MTOTO WA MWAKA MMOJA ABAKWA NA BABA YAKE

NA GLORY CHACKY

MTOTO wa mwaka mmoja na nusu amebakwa na kulawitiwa na baba yake wa kufikia John Donald (35) mkazi wa Kiyangu, Manispaa ya Mikindani mkoani Mtwara.

Kwa mujibu wa taarifa iliyotolewa jijini Dar es salaam na msemaji wa Wizara ya Afya, Maendeleo ya Jamii, Jinsia, Wazee na Watoto, Erasto Ching’oro, inakemea vikali kitendo hicho.

Taarifa hiyo inasema kubakwa na kulawitiwa ni ukatili wa hali ya juu dhidi ya mtoto maana husababisha maumivu makali ikiwa ni pamoja na kumdhuru mtoto kimwili, kisaikolojia, kijamii na kihisia.

 Aidha, vitendo hivi, vinaacha kovu la kudumu kimwilini, kiakili, kimaadili, kijamii, ulemavu, maumivu, na wakati mwingine husababisha kifo, jambo ambalo linahitaji ulinzi thabiti katika kuhakikisha watoto wanaishi mazingira salama na rafiki.  

Kitendo hicho ni ukiukwaji mkubwa wa haki za mtoto ambao huchangia kurudisha nyuma ustawi na maendeleo ya Mtoto na ni kinyume cha Sheria ya Mtoto Na. 21 ya mwaka 2009.

Pia taarifa hiyo inasema mtuhumiwa amekamatwa na kufikishwa mahakamani ili hatua za kusheria ziweze kuchukuliwa dhidi yake.

 Wizara inamwelekeza Afisa Ustawi wa Jamii na Afisa Maendeleo ya Jamii wa Mkoa wa Mtwara kuwasiliana na wadau wengine katika ngazi zote kuhakikisha mama na mtoto wanapata huduma ya afya na  ushauri na kufuatilia mwenendo wa shauri hilo.