TMA yapewa kipaumbele uboreshaji wa miundombinu ya hali ya hewa

Kaimu Mkurugenzi Mkuu wa Mamlaka ya Hali ya Hewa Tanzania (TMA), Dk. Ladislaus Chang’a akizungumza wakati wa warsha maalumu ya kuangalia mapungufu ya nchi katika miundo mbinu ya hali ya hewa, Ukumbi wa PSSSF, Dodoma leo Mei15,2023.

Mwakilishi Mkazi Tanzania, Mpango wa Umoja wa Mataifa Kusaidia Maendeleo Duniani (UNDP), Christiane Musisi, akizungumza wakati wa warsha maalumu ya kuangalia mapungufu ya miundo mbinu ya hali ya hewa. 

Mwakilishi kutoka Taasisi ya Hali ya Hewa Denmark (DMI), Christian Johansen akizungumza wakati wa warsha maalumu ya kuangalia mapungufu ya miundombinu ya hali ya hewa.

Picha ya pamoja na baadhi ya washiriki wa warsha maalumu ya kuangalia mapungufu ya miundombinu ya hali ya hewa nchini.

Na Mwandishi Wetu, Dodoma

MAMLAKA ya Hali ya Hewa Tanzania (TMA) kwa kushirikiana na Taasisi ya Hali ya Hewa ya Denmark, zimekutanisha wadau katika warsha maalumu ya kuangalia mapungufu ya nchi katika miundo mbinu ya hali ya hewa ili kufanya maboresho yatakayoleta tija katika utoaji huduma za hali ya hewa kwa maendeleo ya taifa.

Kaimu Mkurugenzi Mkuu Mamlaka ya Hali ya Hewa Tanzania (TMA), Dk. Ladislaus Chang’a alieleza kuwa Tanzania imepata fursa ya kuchaguliwa kuwa miongoni mwa nchi 26 duniani ambazo zimepewa kipaumbele katika kuimarisha huduma za hali ya hewa kupitia miundombinu ya uangazi wa hali ya hewa chini ya mwamvuli wa Mfuko wa Kuimarisha Uangazi wa hali ya hewa (Systematic Observations Financing facility-SOFF).

Mfuko huu unachangiwa na nchi mbalimbali duniani, likiwemo Shirika la Hali ya Hewa Duniani (WMO) na Mpango wa Umoja wa Matatifa wa Kusaidia Maendeleo Duniani (UNDP).

Dk. Chang’a alisema, "Fursa hii ni muhimu kwa Tanzania hususani kipindi hiki ambacho dunia ikiwemo nchi yetu inakabiliana na changamoto za mabadiliko ya hali ya hewa na tabia nchi.

"Changamoto hizi zinahitaji msukumo wa kipekee katika kuimarisha miundombinu ya hali ya hewa lakini vilevile, utoaji wa huduma hususan huduma za utabiri na tahadhari za hali mbaya ya hewa.

“Hii ni mojawapo ya jitihada ambazo zinaenda kuchangia katika jitihada kubwa zinazofanywa na serikali yetu za kuimarisha huduma za hali ya hewa  na kuongeza uwezo wetu wa kuhimili changamoto za mabadiliko ya hali ya hewa. Tunaishukuru sana Serikali," alisema Dk. Chang’a.

Kwa upande wake Christian Johansen, mwakilishi wa Taasisi ya Hali ya Hewa ya Denmark (DMI), alisema ushirikiano baina ya Tanzania na Denmark ni wa muda mrefu na unaendelea kukua.

"Ushirikiano wa sasa baina ya TMA, DMI na UNDP unalenga kuboresha huduma za hali ya hewa kwa kuimarisha miundombinu ya uangazi na kuendeleza  mahusiano mazuri yaliyoweka baina ya nchi hizi," alisema Jahansen.

Aidha kupitia programu ya SOFF waliweza kutembelea katika maeneo ya Singida, Dodoma, Shinyanga, Mwanza na Tabora, na kufanya tathmini ya uwezo na mahitaji katika kuimarisha uangazi.

 Kupitia warsha hii wanatarajia kupata taarifa zaidi za maeneo mengine ya nchi yanayohitaji maboresho na uimarishaji wa mfumo wa uangazi.

Mwakalishi Mkazi wa UNDP Tanzania, Christine Musisi alishukuru kwa mahusiano mazuri baina ya UNDP na TMA, ikiwemo misaada mbalimbali ambayo UNDP imekuwa ikitoa kusaidia uimarishwaji wa huduma za hali ya hewa.

Alieleza kuwa takwimu zinaonesha ongezeko la matukio ya hali mbaya ya hewa ikiwemo mafuriko hivyo programu hiyo itasaidia upatikanaji wa taarifa sahihi za hali ya hewa hivyo kuchangia katika kuongeza kasi ya maendeleo kwa sekta muhimu kama vile kilimo, mifugo, nishati, uchukuzi, afya na maji.

Aliongeza kusema kuwa uboreshaji wa miundombinu ya hali ya hewa ni kwa manufaa ya nchi na dunia.