Walimu watakiwa kuyatendea haki mafunzo ya ‘Kids Athletics’

Mwalimu Neema Sio wa Shule ya Msingi Yamay, Mbulu mkoani Manyara, akishiriki kwa vitendo mafunzo ya ‘Kids Athletics’ yaliyokuwa yakiendeshwa na Mkufunzi Charles Maguzu wilayani Mbulu, juzi. (Na Mpiga Picha Wetu).

SSGT  Catherine Lange wa Jeshi la Magereza akijiandaa kurusha mkuki katika mashindano ya Majeshi (BAMMATA).

NA MWANDISHI WETU, MANYARA

WALIMU wilayani Mbulu Mkoa wa Manyara, wametakiwa kwenda kuyafanyia kazi kwa vitendo mafunzo ya ‘Kid’s Athletics’ wanayopewa.

Wito huo umetolewa na Mwenyekiti wa Halmashauri ya Wilaya ya Mbulu, Joseph Mandoo, wakati akifungua mafunzo hayo ya siku yaliyoendeshwa na Mkufunzi Charles Maguzu, ambaye pia ni Ofisa Michezo Mkoa wa Manyara.

Maguzu ni zao la Kozi ya Kids Athletics iliyoendeshwa na Shirikisho la Riadha Tanzania (RT), chini ya Mkufunzi anayetambuliwa na Shirikisho la Riadha la Kimataifa (IAAF), Dk. Hamad Ndee.

Mandoo, aliwasisitiza walimu hao wakimaliza mafunzo hayo, wakawafundishe wanafunzi wasiopungua 350 kila mmoja ili kuweza kuinua vipaji vyao na kupunguza au kuondoa kabisa utoro shuleni.

Kwa upande wake Mkufunzi Maguzu, alisema hadi sasa amefundisha jumla ya Walimu 716 katika Halmashauri mbalimbali nchini tangu ahitimu mafunzo hayo.

“Hadi sasa nimefundisha jumla ya Walimu 716 katika Halmashauri mbalimbali nchini, hivyo kila mmoja akifundisha Wanafunzi 350, idadi ya Wanafunzi watakaokuwa wamefundishwa Kid's Athletics ni 250,600 hivyo ni jambo la kushukuru,” alisema Maguzu na kuongeza.

Lengo langu ni kufikisha kwanza mafunzo haya kwa Walimu 1,000, hivyo naomba Shirikisho la Riadha Tanzania (RT), Wadau na wadhamini mbalimbali wazidi kuniunga mkono ili kuendelea kutoa utaalamu kwa walimu, ambao ndio chachu ya kuibua na kuendeleza vipaji mbalimbali vya michezo kwa watoto.