MAGDALENA SHAURI KUREJEA NCHINI KESHO SEPT. 26, KUPOKEWA ARUSHA

NA TULLO CHAMBO, RT

MSHINDI wa Tatu katika mbio maarufu za BMW Berlin Marathon 2023, Mtanzania Magdalena Crispin Shauri, anatarajiwa kuwasili nchini September 26, akitokea nchini Ujerumani alikoshiriki mbio hizo na kuipeperusha vema bendera ya Tanzania.

Anatarajiwa kutua Uwanja wa Ndege wa Kimataifa wa Jomo Kenyatta, Nairobi Kenya saa 10 alfajiri na kisha kutumia usafiri wa gari na kuwasili jijini Arusha majira ya saa nne asubuhi.

Magdalena kutoka klabu ya JWTZ, alifanya kweli katika mbio hizo zilizofanyika jana Septemba 24 na kumaliza wa tatu akitumia saa 2:18.41 na kuvunja rekodi ya Taifa iliyokuwa ikishikiliwa na Banuelia Mrashani ya saa 2:24.51 aliyoiweka Tokyo Japan mwaka 2002.

Pia kwa matokeo hayo, Magdalena amefuzu viwango vya kushiriki Olimpiki Paris Ufaransa mwakani.