Miradi ya Barabara Yazidi Kuimarika Pwani Baada ya Fedha Kuingia Kutoka Serikali na Washirika wa Maendeleo

NA MIRAJI MSALA, PWANI

Wakala wa Barabara za Vijijini na Mijini (TARURA) Mkoa wa Pwani umetangaza mafanikio makubwa katika ujenzi, ukarabati na matengenezo ya barabara baada ya kupokea zaidi ya Sh bilioni 53 kwa mwaka wa fedha 2024/2025 kutoka Serikali ya Awamu ya Sita na washirika mbalimbali wa maendeleo.

Akizungumza na waandishi wa habari, Meneja wa TARURA Mkoa wa Pwani, Mhandisi Ibrahim Kibasa, alishukuru Serikali inayoongozwa na Rais Dkt. Samia Suluhu Hassan kwa kuendelea kutoa fedha za maendeleo zilizowezesha kuboresha barabara katika halmashauri zote tisa za mkoa huo.

Fedha tulizopokea zimewezesha kuboresha barabara zinazounganisha maeneo ya uzalishaji, huduma za kijamii, makazi ya watu pamoja na barabara zinazohudumia viwanda,” alisema Kibasa.

Mtandao wa Barabara wa Mkoa wa Pwani

Kibasa alifafanua kuwa mkoa una mtandao wa barabara wenye jumla ya km 5,186.053, ambapo:

km 122.41 ni lami

km 894.8 ni changarawe

km 4,169.19 ni barabara za udongo

Alisema ukubwa huo unahitaji uwekezaji mkubwa ili kuhakikisha barabara zinakidhi mahitaji ya uzito wa magari na shughuli nyingi za usafirishaji.

Fedha Zaidi ya Sh Bilioni 53 Zilizopokelewa

Kwa mwaka 2024/2025, TARURA Pwani ilipokea jumla ya Sh 53,033,278,837.44 kutoka vyanzo mbalimbali, zikiwemo:

Mfuko wa Barabara – Matengenezo: Sh 6.9 bilioni

Mfuko wa Barabara – Maendeleo: Sh 3 bilioni

Mfuko Mkuu wa Serikali – Majimbo: Sh 4.225 bilioni

Tozo ya Sh 100 kwa Lita ya Mafuta: Sh 13.875 bilioni

Fedha za Dharura: Sh 7.133 bilioni

Benki ya Dunia (CERC): Sh 17.895 bilioni

Fedha hizi zimewezesha kutekeleza miradi mbalimbali ambayo imeleta nafuu kwa wananchi na kuboresha usafiri katika maeneo ya kilimo, biashara na viwanda,” alisisitiza.

Miradi Iliyotekelezwa na Inayoendelea

Miradi imeendelea katika wilaya zote za mkoa ikiwa ni pamoja na ujenzi wa madaraja, kalavati, mifereji ya maji ya mvua na ukarabati wa barabara.

Kibaha Vijijini

Ujenzi wa boksi kalavati Kwala–Mperamumbi

Matengenezo ya barabara ya Picha ya Ndege–Bokotimiza

Matengenezo ya barabara ya Kongowe–Forest Yombo

Rufiji

Ujenzi wa daraja la Mohoro

Ujenzi wa mifereji ya maji ya mvua Ikwiriri Stand

Matengenezo ya barabara za Ikwiriri mjini

Ukarabati wa barabara Utete–Kingupira

Kibiti

Ukarabati wa barabara Muyuyu–Ruaruke

Bagamoyo

Uwekaji wa taa za barabarani kuimarisha usalama

Chalinze

Ujenzi wa kalavati Ruvu–Milo

Miradi mingine inaendelea katika Mkuranga, Mafia na Kisarawe, maeneo yaliyokuwa yakikumbwa na changamoto za mvua na uharibifu wa barabara kutokana na shughuli za usafirishaji wa mazao.

Ongezeko la Viwanda Laongeza Mahitaji ya Barabara

Kibasa alisema kuwa hadi kufikia mwaka 2025, mkoa wa Pwani una jumla ya viwanda 1,631, vikiwemo:

Vikubwa: 156

Vya kati: 190

Vidogo: 268

Vidogo sana: 1,017

Uzalishaji umefikia zaidi ya tani 194,554,512 kwa mwaka, hali inayohitaji barabara imara kwa ajili ya kusafirisha bidhaa.

Maeneo mengi ya viwanda bado yanategemea barabara za udongo, na hadi sasa barabara za lami zimefikia km 12 pekee,” alisema.

Ahadi ya Kuendelea Kuimarisha Miundombinu

Kibasa alibainisha kuwa TARURA imejipanga kusimamia kwa ubora na kasi miradi yote ya barabara ili kuendana na kasi ya ukuaji wa uchumi wa mkoa huo.

Miundombinu bora ndiyo msingi wa maendeleo ya wananchi na wawekezaji. Tutaendelea kuboresha barabara ili Pwani iwe kitovu cha uchumi,” alisisitiza.