Wadhibiti ubora, maofisa elimu wapigwa msasa Timiza Malengo

 

 Na Mwandishi Wetu, Dodoma 

WADHIBITI Ubora na Maofisa Elimu Kata wa Halmashauri kutoka Wilaya tatu za Mkoa wa Dodoma, leo Machi 27,2023 wameanza mafunzo ya siku tano ili ya kupata uzoefu wa utekelezaji wa shughuli za elimu na afya  katika kuunda, kusimamia, kutoa taarifa na kuratibu shughuli za Mradi wa Timiza Malengo.

Akifungua mafunzo hayo Mkurugenzi wa Halmashauri ya Chamwino,  Dkt. Semestatus Mashimba amewataka washiriki hao  kufuata miongozo ya ufundishaji, maadili ya Kitanzania pamoja na tamaduni  ili kukabiliana na  wimbi la mmomonyoko wa maadili.

“Hakikisheni mnafuatilia  vyema mafunzo haya ili mkienda kwenye ufuatiliaji mkasaidie kuondoa mmomonyoko wa maadili yetu hasa kwa vijana nchini”amesema Dkt. Mashimba .

Mafunzo hayo yanaendeshwa na  Taasisi ya Elimu (TET) na Tume ya Taifa ya Kudhibiti Ukimwi (TACAIDS) ambapo jumla ya Halmashauri 18 nchi nzima zitafikiwa katika kuhakikisha  elimu hiyo inawafikia walengwa ambao ni wanafunzi nchini.

Kwa upande wake Mkurugenzi wa Mafunzo ya Mitaala TET ,Dkt. Fika Mwakabungu amesema kuwa mafunzo hayo  yatasaidia kukuza  uelewa wa pamoja kuhusu elimu ya Stadi za Maisha zinazolenga Afya ya Uzazi, VVU/UKIMWI na Jinsia, kuwezesha  ufuatiliaji wa utekelezaji wa mitaala kwa kulenga mafunzo yaliyotolewa kwa walimu kuhusu maudhui lengwa katika ngazi ya darasa.

Pia watajenga mtazamo chanya katika kuwahamasisha walimu, wanafunzi na vijana katika jamii kuzingatia misingi ya afya ili kupunguza maambukizi ya magonjwa kwa  ustawi wa nguvu kazi ya  vijana.

Aidha, Mratibu wa Mafunzo wa TACAIDS, Bwana. Kelvin Kisoma amesema kuwa mafunzo hayo yatasaidia  washiriki kuongeza uelewa  na kuwa namna bora ya kusimamia,kuratibu na kufanya ufuatiliaji wa utekelezaji wa maudhui ya stadi za Maisha inayozingatia afya ya  uzazi, VVU na UKIMWI na ukatili wa kijinsia.

Halmashauri zinazoshiriki mafunzo hayo ni kutoka Mpwapwa,Dodoma jiji na Chamwino ambapo Halmashauri nyingine za Geita na Chato zikitarajia mafunzo hayo wiki ijayo.