Nyota TPL, FDL wapigana vikumbo Tamasha la Majimaji Selebuka 2019

 Mchezaji Bora wa Michuano ya soka ya Tamasha la Majimaji Selebuka 2019, Iral Alex 'Neymar' wa timu ya Lizaboni Junior (kulia) akipongezwa na Mbunge wa Songea Mjini na Naibu Waziri wa Mambo ya Nje na Ushirikiano wa Afrika Mashariki, Dk. Damas Ndumbaro ambaye alikuwa mgeni rasmi katika fainali kati ya Lizaboni na Tigo Fc kwa Tigo kuibuka bingwa.

 Naibu Waziri wa Mambo ya Nje na Ushirikiano wa Afrika Mashariki, Dk. Damas Ndumbaro (kushoto) akimkabidhi kombe, nahodha wa timu ya Tigo Fc, Abdallah Hausi baada ya timu hiyo kuibuka bingwa kwenye michuano ya soka ya Tamasha la Majimaji Selebuka 2019 kwa kuichapa Lizaboni Junior mabao 2-1 fainali iliyopigwa kwenye Uwanja wa Majimaji, Songea.

Fowadi wa timu ya Lizaboni Junior Iral Alex (jezi namba 10), akidhibitiwa kisawasawa na nyota wa Tigo Fc wakiongozwa na Goddy Manji (jezi namba 7) katika mchezo wa fainali ya Michuano ya soka ya Tamasha la Majimaji Selebuka na Tigo kuibuka bingwa kwa ushindi wa mabao 2-1. Fainali ilipigwa kwenye Uwanja wa Majimaji, Songea ambapo tamasha linaendelea kwa shughuli nyingine.

 Mabingwa wa michuano ya soka ya Tamasha la Majimaji Selebuka, timu ya Tigo Fc wakiwa kwenye picha ya pamoja na Mbunge wa Songea na Naibu Waziri wa Mambo ya Nje na Ushirikiano wa Afrika Mashariki, Dk. Damas Ndumbaro aliyekuwa mgeni rasmi katika fainali hiyo.

Na Mwandishi Wetu, Songea

MASTAA mbalimbali wa Ligi Kuu (TPL), na Ligi Daraja la Kwanza (FDL), wakiongozwa na kiungo wa zamani wa Yanga, Pato Ngonyani na Peter Mapunda wa Mbeya City, wamekuwa gumzo kwenye michuano ya soka kwenye Tamasha la Majimaji Selebuka 2019, ambapo wamefanikiwa kutwaa ubingwa wakiwa na timu ya Tigo FC mjini hapa.

Tigo iliibuka mabingwa kwa kuilaza Lizaboni Junior mabao 2-1 katika mchezo wa fainali uliopigwa Juzi (Jumamosi), kwenye Uwanja wa Majimaji mjini Songea na kuondoka na kitita cha Sh. Milioni 1, medali, kombe na jezi seti moja.

Ngonyani ambaye amemwaga wino kukipiga na Maafande wa Polisi Tanzania waliyopanda TPL msimu huu, Mapunda na Selemani Mangoma wote wa Mbeya City sambamba na Abdallah Hausi anayekipiga Majimaji Songea ya FDL, walikuwa nguzo muhimu katika timu yao ya Tigo kwenye michuano hiyo iliyoshirikisha jumla ya timu 16.

Mshindi wa pili, Lizaboni Junior iliambulia kitita cha Sh. 700,000 wakati washindi wa tatu Ruhuwiko Sekondari walijinyakulia Sh. 500,000 baada ya kufanya kufuru kwa kuinyeshea Mateka Fc mvua ya mawe ya mabao 8-3.

Mbali na zawadi hizo, timu zote zilizofanikiwa kuingia hatua ya nusu fainali zilizawadiwa seti ya jezi moja huku Tuzo ya Kipa Bora ilinyakuliwa na Martin Shimba wa Tigo FC, Mchezaji Bora wa Michuano alikuwa Iral Alex ‘Neymar jr’ wa Lizaboni Junior wote wakiondoka na  Sh. 50 kila mmoja.

Timu yenye nidhamu iliibuka Small Kids waliozawadiwa Sh. 100,000, Tuzo ya Mfungaji Bora ilikwenda kwa John Chinguku na Neva Kaboma wote kutoka Ruhuwiko Sekondari waliofungana kwa mabao matano huku mwamuzi bora alikuwa Thabit Manyamba ambao kila mmoja alipozwa Sh. 50,000.

Katika fainali hiyo Mgeni rasmi alikuwa Naibu Waziri wa Mambo ya Nje na Ushirikiano wa Afrika Mashariki, Dk. Damas Ndumbaro, ambaye pia ni Mbunge wa Songea Mjini.

Tamasha la Majimaji Selebuka hufanyika kila mwaka mjini Songea likihusisha matukio mbalimbali ikiwamo michezo, ngoma za asili, midahalo kwa wanafunzi wa sekondari, utalii wa ndani na maonyesho ya wajasiriamali.