TARATIBU ZA MANUNUZI ZILIKIUKWA KATIKA UNUNUZI WA GARI- SHAHIDI

NA MWANDISHI WETU, TABORA

SHAHIDI wa nane katika shauri  la Uhujumu linalowakabili vigogo wa Ushirika wa Tumbaku Kanda ya Magharibi (WETCU) Goodluck Amos  ameiambia Mahakama kuwa taratibu za manunuzi ya gari aina ya Toyota V8 hazikufuatwa.

Akitoa ushahidi mbele ya Hakimu Mkazi Mfawidhi wa Mkoa wa Tabora, Chiganga Mashauri, shahidi huyo ambaye kwa sasa ndiye Mhasibu Mkuu wa Ushirika huo alisema mchakato wa manunuzi ya gari hilo ulianza kabla ya kikao cha Bodi.

Huku akiongozwa na Wakili Mwandamizi wa Serikali, Shedrack Kimaro, shahidi huyo alisema kuwa bodi ya Wetcu ilikutana tarehe 30 Juni mwaka 2015 na kuiagiza  Menejimenti ianze mchakato wa kupata Kampuni  itakayoweza kuiuzia gari WETCU.

Amos alisema kuwa Hati za nukuu ya bei  (quotation)  toka makampuni mbalimbali ziliandaliwa kati ya tarehe 21 na 24 Juni mwaka 2015 huku kikao cha Bodi kuidhinisha kuanza mchakato wa manunuzi ulifanyika tarehe 30 Juni mwaka 2015.

Aliongeza kuwa kinachoonyesha  taratibu hizo zilikiukwa ni pale Bodi  ilipoagiza  kuandaa taratibu za kawaida za ununuzi wa gari aina ya Toyota V8 huku ikielekeza ipewe Kampuni ya Tanzania 4 x 4 LTD.

Katika kudhihirisha ukweli  huo shahidi huyo alitoa Nyaraka  hizo  kutoka kampuni za  Betomotors Tz  Limited, Jan Motors Ltd na ile ya Tanzania 4X4 Ltd zote zikiwa na bei tofauti kitendo kinachoonyesha  kuwa  mchakato huo ulivyoanza mapema kabla ya kikao cha bodi.

Shahidi  mwingine  Deogratias Rugangira aliiambia Mahakama hiyo kuwa maamuzi ya mkutano mkuu wa Ushirika huo yaliagiza kuwa fedha zitakopatikana kutokana na uuzaji wa hisa zitumike kulipia baadhi ya madeni waliyokuwa wanadaiwa.

Rugangira ambaye ni Mrajisi msaidizi wa Vyama vya Ushirika nchini alisema kuwa kitendo cha watuhumiwa kutumia fedha hizo kununulia gari ni kosa kwa mujibu wa sheria za vyama vya ushirika.

Aliongeza kuwa maamuzi ya mkutano mkuu yanatakiwa yaheshimiwe na Bodi pamoja na menejimenti kwani kazi yao ni kutekeleza matakwa ya wanaounda ushirika huo ambao ni vyama vya msingi vya ushirika.

Watuhumiwa wa shauri hilo la kuhujumu uchumi namba 2/2017 ni Gabriel Mkandala, John Kusaja, Prosper Mbacho, Hamza Kapera, Fransis Penta, Msafiri Said na mfanyabiashara Faras Yassin Abbas.

Shauri hilio litaendelea kusikilizwa Jumatatu ijayo kwa upande wa Jamuhuri kuendelea kuleta mashahidi wake.