RAIS ATEUA WAKUU WA WILAYA

WAKILI maarufu na kada wa Chama cha  Mapinduzi (CCM), Avod Mmanda ameteuliwa kuwa Mkuu wa Wilaya ya Mtwara  huku nafasi ya Hamphrey Polepole katika Wilaya ya Ubungo ikizibwa na Kisare Makori.

Makori amechukua nafasi ya Polepole ambaye hivi karibuni aliteuliwa kuwa Katibu wa Halmashauri Kuu ya Chama cha Mapinduzi (NEC), Itikadi na Uenezi ya CCM ikiwa ni miezi michache tu tangu aitumikie nafasi hiyo ya Ukuu wa Wilaya.

Taarifa iliyotolewa jana kwa vyombo vya habari na Balozi Kiongozi  John Kijazi alisema kwamba rais John Magufuli amefanya uteuzi wa  Wakuu wa Wilaya 2 na Wakurugenzi 3 wa Mamlaka za Serikali za Mitaa.

Wakili Mmanda amechukua nafasi iliyoachwa wazi na Khatib  Kazungu ambaye hivi karibuni Rais Magufuli alimteua  kuwa Naibu Katibu Mkuu wa Wizara ya Fedha na Mipango.

Alisema mbali na uteuzi huo wa Wakuu wa Wilaya hizo pia Rais Magufuli alimteua Ramadhan Geodrey Mwangulumbi kuwa Mkurugenzi wa Halmashauri ya Manispaa ya Shinyanga, akichukua nafasi ya Lewis Kalinjuna ambaye anastaafu kwa mujibu wa Sheria.

Pia Rais alimteua  Rojas Romuli kuwa Mkurugenzi Mtendaji wa Halmashauri ya Wilaya ya Mpanda iliyopo katika Mkoa wa Katavi akichukua nafasi ya Ngalinda Hawamu Ahmada aliyefariki dunia na Rashid Gembe akiteuliwa kuwa Mkurugenzi Mtendaji wa Halmashauri ya Wilaya ya Mkinga iliyopo katika Mkoa wa Tanga.

Gembe anachukua nafasi iliyoachwa wazi na Mkumbo Barnabas ambaye uteuzi wake ulitenguliwa hivi karibuni.

Alisema uteuzi huo unaanza mara moja na kuwataka  wateule wote  kuripoti Makao Makuu ya Ofisi ya Rais, Tawala za Mikoa na Serikali za Mitaa (Tamisemi) mara wapatapo taarifa.

Mbali na uteuzi wa Wakuu wa Wilaya na Makatibu Tawala uliofanyika jana pia Rais Magufuli alifanya uteuzi  wa Wenyeviti 7 wa Bodi za Taasisi za Serikali na kumteua Mhandisi Christopher Chiza Aliyewahi kuwa Waziri wa Kilimo, Chakula na Ushirika katika Serikali ya awamu ya nne.

Chiza aliteuliwa kuwa Mwenyekiti wa Bodi ya Wakurugenzi wa Mamlaka ya Maendeleo ya Biashara Tanzania (TanTrade) huku Ali Mufuruki aliteuliwa kuwa Mwenyekiti wa Bodi ya Wadhamini ya Mfuko wa Taifa wa Dhamana ya Hifadhi ya Mazingira.

Pia Rais Magufuli alimteua  Peter  Maduki kuwa Mwenyekiti wa Bodi ya Mamlaka ya Elimu na Mafunzo ya Ufundi Stadi (VETA), Yamungu Kayandabila kuwa Mwenyekiti wa Bodi ya Mamlaka ya Usimamizi wa Bima Tanzania (TIRA).

Aidha alimteua Godwin Mjema kuwa Mwenyekiti wa Bodi ya Kampuni ya Huduma za Fedha na Mikopo (UTT-MFI),Ernest  Bupamba kuwa Mwenyekiti wa Bodi ya Ushauri ya Chuo cha Bahari (DMI) na Aloyce Hepelwa kuwa Mwenyekiti wa Bodi ya Taasisi ya Miradi ya Maendeleo ya Miundombinu (UTT-PID).

Katika uteuzi huo pia Rais Magufuli alimteua John Jingu kuwa Mwenyekiti wa Baraza la Uwezeshaji wananchi Kiuchumi Tanzania, Rashid Tamatama kuwa Mkurugenzi Mkuu wa Taasisi ya Utafiti wa Uvuvi (TAFIRI) na Zuhura Muro kuwa Mjumbe wa Baraza la Taifa la Biashara (Tanzania National Business Council - TNBC).

Mwishoo