RUVU SHOOTING, POLISI TANZANIA HALI TETE

Na Mwandishi Wetu

Klabu za Polisi Tanzania na Ruvu Shooting za Ligi Kuu Soka Tanzania Bara (NBC PL) hali zake sio njema katika msimamo wa Ligi, ambapo jana zimetoshana  nguvu ya suluhu baada ya dakika 90 za mchezo uliopigwa Uwanja wa Ushirika Moshi Mkoani Kilimanjaro.

Polisi Tanzania walikuwa wenyeji wa Ruvu Shooting ambao katika mchezo wa mkondo wa kwanza walipoteza na leo kuvuna alama moja pekee kutoka kwa Ruvu huku Wanajeshi hao wakivuna alama nne kutoka kwa Polisi msimu huu.

Mchezo huo umezikutanisha klabu mbili zilizoko chini ya msimamo wa Ligi, nafasi ya 16 na 15 kati ya Klabu 16 zinazoshiriki Ligi Kuu Soka Tanzania Bara msimu wa 2022/2023.

Ni mchezo ambao timu zote mbili zilikosa ufanisi wa kutengeneza nafasi za kufunga mabao katika muda wote wa mchezo.


Matokeo hayo yanaifanya Polisi kusalia mkiani mwa msimamo wa Ligi na pointi zao 11 huku Ruvu Shooting wakisalia nafasi ya 15.

Ulikuwa mchezo wa 19 kwa kila timu msimu, licha ya kusaliwa na michezo 11 kila mmoja bado wanakazi nzito ya kujiokoa na janga la kushuka daraja.