Serikali yavishauri Vyama vya Wafanyakazi kuacha kuchanganya Siasa katika uendeshaji wake, yawaonya Mameneja Rasilimali Watu

Na Hussein Ndubikile, Dar es Salaam

Serikali imevishauri Vyama vya Wafanyakazi na Taasisi zake kuacha kuingiza siasa kwenye uendeshaji na utekelezaji majukumu ili kuondoa migogoro inayoweza kujitokeza.

Hayo yamesemwa jijini Dar es Salaam na Naibu Waziri, Ofisi ya Waziri (Kazi, Vijana, Ajira na Wenye Ulemavu)  Patrobas Katambi katika Warsha ya Kuimarisha Uhusiano Bora kati ya Chama cha Wafanyakazi wa Viwanda, Biashara, Taasisi za Fedha, Huduma na Ushauri Nchini (TUICO) na Viongozi Waandamizi wa Taasisi zingize za Kazi.

Amesema kuwa watendaji wa vyama hivyo kuchanganya siasa katika majukumu ya uendeshaji kunachangia migogoro kwani vinaendeshwa kwa mujibu sheria.

" Kuingiza siasa ndani ya vyama vya wafanyakazi kunachangia hali ya kutoelewana nawaomba muache mfanye kazi kwa mujibu sheria nataratibu zinazowaongoza," amesema  Naibu Waziri Katambi.

Amebainisha kuwa Serikali itaendelea kuwalinda waajiri katika kutekeleza majukumu yao pamoja na kuwalinda wafanyakazi pale wanapodai masilaha masilahi ya haki itendeke.

Amewaonya Mameneja Rasilimali Watu wa Makampuni kuacha tabia ya kuwalinda waajiri kwa kwenda kinyume na misingi ya kazi hali inayosababisha waajiriwa kukosa haki zao za msingi ikiwemo kuondolewa kazini kiholela.

Kwa upande wake, Katibu Mkuu wa TUICO, Boniface Nkakatisi amesema warsha hiyo ina lengo la kukuza uhusiano kati ya chama hicho na taasisi zingine za kazi.

Amefafanua kuwa  katika warsha hiyo mada mbalimbali zitajadiliwa ikiwemo majukumu ya vyama vya wafanayakazi pamoja na umuhimu wa mikataba ya pamoja katika kuimarisha uhusiano sehemu za kazi.

Nae, Afisa Mtendaji Mkuu wa Chama cha Waajiri Nchini (ATE), Suzanne Ndomba amesema cha hicho kitaendelea kushirikiana na TUICO na taasisi zingine pamoja kuhakikisha waajiri wanawapa fursa wafanyakazi kujiunga na vyama hvyo.

Mwenyekiti wa TUICO, Paul Sengeze amesema chama hicho kinatambua umuhimu wa uhusiano na vyama vingize vya kazi na kusisitiza kuwa vyama vya wafanyakazi sio adui wa waajiri bali kinafanya kazi kutetea haki na masilahi ya pande zote.

Rais wa Shirikisho la Vyama vya Wafanyakazi Tanzania (TUCTA), Tumaini Nyamhokya ameipongeza TUICO  kwa kuonyesha ushirikiano na vyama vingine huku akiongeza Sikukuu ya Wafanyakazi itafanyika Mkoani Morogoro Mei Mosi Mwaka huu.

Jaji Mfawidhi- Mahakama Kuu ya Tanzania Divisheni ya Kazi, Jaji Yose Mlyambina amesema bado kuna migogoro mingi ya kazi huku idadi ya majaji ikiwa ndogo hivyo ipo haja ya kuwepo tume shsirikishi yenye jukumu la kutoa elimu.

Mwakilishi wa Mkurugenzi wa Shirika Kazi Duniani Nchini Tanzania (ILO) Bw. Maridadi amesema ILO itaendelea kutoa mafunzo kwa TUICO ili kuimarisma uhusiano borao kati ya chama hicho na taasisi zingine.