SERIKALI KUJA NA MPANGO WA UFUGAJI NYUKI WA MANZUKI - NAIBU WAZIRI MASANJA

Naibu Waziri wa Maliasili na Utalii, Mary Masanja (katikati), akisikiliza maelezo ya namna mitambo ya kiwanda cha kuchakata mazao ya nyuki inavyofanya kazi alipotembelea kiwanda hicho katika Wilaya ya Bukombe Mkoani Geita leo. Kushoto ni Mkuu wa Mkoa wa Geita, Mhe. Martin Shigela pamoja na viongozi na watendaji wa Serikali wakifuatilia.

Mbunge wa Jimbo la Bukombe na Waziri wa Madini, Doto Biteko (kulia) wakifurahia jambo na Naibu Waziri wa Maliasili na Utalii, Mary Masanja (kushoto), wakati wa mkutano na wananchi wa Kata ya Uyovu Wilaya ya Bukombe Mkoani Geita kuhusu masuala ya uhifadhi na ufugaji nyuki.

Baadhi ya wananchi wa Kata ya Uyovu Wilaya ya Bukombe Mkoani Geita wakimsikiliza Naibu Waziri wa Maliasili na Utalii,Mhe. Mary Masanja (Mb) (hayupo pichani) alipokuwa akizungumza nao kuhusu masuala ya uhifadhi na ufugaji nyuki.

.

Na Mwandishi Wetu

 

Serikali imejipanga kuja na mpango wa ufugaji nyuki ujulikanao kama Manzuki ambapo nyuki watakuwa wanafugwa katika eneo maalum bila kuathiri uhifadhi.

Hayo yamesemwa leo na Naibu Waziri wa Maliasili na Utalii, Mhe. Mary Masanja (Mb) alipokuwa akizungumza na wananchi wa Kata ya Uyovu Wilaya ya Bukombe Mkoani Geita.

Amefafanua kuwa kupitia mpango huo wananchi wataweza kufuga nyuki na kupata faida bila kuhama kuhama.

Kuhusu wananchi wanaofuga nyuki katika Hifadhi ya  Kigosi, amesema kuwa Serikali imeruhusu wananchi kuendelea na shughuli za ufugaji nyuki wakati inatafuta eneo mbadala la kuwahamishia wafugaji hao.

“Tamko la Serikali ni kwamba  shughuli za ufugaji nyuki zitaendelea hadi pale tutakapotoa mbadala wa wapi mpeleke mizinga yenu.” Mhe. Masanja amesisitiza.

Aidha, amewataka wananchi kukitumia ipasavyo Kiwanda cha kuchakata asali kilichopo katika eneo hilo ili waweze kuuza asali kwa faida.

Amewataka wananchi kutunza mazingira na kuacha kukata miti hovyo ili kuendelea kufaidika na mazao yatokanayo na nyuki.

Awali, Waziri wa Madini na mbunge wa jimbo la Bukombe Mhe.Dkt.Doto Biteko amesema, Mhe.Rais Samia anataka kuona kero za wananchi wakiwemo wa Uyovu zinatatuliwa na ndiyo maana Mhe.Naibu Waziri amefika, hivyo kuwasihi wananchi kuwa wahifadhi kwa kuilinda misitu ya Bukombe isiharibiwe.

Naibu Waziri Mary Masanja anaendelea na ziara yake katika Kanda ya Ziwa kwa lengo la kusikiliza na kutatua changamoto zinazoikabili Sekta ya Maliasili na Utalii.