Maelfu wajitokeza ujazaji maji Bwana la Julius Nyerere

Rais wa Jamhuri ya Muungano wa Tanzania Mhe. Samia Suluhu Hassan akisalimiana na Viongozi mbalimbali alipowasili Rufiji mkoani Pwani tarehe 22 Desemba, 2022 kwa ajili ya kushiriki katika Shughuli ya Kufunga Njia ya Kuchepusha Maji na Kuanza Ujazaji wa Maji kwenye Bwawa la Kuzalisha Umeme la Julius Nyerere (JNHPP) kwenye Mto Rufiji mkoani Pwani tarehe 22 Desemba, 2022.

Rais wa Jamhuri ya Muungano wa Tanzania Mhe. Samia Suluhu Hassan akimsikiliza, Waziri wa Nishati Mhe. January Makamba pamoja na Mkurugenzi Mkuu wa Shirika la Umeme nchini TANESCO Maharage Chande kuhusiana na mahandaki ya kupitishia maji (Power water ways) kwenye Mradi wa Bwawa la kuzalisha umeme (Megawati 2115)   la Julius Nyerere JNHPP katika Mto Rufiji.

Rais wa Jamhuri ya Muungano wa Tanzania Mhe. Samia Suluhu Hassan akimsikiliza, Waziri wa Nishati Mhe. January Makamba pamoja na Mkurugenzi Mkuu wa Shirika la Umeme nchini (TANESCO) Maharage Chande kuhusiana na Kituo cha kusafirishia umeme (Switchyard) katika Mradi wa Bwawa la kuzalisha umeme (Megawati 2115) la Julius Nyerere (JNHPP) katika Mto Rufiji Mkoani Pwani tarehe 22 Desemba, 2022.

Rais wa Jamhuri ya Muungano wa Tanzania Mhe. Samia Suluhu Hassan akiwapatia tuzo Marais Wastaafu Mhe. Ali Hassan Mwinyi pamoja na Mhe. Dkt. Jakaya Kikwete kutokana na mchango wao katika ujenzi wa Bwawa la Kuzalisha Umeme la Julius Nyerere (JNHPP) kwenye Mto Rufiji mkoani Pwani tarehe 22 Desemba, 2022.

Rais wa Jamhuri ya Muungano wa Tanzania Mhe. Samia Suluhu Hassan akiwaonesha Marais Wastaafu Mhe. Ali Hassan Mwinyi pamoja na Mhe. Dkt. Jakaya Kikwete, Spika wa Bunge Dkt.Tulia Ackson na Waziri wa Nishati Mhe. Januari Makamba  Njia ya kuchepusha Maji kwenye Bwawa la Kuzalisha Umeme (Megawati 2115)   la Julius Nyerere JNHPP kwenye Mto Rufiji Mkoani Pwani tarehe 22 Desemba, 2022.

Rais wa Jamhuri ya Muungano wa Tanzania Mhe. Samia Suluhu Hassan akibonyeza Kitufe kuashiria Hatua ya Kufunga Njia ya Kuchepusha Maji na Kuanza Ujazaji wa Maji kwenye Bwawa la Kuzalisha Umeme (Megawati 2115) la Julius Nyerere JNHPP kwenye Mto Rufiji Mkoani Pwani tarehe 22 Desemba, 2022.

Rais wa Jamhuri ya Muungano wa Tanzania Mhe. Samia Suluhu Hassan akizungumza na Viongozi pamoja na wananchi wa Mikoa ya Pwani na Morogoro kabla ya kuzindua Shughuli ya Kufunga Njia ya Kuchepusha Maji na Kuanza Ujazaji wa Maji kwenye Bwawa la Kuzalisha Umeme (Megawati 2115)   la Julius Nyerere (JNHPP) kwenye Mto Rufiji Mkoani Pwani tarehe 22 Desemba, 2022.

Na Mwandishi Wetu, Rufiji

MAELFU ya wananchi wa mikoa ya Pwani, Morogoro na Dar es Salaam wamejitokeza katika zoezi la kuanza ujazaji wa maji kwenye Bwawa la Mwalimu Nyerere (JNHPP), lililopo wilayani Rufiji mkoani Pwani.

Zoezi hilo la ujazaji maji linazinduliwa leo na Rais Samia Suluhu Hassan, ambaye ameambatana na viongozi mbalimbali wa serikali na kisiasa.

Bwawa hilo ambalo ujenzi wake umegharimu Sh.trilioni 6.5 linatarajiwa kuzalisha megawati za umeme 2,115 ambazo zitaingizwa kwenye gridi ya taifa na kumaliza changamoto ya umeme nchini.

Mwitikio wa wananchi zaidi ya 2,000 katika tukio hilo la ujazaji maji unatokana umuhimu wa mradi huo kwa maendeleo ya nchi kwa miaka ijayo.

Mradi huo ulianza kujengwa kupitia Serikali ya Awamu ya Tano ambayo ilikuwa ikiongozwa na Rais John Magufuli ambapo Rais Samia ameendeleza na leo atazindua zoezi la ujazaji maji.

Kwa mujibu wa Waziri wa Nishati, January Makamba mradi huo umefikia asilimia 78 ya ujenzi na unatarajiwa kukamilika 2024.

Mradi huu wa JNHPP ambao utazalisha megawati 2,115 utakuwa mkubwa kwa Afrika Mashariki na wanne kwa Afrika.

Akifafanua kuhusu ujenzi wa mradi huo Mhandisi Said Kimbanga alisema kuna mitambo tisa ambapo kila mmoja utakuwa unazalisha megawati 235, hivyo kwa jumla kuzalisha megawati 2,115.

Amesema maji ambayo yataingia kuzalisha umeme yanatoka Mto Kilombero, Ruaha Mkuu na Kuwegu.

Mhandisi Kimbanga amesema eneo la mradi bwawa huo lina ukubwa wa hekta 915 ukubwa ambao ni sawa na ziwa ambapo ujazo wa maji lita bilioni 32.

Amesema valvu iliyofungwa katika mradi huo wakuzalisha umeme ni ya tatu kwa ukubwa duniani ambapo ya kwanza ipo Pakistani na ya pili ipo India.

Baadhi ya viongozi walioungana na Rais Samia ni pamoja Rais wa Awamu ya Pili, Alhaj Ally Hassan Mwinyi, Rais wa Awamu ya Nne, Dk Jakaya Kikwete, Makamu Mwenyeki wa Chama Cha Mapinduzi (CCM), Kanali mstaafu Abdulrahman Kinana, Katibu Mkuu wa CCM, Daniel Chongolo, Waziri wa Fedha na Mipango Mwigulu Nchemba, Waziri wa Habari, Mawasiliano na Teknolojia ya Habari, Nape Nnaye, Waziri wa Ujenzi na Uchukuzi, Profesa Makame Mbarawa na wengine wengi.