja wa Jamhuri Dodoma, mwishoni mwa wiki.

Kibali chakwamisha kesi ya Zitto mahakamani

Mbunge wa Kigoma Mjini, Zitto Kabwe, akitoka katika Mahakama ya Hakimu Mkazi Kisutu baada ya kesi yake kushindwa kusikilizwa leo.

 Janeth Jovin

Mahakama ya Hakimu Mkazi Kisutu imeshindwa kuendelea kusikiliza ushahidi wa kesi ya uchochezi inayomkabili mbunge wa Kigoma Mjini, Zitto Kabwe kutokana na upande wa mashitaka kukosa kibali cha kuita mashahidi kutoka mkoani Kigoma.

Hayo yamebainishwa na Wakili wa Serikali, Nassoro Katuga mbele ya Hakimu Mkazi Mkuu, Huruma Shaidi wakati kesi hiyo ilipokuja mahakamani hapo  kwa ajili ya kuendelea kusikilizwa.

Katika kesi hiyo ambayo ilipaswa kuendelea kwa shahidi wa tano, Wakili Katuga amedai kuwa shauri hilo lilipangwa kusikilizwa na walishaanza utaratibu wa kupata mashahidi kutokea mkoani Kigoma lakini wamekosa kibali kutoka kwa Mfawidhi wa Mahakama ya Kisutu.

Wakili Katuga ameiomba mahakama ifanye ahirisho wakati wakifatilia kibali hicho ili wawapate mashahidi hao ambao ni takribani sita kutokea mkoani Kigoma.

Baada ya kueleza hayo Hakimu Shaidi ameahirisha kesi hiyo hadi Juni 16 na 17, 2019.

Katika kesi ya msingi, Zitto anakabiliwa na mashtaka matatu ya uchochezi anadaiwa kutenda makosa hayo, Oktoba 28, 2018 katika mkutano na waandishi wa habari uliofanyika katika ofisi za makao makuu ya chama cha ACT Wazalendo.

TAMUFO yampongeza Dk Ritta Kabati

 Mbunge wa Viti Maalum wa Chama cha Mapinduzi (CCM) Ritta Kabati, akipongezwa na Katibu Mkuu wa Tamufo, Stella Joel.
 Rais wa Tamufo, Dk Donald Kisanga akimpongeza Ritta Kabati baada ya kutunukiwa udaktari wa heshima na Chuo Kikuu cha Afrika.


Na Mwandishi Wetu

TAASISI ya Sanaa na Utamaduni ya Tanzania Music Foundations (TAMUFO) imempongeza mlezi wake Ritta Kabati kutunukiwa udaktari wa heshima kutoka Chuo Kikuu cha Afrika.


Kwa mujibu wa Rais wa Tamufo, Dk Donald Kisanga wanatoa shukrani za pekee kwa mlezi wao huyo ambaye mchango wake katika maendeleo ya jamii ikiwemo Tamufo ni wa kupigiwa mfano.
Kisanga alisema umahiri wa Dk Kabati umesababisha kuteuliwa kuwa Mbunge wa Viti Maalum, hivyo wanatoa wito kwa jamii ya Tanzania kuitumia ipasavyo heshima aliyoipata mwanamama huyo.

"Sisi Tamufo tunapongeza uteuzi wa Dk. Kabati kwani unaendana na anayoyafanya katika jamii hususani sisi wasanii ambao tumejipanga kukua na kuendeleza kazi zetu," alisema Dk Kisanga.
Aidha Dk Kisanga alisema kutokana na ushirikiano ulio bora kati ya Tamufo na Dk Kabati, nyanja ya sanaa hapa nchini na Afrika Mashariki kwa ujumla itapiga hatua zaidi ya ilivyo sasa.

Mahafali ya kutunukiwa tuzo hiyo ya Udaktari yalifanyika Juni 15 jijini Lusaka Zambia ambako mahafali yake yalipambwa na bendi mahiri zilizokuwa zikiimba nyimbo mbalimbali ukiwemo wimbo wa Taifa la Tanzania.

Ritta Kabati alipata tuzo hiyo kutokana na mchango wake katika jamii ambaye pia ni Mbunge wa Viti Maalum Chama cha Mapinduzi (CCM) Mkoa wa Iringa.

Wadau wa kilimo wampongeza JPM kwa kutaka TADB iwe na matawi mikoani

Mkurugenzi Mtendaji wa TADB, Japhet Justine. 


Na Mwandishi Wetu, Dar es salaam
                        
Wadau wa Kilimo wamepongeza pendekezo la Rais John Magufuli la kutaka Benki ya Maendeleo ya kilimo(TADB) kuwa na matawi mikoani ili kurahisisha upatikanaji wa mikopo na huduma nyingine za benki hiyo.

Rais alitoa pendekezo hilo alipokutana na wafanyabishara kutoka nchi nzima juma lililopita Ikulu, Jijini Dar es Salaam.

Wadau wamesifu pendekezo la rais kwa kusema benki hiyo ikiwa karibu na wateja wake na kutoa mikopo kwa wakati, jambo hilo litachochea kasi ya ukuaji wa sekta ya kilimo, ufugaji na uvuvi hapa nchini. Wamesema TADB ipo katika nafasi nzuri ya kuchagiza maendeleo na ukuaji wa sekta ya kilimo jambo ambalo linahimizwa sana na rais.

Akihojiwa juu ya maoni ya wadau wa benki yake, Mkurugenzi Mtendaji wa TADB, Bw.Japhet Justine, amesema Benki inayafanyia kazi kimkakati maelekezo ya rais na kufafanua kwamba tayari ofisi zimefunguliwa katika baadhi ya mikoa.

Ameeleza kwamba tayari ofisi zimefunguliwa katika mji wa Kigoma na majiji ya Mwanza na Dodoma.

Ofisi ya Mwanza, ameeleza, ilifunguliwa na Waziri Mkuu Kassim Majaliwa tarehe 19 Machi, mwaka huu na inahudumia  mikoa ya Mwanza, Mara, Shinyanga, Simiyu, Geita na Kagera.  

Maandalizi ya mwisho yanafanywa kufungua ofisi katika Jiji la Mbeya, ameeleza kiongozi huyo, na kufafanua kwamba ofisi hiyo itahudumia mikoa ya Mbeya, Songwe, Njombe, Iringa, na Ruvuma.

Ofisi ya Dodoma, amaeleza, imefunguliwa toka mwaka jana na ofisi ya Kigoma imekuwa ikuhudumia wakulima kwa mieze tisa iliyopita.

“Tunafarijika wadau wanapoeleza uhitaji wa huduma zetu na kutambua kazi yetu.  Agizo la rais linaimarisha  dhamira yetu ya kuwa karibu na wananchi na linatupa hamasa ya kufungua ofisi mpya za kongani ili kuhudumia wateja wetu,” ameeleza Bw Justine.

“Kama ulimsikiliza vizuri, Rais Magufuli ameonyesha kuguswa na utendaji kazi wa Benki ya Kilimo na ndiyo sababu anapenda ifungue matawi mikoani ili kusaidia  serikali ya awamu ya tano kuharakisha azima yake ya kujenga uchumi wa kati na wa viwanda ifikapo 2025. Ujenzi wa viwanda msingi wake mkuu ni kilimo, mifugo na uvuvi,” amesema Bw.Anangisye Mwakalindile,  mkulima wa Parachichi wa Wilaya ya Rungwe,  Mkoani Mbeya.

Bw Mwakalindile amekumbusha pia kwamba  wakati akiwa katika ziara Mkoani Mbeya, Rais Magufuli  aliwaasa wakulima  kuchangamkia fursa ya mikopo inayotolewa na Benki ya Kilimo ili kukuza mitaji na kuinua kilimo nchini.

Bw.Samson Maduhu,  Mkulima wa Pamba, Wilaya ya Kwimba, Mkoani Mwanza amesema TADB  ikiwa na matawi mikoani  wakulima  watanufaika na  mikopo kwa kuongeza tija katika kilimo.

“Mimi nipo kwenye nafasi nzuri ya kuelezea umuhimu na faida ya kuwepo kwa Benki hii kwani katika kipindi kifupi wakulima wengi wa pamba tumenufaika na huduma za benki  hiyo kwa kupata pembejeo mbalimbali kwa urahisi na kwa wakati,” amesema Bw. Maduhu.

Bw.Evodius Barongo, mfanyabiashara wa  kahawa wa Wilaya ya Ngara,  Mkoani Kagera amesema Wanakagera wengi wameona umuhimu wa Benki ya Kilimo kupitia vyama vya ushirika.  Benki imetoa  mikopo ya zaidi ya bilioni 32 katika kwa ajili ya kukuza zao la kahawa.

 Serikali ya Awamu ya Tano inataka Tanzania ijenge uchumi wa kati wezeshi na unaoategemea viwanda ifikapo 2025.

Katika kipindi kisichozidi mwaka mmoja TADB imerejesha matumaini kwa wadau wa kilimo nchini kwa kuwapatia mikopo  ambayo imesaidia kuinua hali ya wakulima  na kukuza sekta za kilimo, mifugo na uvuvi hapa nchini.

Awamu ya pili uhakiki wa Jumuiya za Kijamii, Taasisi za Kidini kuanza Juni 23

Na Mwandishi Wetu, MOHA

WIZARA ya Mambo ya Ndani ya Nchi kupitia Ofisi ya Msajili wa Jumuiya za Kijamii na Taasisi za Kidini, itaanza kufanya uhakiki wa jumuiya na taasisi hizo kuanzia Juni 23 hadi Julai 2, mwaka huu.

Taarifa iliyotolewa na Katibu Mkuu wa Wizara hiyo, Meja Jenerali Jacob Kingu, alisema uhakiki huo awamu ya pili utaanza Juni 23 hadi Julai 2, katika mikoa ya Dodoma, Morogoro, Singida na Manyara.

Meja Jenerali Kingu alisema uhakiki utafanyika kwenye Kituo cha Uhakiki cha iliyokuwa ofisi ya zamani ya Kamanda wa Polisi Mkoa wa Dodoma kuanzia saa mbili asubuhi hadi saa 10 jioni.

Alisema wakati wa uhakiki, jumuiya na taasisi zinapaswa kuwasilisha nyaraka mbalimbali kikiwemo cheti cha usajili na kivuli cha cheti hicho, stakabadhi ya mwisho ya malipo ya ada iliyolipwa hivi karibuni pamoja na katika ya jumuiya, taasisi husika iliyopitishwa na Msajili.

Nyaraka nyingine nib aria inayothibitisha uwepowa jumuiya, taasisi husika kutoka kwa Afisa Mtendaji wa Mtaa, kata mahali ilipo ofisi ya jumuiya ama taasisi, taarifa za Mkutano Mkuu wa Mwaka pamoja na taarifa ya fedha ya mwaka .

“Fumu ya uhakiki inapatikana kwenye tovuti ya Wizara sambamba na kwenye kituo cha uhakiki, taasisi ambazo zitashindwa kuhakikiwa kwa mujibu wa ratiba ya eneo husika zitalazimika kwenda Makao Makuu ya Wizara jijini Dodoma ili kuhakikiwa.

“Na kama zitashindwa kufanya uhakiki kwa muda uliopangwa zitaondolewa kwenye orodha ya Msajili, pia taasisi na jumuiya ambazo hazijasajiliwa zinatakiwa kufika wakati wa uhakiki ili kupewa utaratibu wa kupata usajili,” alisema Meja Jenerali Kingu.

Alifafanua kuwa, malipo ya ada yatafanyika wakati wa uhakiki kupitia mfumo wa malipo ya Serikali kwa njia ya kielektroniki (Governmment Electronic Payment Gateway System).

SERIKALI YAWAHAKIKISHIA WAWEKEZAJI MAZINGIRA RAFIKI YA UWEKEZAJI NCHINI

Waziri wa Nchi, Ofisi ya Waziri Mkuu (Uwekezaji) Mhe. Angellah Kairuki, akitoa hotuba ya ufunguzi wakati wa mkutano wake na wawekezaji kutoka Marekani waliopo nchini alipokutana nao 17 Juni, 2019 katika Ukumbi wa Mikutano wa Hyatt Jijini Dar es Salaam ili kujadili masuala ya uwekezaji nchini. 
 
NA MWANDISHI WETU
 
Waziri wa Nchi Ofisi ya Waziri Mkuu anayeshughulikia masuala ya Uwekezaji Mhe. Angellah Kairuki amewahakikishia wawekezaji kutoka Marekani uwepo wa mazingira rafiki ya uwekezaji nchini kwa kuzingatia mchango wao katika masuala ya uwekezaji.
Ametoa kauli hiyo wakati akifungua kongamano la siku moja la kujadili masuala ya kuboresha mazingira ya biashara pamoja na uwekezaji nchini lililofanyika tarehe 17 Juni, 2019 katika Ukumbi wa mikutano wa Hyatt Jijini Dar es Salaam.
Mazungumzo hayo yaliyolenga kujadili changamoto zinazowakabili na kujadili namna bora ya kukabiliana nazo na hatua mahsusi ambazo Serikali imeendelea kuzichukua ili kuboresha mazingira ya biashara na uwekezaji.
Kongamano hilo limeandaliwa na Ubalozi wa Marekani kwa kushirikiana na Chemba ya Wafanyabiashara wa Kimarekani nchini Tanzania na kuhusisha  wawakilishi wa   Kampuni 47 kati ya 238 za Kimarekani na kuhudhuriwa na Waziri wa Mambo ya Nje na Ushirikiano wa Afrika Mashariki Mhe. Profesa Palamagamba Kabudi, Maafisa Waandamizi wa Serikali ya Tanzania, Wawakilishi wa Ubalozi wa Marekani pamoja na Wanachama wa Jumuiya ya Wafanyabiashara wa Kimarekani.
Waziri Kairuki alieeleza nia ya Serikali ni kuendelea kuwa na mazingira wezeshi yanayowavutia wawekezaji nchini katika kuendelea kuchangamkia fursa zilizopo na kupokea maoni yao ili kutatua changamoto wanazokumbana nazo.
“Serikali itaendelea kuweka mkazo mkubwa wa maboresho katika maeneo mbalimbali yatakayo kuvutia wawekezaji ikiwani pamoja na  uboreshwaji wa sekta ya mawasilino, miundombiu ya barabara na usafirishaji ili kuwa na mazingira mazuri ya wawekezaji kuja kuwekeza nchini,”alisema Waziri Kairuki.
Aliongeza kuwa ifikapo mwezi Julai mwaka huu, serikali itaanza kutekeleza Mpango Kazi wa Uboreshaji wa Mazingira ya Biashara na Uwekezaji ambao tayari umefanyiwa maboresho na utekelezaji wake utaanza mapema mwaka ujao wa fedha wa 2019/ 2020.
Aidha waziri aliahidi kuendelea kusimamia maeneo muhimu ikiwemo ushiriki wa sekta binafsi katika maeneo ya uwekezaji na kueleza maboresho haya yatatekeleza hasa katika kuboresha mifumo na kuwa na maziringa mazuri yanayotabirika kwa wawekezaji.
“Kwa kutambua umuhimu wa Sekta binafsi, tutaendelea kusimamia ushiriki wao kikamilifu ili kuleta tija pasipo kubagua sekta hiyo na kuendelea kuwa na mifumo inayotabirika kwa ajili ya wawekezaji.
Naye Waziri wa Mambo ya Nje na Ushirikiano wa Afrika Mashariki Mhe. Prof. Palamagamba Kabudi alifafanua kuwa, jitihada za Serikali ni kuhakikisha kunakuwa na mahusiano mazuri ya kidiplomasia baina ya nchi hizo mbili kwa kuzingatia zote zinategemeana katika masuala hayo ya uwekezaji.
“Kimsingi tunapaswa kuwa na uelewa wa pamoja kuwa, Tanzania na Marekani zinategemeana katika masuala haya ya uwekezaji kwani mnatuhijai na sisi tunawahitaji hivyo lazima tukae meza moja na kuyajenga endapo tunaona kuna maeneo ya kuboresha yenye tija ya kuendeleza mahusiano mazuri yaliyopo ni vyema tukayafanyia kazi pamoja”, Alisistiza Profesa Kabudi.
Kwa upande wake Kaimu Balozi wa Marekani nchini Dkt. Inmi Patterson katika hotuba yake ya ufunguzi alieleza kuwa, majadiliano hayo ni mwanzo mzuri wa kuendelea kutekeleza mabadiliko ya kisera yatakayosaidia kuongeza uwazi na mazingira rafiki ya ufanyaji wa biashara nchini.
“Majadiliano ya leo ni mwanzo wa utekelezaji wa mabadiliko ya kisera yatakayoongeza uwazi na kuboresha mazingira ya kufanya biashara na tunaunga mkono jitihada hizi za Serikali ya Tanzania kwa kuzingatia mahusiano mazuri yaliyopo sasa,”Alieleza Kaimu Balozi Patterson.
Aliongezea kuwa Serikali ya Marekani itaendelea kuunga mkono ushiriki wa sekta binafsi katika jitihada za maendeleo nchini humo kupitia ubia kati ya sekta binafsi na sekta ya umma (Public private partnerships) ambao utaimarisha mazingira ya kibiashara na ubunifu ambao utanufaisha Wananchi wa Tanzania.
Aidha alieleza kuwa nchi yake imeendelea kuwa mstari wa mbele katika uwekezaji, kwa kuzingatia Takwimu za Kituo cha Uwekezaji Tanzania (TIC) Wafanyabiashara wa Kimarekani wamewekeza zaidi ya Dola za Kimarekani bilioni 4.7 nchini Tanzania na kuzalisha takriban nafasi za ajira 52,000 katika kipindi cha miaka 28 nchini kote Tanzania.

RC MTAKA NA DHANA YA KUSOMA VITABU

Waziri wa Kilimo Mhe Japhet Hasunga akiwa katika picha ya pamoja na Mkuu wa Mkoa wa Simiyu Mhe Antony Mtaka. (Picha Na Mathias Canal, Wizara ya Kilimo).


Na Mathias Canal
 
Katika swala la kujifunza katika jamii yetu bado limekuwa ni gumu sana. Ukikutana na watu kumi ukiwauliza unapenda kusoma vitabu utasikia wakisema napenda kusoma vitabu ila sina muda. 

Muda umekuwa kisingizio kwa watu wengi kutupia lawama zao zote katika muda. Watu wanasingizia muda umekuwa tatizo lakini mimi nakataa nasema muda sio tatizo. Habari njema ni kwamba Mungu ametuzawadia zawadi au rasilimali muhimu kuliko zote ambayo ni muda. Kila binadamu aliye hai ana muda wa masaa 24 kwa siku hivyo kwa wiki moja kila mtu ana jumla ya masaa 168 sasa katika masaa 168 kwa wiki nzima unakosa muda kweli wakusoma vitabu na kuongeza maarifa?

Ni hivi karibuni tu wakati wa ziara ya Kikazi katika Wilaya ya Itilima vilevile Wilaya ya Bariadi, Waziri wa Kilimo alizuru kwa ajili ya kufuatilia mwenendo wa biashara ya Pamba ili kumulika madhila wanayopata wananchi kwa kucheleweshewa fedha kutokana na sintofahamu ya wanunuzi kujitokeza kwa wingi katika ununuzi pamoja na wakulima kuwa tayari wamekusanya Pamba kupitia vyama vyao vya Ushirika. Hapa Mhe Japhet Hasunga anakutana na Mkuu wa Mkoa wa Simiyu Mhe Antony Mtaka huku akiwa na vitabu zaidi ya 100 ofisini kwake alivyokwishavisoma katika kipindi cha mwaka mmoja.

Kama mchambuzi na mdadisi wa mambo nilifanya mazungumzo ya takribani dakika 15 hivi kubaini dhana ya kusoma vitabu, Uongozi na Uwajibikaji. Rc Mtaka anasema “Comrade Mathias akili yako inahitaji maarifa kila siku ili iweze kukua, akili yako inahitaji chakula kila siku kama unavyolisha tumbo lako nalo linahitaji maarifa. Hazina ya akili yako ni maarifa na maarifa yanapatikana katika kusoma vitabu, makala chanya, na siyo kusoma magazeti ya udaku, kusikiliza habari nyepesi nyepesi zisizokuwa na upembuzi yakinifu. 

Jinsi unavyokaa bila kusoma ndivyo akili yako inakaa inazidi kulala ukisoma nayo inazidi kuamka. Jitahidi kusoma na kufikiri kila siku ndio zoezi la akili yako. Kuwa na shahada, astashahada, stashahada, uzamili na uzamivu siyo mwisho wa kusoma au kujifunza bali huo ndio mwanzo wa kujifunza. Usiridhike na maarifa uliyonayo bali kuwa na njaa kali ya maarifa elimu uliyopata darasani ni msingi tu wa kusoma. Mtu anayesoma anakuwa tofauti sana na mtu asiyesoma vitabu tafadhali nakuomba anza kujifunza kuna faida nyingi zisizoelezeka.

Kusoma vitabu sio jambo la lelemama ni jambo la kufanya maamuzi na kutenga muda maalumu kwa ajili hiyo, Lengo kubwa linalowafanya waandishi wa vitabu kuandika vitabu ni kuweka maarifa yao kwenye maandishi, Kwa hakika vitabu huongeza sana uwezo wa kufikiri. Unaposoma vitabu unafahamu mambo ambayo yatakufanya ufikiri zaidi; mara nyingine kitabu kitakuacha na maswali ambayo yatakufanya utafakari kwa kina zaidi juu ya mambo mbalimbali.

Rc Mtaka ni kijana kabisa kiumri ambaye hajavuka hata miaka 40 bila shaka. Anaeleza Maisha yana changamoto mbalimbali; hivyo utahitaji kitu cha kukuhamasisha kutoka hatua moja hadi nyingine. Kwa kusoma vitabu vya hamasa kuhusu maswala mbalimbali ya maisha utaweza kuhamasika zaidi.

Unapotumia muda wako kusoma vitabu, ni wazi kuwa hutopata muda wa kupoteza, Kusoma vitabu kutakufanya utumie muda wako kuongeza maarifa yako zaidi. Tofauti kubwa iliyopo kati ya kusoma vitabu na kuangalia televisheni ni juu ya kuongeza ubunifu wako. Kusoma vitabu hukufanya uondoke katika lindi kubwa la mawazo yanayokutesa na kukutafakarisha juu ya mambo mengine. Waandishi wa vitabu hujenga mazingira ambayo msomaji hujihisi yumo ndani yake.

Dakika mazungumzo yangu na Rc Mtaka ananikumbusha kuwa “Mathias Kadri unavyosoma vitabu vingi kutoka kwa waandishi mbalimbali, ndivyo unavyojitajirisha juu ya misamiati. Kuwa na ukwasi wa misamiati husaidia sana katika maisha ya kila siku. Huongeza kujiamini na uwezo wa kuzungumza mbele ya hadhira. Hadhira yoyote huvutiwa zaidi na mzungumzaji mwenye kujiamini na mwenye uwezo wa kucheza na misamiati ya lugha kwa umaridadi kadri ya muktadha.

Katika ziara hiyo niliondoka Mkoani Simiyu nikiwa na kumbukumbu nzuri na umuhimu wa kukutana na Rc Antony Mtaka nimeamini katika kusoma vitabu Unapata kujua mambo mapya, Ukuaji binafsi wa weledi, kuongeza uelewa, na Kukupa msukumo wa kufanya Maandalizi kabla ya jambo lolote.

Naamini sasa pamoja na mawazo chanya ya Mkuu wa Mkoa wa Simiyu Mhe antony Mtaka unakubaliana na mimi kuwa kuna vito vya thamani sana vilivyofichwa kwenye vitabu ambayo watu wengi hawavifahamu.

Ni muhimu ukajijengea utamaduni wa kusoma vitabu mara kwa mara kadri uwezavyo. Unaweza kutumia programu kama vile Balabolka ili kubadili vitabu kuwa sauti na uvisikilize badala ya kuvisoma.

+255756413465