CRDB yazindua Programu ya Go Green na iMbeju kwa ajili ya kuwasaidia vijana

Mkurugenzi Mtendaji wa CRDB Bank Foundation, Tully Mwambapa (katikati), akizungumza na waandishi wa habari jijini Dar es Salaam, wakati akitangaza Programu ya Go Green na iMbeju kwa ajili ya kuwasaidia vijana kuwaongezea mitaji na uwezo wa kuendesha biashara zao. Kulia ni Mkuu wa Biashara Changa wa Benki CRDB Bank Foundation, Fadhil Bushagama na kushoto ni Mkuu wa Kitengo cha Uendeshaji wa benki hiyo, Joycelean Makule. PICHA: JUMANNE JUMA.

Na Mwandishi Wetu

Vijana nchini wametakiwa kutumia kikamilifu fursa zinazotolewa na taasisi mbalimbali ili waweze kujijengea uwezo wa kiuchumi na kukuza ubunifu wao katika biashara.

Wito huo umetolewa na Mkurugenzi Mtendaji wa CRDB Bank Foundation, Tully Esther Mwambapa, wakati wa hafla ya kutangaza matokeo ya programu ya kuhamasisha ubunifu wa vijana katika uchumi wa kijani iliyofanyika jijini Dar es Salaam Machi 17, 2026.

Katika hafla hiyo, Mwambapa alieleza kuwa taasisi yao itaendelea kuwaunga mkono vijana kwa kuwapatia msaada wa kifedha pamoja na ushauri wa kitaalamu ili kuwasaidia kukuza mawazo yao ya biashara na kuchangia maendeleo ya uchumi wa taifa.

Alifafanua kuwa programu hiyo inatekelezwa kupitia ushirikiano wa CRDB Bank Foundation na wadau mbalimbali, wakiwemo taasisi za maendeleo pamoja na mashirika ya kimataifa yanayojihusisha na masuala ya mabadiliko ya tabianchi. Ushirikiano huo pia umewezesha kutengenezwa kwa mifumo ya kidijitali inayorahisisha vijana kuwasilisha na kufuatilia maombi yao.

Akikumbushia uzinduzi wa programu hiyo uliofanyika Februari 12 jijini Dodoma, Mwambapa alisema tukio hilo lilihudhuriwa na viongozi wa serikali, akiwemo Waziri wa Mipango na Uwekezaji ambaye alifungua rasmi dirisha la maombi kwa vijana na wajasiriamali kutoka maeneo mbalimbali nchini.

Aidha, aliipongeza serikali kwa kuweka mazingira mazuri yanayoruhusu sekta binafsi kushiriki kikamilifu katika kukuza uchumi jumuishi na endelevu, huku akisisitiza kuwa hatua hizo zina mchango mkubwa katika kuwawezesha vijana kujiajiri kupitia ubunifu na ujasiriamali.

Kwa mujibu wake, programu hiyo inalenga kuwafikia makundi matatu ya vijana ambayo ni wale wenye biashara changa, wajasiriamali wadogo pamoja na wanafunzi wenye mawazo ya biashara. Lengo kuu ni kuwasaidia kubuni suluhisho zinazokabiliana na changamoto za kimazingira huku wakitengeneza fursa za kipato.

Takwimu zinaonesha kuwa ndani ya mwezi mmoja tangu kufunguliwa kwa dirisha la maombi, jumla ya maombi 3,967 yalipokelewa kutoka sehemu mbalimbali za Tanzania.

Hatua inayofuata ni kufanyika kwa tathmini ya kitaalamu ya miradi iliyowasilishwa na vijana, ambayo itafanywa na jopo la wataalamu kutoka taasisi tofauti. Washiriki watakaofaulu katika hatua hiyo watapatiwa mafunzo maalum kabla ya kufanyiwa uhakiki wa kina wa biashara zao.