Amana Benki kukopesha ada wazazi, walezi

Mkurugenzi Mtendaji wa Benki ya Amana, Dk. Muhsin Masoud, akizungumza na wateja wa benki hiyo ikiwa ni sehemu y a Maadhimisho ya Wiki ya Huduma kwa Wateja iliyofanyika makao makuu ya benki hiyo jijini Dar es Salaam juzi. (Picha na Suleiman Msuya). 

Na Suleiman Msuya

BENKI ya Amana katika kupanua huduma zake imeanzisha huduma ya kutoa ada ili kutua mzigo huo kwa wazazi na walezi.

Hayo yamesemwa na Mkurugenzi Mtendaji wa benki hiyo Dk. Muhsin Masoud, wakati wa hafla ya kusherehekea miaka nane ya Amana Benki iliyofanyika jijini Dar es Salaam hivi karibuni.

Dk. Masoud alisema elimu ni jambo la muhimu katika jamii hivyo wanaamini huduma hiyo itaweza kusaidia wazazi na walezi ambao wanakumbana na changamoto ya kulipa ada.

Mkurugenzi huyo alisema utaratibu wa kutoa mkopo wa ada utahitaji masharti madogo ikiwemo shule anayosomea mtoto kumdhamini.

“Amana Benki ni benki ya wananchi tumekuja na huduma katika wiki ya huduma kwa wateja  tukiamini jamii itanufaika kwa kupata mkopo wa ada ili kulipia watoto wao hivyo kumuondolea mzazi hofu ya kupata ada.

Utaratibu wa kurejesha ada hiyo utakuwa wa mwaka mmoja na kama mzazi atahitaji kuongeza mkopo tutajadiliana upya,” alisema.

Alisema “Kaulimbiu ya wiki ya huduma kwa wateja mwaka huu ilikua ni ‘Tabasamu lako, Furaha yetu’ ikiwa ni kiashiria katika uhamasishaji wakiutendaji na ubunifu wa suluhu mbalimbali zinazopelekea kuwarahisishia wateja katika upataji wa huduma za kifedha ambazo zinakidhi mahitaji ya Watanzania wakipato cha kati na chini.

Mkurugenzi huyo alisema mikopo yao inalenga watu wanye mahitaji ya mikopo midogo ya biashara, elimu na vikundi (Solidarity Group Financing) kwa lengo la kuwakomboa kiuchumi”.

Alisema katika kuadhimisha wiki hiyo Amana Benki inaendelea kuwaelimisha wazazi na walezi juu ya uwezeshwaji unaofanywa hasa  katika masuala ya elimu  wameamua kutoa mkopo wenye lengo la kupunguza mzigo wa ada za shule.

"Amana Benki inaendelea kukua, na jitihada za kufikisha huduma zake maeneo mbalimbali ya Tanzania zinaendelea mwaka huu imefanikiwa kufungua tawi la tisa (9) Zanzibar na maandalizi yakufungua tawi lake la 10 mkoani Dodoma mwaka 2020 yanaendela," alisema.

Pia, alisema benki hiyo kwa sasa ina mawakala zaidi ya 400 maeneo mbalimbali katika kurahisisha upatikanaji wa baadhi ya huduma zake. 

Dk. Masoud alisema dira ya Amana Benki ni kuwa chaguo la kwanza na kiongozi katika utoaji huduma za kibenki zinazozingatia misingi ya kiislam.

"Dira hii inafuatiwa na dhamira ya kutoa huduma za kisasa na za kipekee kwa kuzingatia maadili kwa njia iliyowazi kwa kupitia teknolojia za kisasa," alisema.

Mkuu wa idara ya Masoko, Dassu Mussa, alisema sambamba na kauli mbiu ya “Tabasamulako, Furahayetu” Amana Benki, imeendeleza jitihada za kuongeza uwezo kwa wateja kuweza kupata huduma kiurahisi na kuwa miongoni mwa benki itakayozindua mfumo wakidigitali utakaofahamika kama Amana Benki Mobile App maalum kwa watumiaji wa simu janja.

"Mfumo huu utazidi kuwarahishia wateja katika kupata huduma za kibenki kupitia simu zao na kwa gharama nafuu zaidi” alisema.