TAIFA STARS YAIFUATA UGANDA MISRI

 Na John Richard Marwa

Kikosi cha Timu ya Taifa (Taifa Stars) kimeondoka leo alfajiri kuelekea Misri kwa ajili ya mchezo wake wa kufuzu Fainal za Mataifa ya Afrika AFCON dhidi ya Uganda.

Kwa mujibu wa taarifa kutoka Shirikisho la Mpira wa Miguu Tanzania (TFF) mechi itachezwa Machi 24 katika mji wa Ismailia nchini humo. Kikosi hicho kimeongozwa na Kocha wake Adel Amrouche.

"Wachezaji wanao cheza nje ya Tanzania watajiunga moja kwa moja na kikosi hicho nchini Misri"

"Kwa upande wa wachezaji walioko Yanga wao watasafiri kesho kwenda Misri baada ya mechi yao ya Kombe la Shirikisho inayochezwa leo jijini Dar es Salaam.

"Mara baada ya mechi dhidi ya Uganda, Stars itarejea Machi 25 kujiandaa na mechi nyingine itakayochezwa Machi 28 jijini Dar es Salaam pia dhidi ya Uganda " imeeleza taarifa hiyo.