SIMBA YAVULIWA UBINGWA MAPINDUZI CUP

 
Na Mwandishi Wetu

Wekundu wa msimbazi Simba SC wametupiwa virago katika mashindano ya Kombe la Mapinduzi baada ya kuchapwa bao (0-1) dhidi ya Mlandege ya Zanzibar na kuvuliwa ubingwa rasmi.

Bao pekee la ushindi lilifungwa na Abubakar Mwadin dakika ya 75 ya mchezo huo huku kiungo wao Victor Akpan akifanya kazi ya kutibua mipango ya wapinzani wao jambo ambalo halikufua dafu.

Makosa ya mabeki kwenye kuokoa pigo la kona liliwapa tabu Simba na kuipa ushindi Mlandege ambayo imekuwa na mwendo mzuri, mchezo wa kwanza walipata sare ya kufungana bao 1-1 dhidi ya KVZ Januari Mosi 2023.

Mchezo ujao kwa Simba ni dhidi ya KVZ unaotarajiwa kuchezwa Januari 5, 2023 saa 2:15 usiku ukiwa ni mchezo wa kukamilisha ratiba.

Wakati Simba wakiondoshwa Kocha Mkuu wa Simba, Robertinho Oliviera alikuwa jukwaani akishuhudia timu hiyo ikicheza na kupoteza.