RIADHA TANZANIA YAMLILIA RUGE MUTAHABA

SHIRIKISHO la Riadha Tanzania (RT), linapenda kuungana na Uongozi na Wafanyakazi wa Kampuni ya Clouds Media Group (CMG), Familia ya Wana Tasnia ya Habari na Wadau wote wa michezo, Sanaa na burudani, kutoa salamu za pole kutokana na msiba mzito wa Mkurugenzi wa Vipindi na Uzalishaji wa CMG Ndugu Ruge Mutahaba aliyefariki Dunia Februari 26 huko nchini Afrika Kusini alikokuwa akiendelea na matibabu. 

Shirikisho la Riadha la Tanzania, likiwa ni sehemu ya jamii kwa nyakati tofauti limekuwa likishirikiana vema na kwa ukaribu na CMG katika utekelezaji wake wa majukumu ya kusimamia na kuendesha mchezo wa riadha hapa nchini. 

RT imekuwa na ushirikiano wa karibu na CMG katika utekelezaji wake wa majukumu ya kila siku, hivyo taarifa za kifo cha Ruge hakika zimetustua sisi kama viongozi na familia nzima ya mchezo wa Riadha hapa nchini. 

Kutokana na msiba huo mzito tunapenda kutoa salamu za pole kwa Uongozi, Wafanyakazi wote wa CMG, Wadau wa habari, michezo, burudani na familia ya Ruge Mutahaba kutokana na kifo cha mpendwa wetu na kuwaombea kuwa na moyo wa subira katika kipindi hiki kigumu. 

Familia ya Riadha nchini, itaendelea kumkumbuka Ruge kutokana na moyo wake wa kujitolea katika jamii, ubunifu na uhamasishaji wake katika masuala mbalimbali ya kimaendeleo katika jamii na hakika tutaendelea kuyaenzi.

1Pia, tutazidi kuendeleza ushirikiano wa karibu tuliokuwa nao na CMG chini ya Ruge enzi za uhai wake. 

Tunarudia tena kutoa salamu za pole kwa wafiwa na kuwaombea katika kipindi hiki kigumu cha kuondokewa na mpendwa wetu.  Bwana Alitoa na Bwana Ametwaa, Jina lake lihimidiwe. Amin. Wilhelm Gidabuday Katibu Mkuu RT Februari 27, 2019