COSTECH yawapa somo wabunifu

Mbunifu wa Mashine ya Kusafisha Fukwe, Kennedy Mwakatundu (wa pili kushoto), akielezea namna mashine hiyo inavyofakazi wakati wa mkutano na waandishi wa habari jijini Dar es Salaam jana. Kutoka kulia ni Mbunifu wa Kitanda cha Kubeba Wagonjwa wa Dharura, Diana Kaijage, Kaimu Mkurugenzi wa Idara ya Uendeshaji wa Teknolojia Tume ya Taifa ya Sayansi na Teknolojia (COSTECH), Dk. Athuman Mgumia na Mtafiti Mtaalam wa Hakimiliki Bunifu wa tume hiyo, Judith Kadege. (Picha na Suleiman Msuya).

Na Suleiman Msuya

 

TUME ya Taifa ya Sayansi na Teknolojia (COSTECH), imewataka wabunifu nchini kulinda bunifu zao ili waweze kunufaika nazo sasa na vizazo vyao.  

Hayo yamesemwa na Mshauri wa Shughuli za Ulinzi wa Miliki Bunifu, kutoka Kituo cha Kuendeleza Uhaulishaji wa Teknolojia COSTECH  Judith Kadege wakati akizungumza na waandishi wa habari jana jijini Dar es Salaam.

Kadege alisema wabunifu wanapaswa kujua namna ya kulinda bunifu zao kwa kutumia mihimili ya miliki bunifu ikiwa ni pamoja na kujua nyenzo wanazoweza kuzitumia.

Alisema COSTECH imejipanga kuwajengea uwezo wadau tofauti katika sekta ya utafiti na ubunifu nchini ili kuhakikisha wananufaika na ubunifu wao.

“Elimu ya miliki bunifu inasaidia kujua haki za wabunifu kabla ya kuanza kubuni kitu ambacho wanakifikiria, pia hapo alipobuni akitaka teknolojia hiyo au bunifu yake itumike sehemu nyingine anatakiwa afanya kitu kipi kabla.

Tunafundisha ili kulinda ile miliki bunifu yake  isije ikaibiwa, au ikatupwa au ikatumiwa ndivyo sivyo bila ya idhini yake ama kibiashara au kwa matumizi mengine naamini tutafanikiwa,” alisema.

Alisema wabunifu wengi wana mlengo wa ujasiriamali hivyo ulinzi wa miliki bunifu utasaidia kujua wapeleke wapi bunifu ambayo imepata ulinzi wa miliki bunifu ili iweze kufanyiwa kazi.

Mshauri huyo alisema  duniani kote ulinzi wa miliki bunifu unampa mmiliki wa bunifu uwezo wa kujua namna gani unaweza kuongea hata na makampuni makubwa ili yatumie teknolojia husika.

Kaimu Mkurugenzi wa Idara ya Uendeleshaji na Uhaulishaji wa Teknolojia katika tume hiyo, Athuman Mgumia alisema waliandaa mafunzo hayo kwa wabunifu 60 walioshiriki na kushinda Mashindano ya Kitaifa ya Sayansi na Teknolojia (Makisato) ili kuendeleza bunifu zao.

Alisema mafunzo hayo yatawasaidia katika kuboresha teknolojia zao na kuweza kuhakikisha kama zinawafikia walengwa wao waliowakusudia.

Kwa upande wake Mhandisi wa Mitambo Kennedy Mwakatundu, alikiri kuwa kama wabunifu kuna vitu ambavyo hawavilindi kisheria au sheria haiwalindi hivyo kupitia mafunzo hayo kutawawezesha kuwa na ujuzi wa kulinda kazi zao.

Mbunifu huyo ambaye ametengeneza mashine ya kusafisha fukwe za bahari alishauri mafunzo hayo pia yawe ni sehemu ya kuwaandaa watoto wadogo kuweza kujua ikiwa wana kipaji.

Naye Diana Kaijage aliyebuni kitanda cha kuweka kwenye gari la wagonjwa alisema mafunzo waliyoyapata yatawasaidia katika kulinda kazi zao walizozifanya.

“Wabunifu tukiwezeshwa tunaweza hivyo naomba wadau wengine kushirikiana na COSTECH kuhakikisha bunifu zetu zinatatua changamoto,” alisema.