Failuna Matanga apata upinzani mkali Tamasha la Karatu

Grace Jackson wa JKT mshindi wa Nne km 5 akipokea zawadi.

Mshindi wa Pili km 5 Cecilia Ginoka akipokea zawadi kutoka kwa mgeni rasmi Naibu Waziri wa Maliasili na Utalii, Costantine Kanyasu. 
 

Na Tullo Chambo, Karatu

WANARIADHA kutoka Jeshi la Wananchi Tanzania (JWTZ), na Klabu ya Talent ya jijini Arusha wametamba katika mbio za Kilomita 5 na 10 Tamasha la 18 la Michezo la Karatu, mkoani Arusha.

Katika tamasha hilo lililofanyika viwanja vya Mazingira Bora mjini hapa ambako Mgeni rasmi alikuwa Naibu Waziri wa Maliasili na Utalii, Costantine Kanyasu, ilishudiwa Gabriel Geay wa Talent akitamba kwa upande wa wanaume Kilomita 10 huku wanawake Kilomita 5 Magdalena Shauri wa JWTZ alifanya kweli mbele ya bingwa wa mwaka jana, Failuna Matanga wa Talent.

Failuna ambaye ni mwanariadha pekee wa kike Tanzania aliyefuzu Olimpiki Tokyo 2020, alipata upinzani mkali kutoka kwa Shauri na Cecilia Ginoka wote kutoka JWTZ na kujikuta akikamata nafasi ya tatu.

Licha ya kujitahidi kuongoza kwa muda mrefu mbio hizo za Kilomita 5, Failuna alijikuta akikubali yaishe mita chache kuelekea kwenye kumaliza.

Magdalena alishinda akitumia dakika 1:40.24 akifuatiwa na Ginoka 16:5.30 huku Failuna akitumia dakika 17:19:80.

Kwa upande wa Kilomita 10 kwa wanaume, mwanariadha wa kimataifa wa Tanzania, Gabriel Geay alishinda akitumia dakika 30:23:94, akifuatiwa na Mathayo Sombi wa Talent dakika 30:43:40 na Faraja Damas wa JWTZ aKimaliza wa tatu kwa kutumia dakika 30:45:43.

Shughuli nyingine ilikuwa kwenye mbio za baiskeli za Kilometa 60 kwa wanaume pale Bahati Masunga wa Mwanza akiwa na baiskeli yake ya kawaida kabisa alipowashinda washindani wenzake waliokuwa na baiskeli za kimashindano alipoibuka wa kwanza kwa kutumia saa 1:30:33.25.

Masunga akionesha uzoefu wa watu wa Kanda ya Ziwa kuendesha baiskeli, aliwaacha washindani wengine, akiwemo muendesha baiskeli wa kimataifa wa Tanzania, Richard Laizer kwa dakika tatu.

Laizer alimaliza wa pili kwa kutumia saa 1:33:49:92 na mara baada ya kumaliza mbio hizo, alimpongeza mshindi kwa kumpa mkono huku akimwambia hongera.

Kwa upande wa wanawake, mshindi alikuwa ni Esther Laizer huku nafasi ya pili ikienda kwa Clara James katika mchezo huo wa baiskeli kwa upande wa wanawake.

Mgeni rasmi wa ufungaji wa tamasha hilo ambaye ni Naibu Waziri wa Maliasili na Costantine Kanyaso mbali na kuwapongeza waandaaji alisema kuwa wengi hawaoni muunganiko wa michezo na utalii, lakini kuna uhusiano mkubwa wa vitu hivyo viwili.

Alisema tamasha kama hilo linatoa linasaidua kutoa nafasi za kuibua vipaji vingi na kuwa mchango mkubwa katika sekta ya michezo nchini, lakini kinachotokea mashindano kama hayo yanapoandaliwa hakuna muendelezo wa vipaji, ambapo alishauri kuwa vipaji hivyo viendelezwe.

Alisema klabu za michezo ni chache sana nchini tofauti na nchi zingine, ambazo uwa na matamasha mengi ya michezo kama hayo, ambayo yamekuwa msaada mkubwa sana katika kuendeleza michezo katika nchi zao.