Mult Choice yatangaza fursa kwa wadau wa filamu Afrika

NA FRANCIS  DANDE

MULTCHOICE  Tanzania imetangaza fursa ya kipekee kwa wadau wa tasnia ya filamu Tanzania na barani Afrika ijulikanayo kama MultiChoice Talent Factory Portal iliyodhamiria kuleta mapinduzi ya hali ya juu katika uandaaji wa filamu zenye viwango vya Kimataifa.

Akizungumza wakati wa uzinduzi wa programu hiyo, Mkuu wa Kitengo cha Uhusiano wa MultiChoice Tanzania, Johnson Mshana alisema programu hiyo ni muendelezo wa program maalum iliyodhamiria kuleta mabadiliko katika tasnia ya filamu barani Afrika.

“MultiChoice Talent Factory ambayo ni program mama ilizinduliwa rasmi Mei mwaka jana na imedhamiria kuleta mabadiliko chanya kwenye tasnia ya filamu hapa nyumbani Tanzania na Afrika kwa ujumla. Tulianza kwa kupeleka vijana wanne katika kambi maalum ya mafunzo ya uandaaji filamu katika akademia maalum Nairobi Kenya, kisha mafunzo maalum kwa magwiji wa sauti yaliyofanyika Januari mwaka huu na hatimaye leo hii tumekuja tena na platform maalum yenye dhamira ile ile ya kuleta mapinduzi katika tasnia ya filamu barani Afrika,” alisema Mshana.

Katibu Mtendaji wa Bodi ya Filamu Tanzania, Joyce Fisoo anaishukuru MultiChoice kwani imekuwa mstari wa mbele kuleta mapinduzi kwenye filamu hapa nyumbani Tanzania.  alishuhudia uzinduzi wa programu ya MultiChoice Talent Factory mapema mwaka jana kule mjini Dodoma na leo hii tunazindua tena sehemu nyingine ya programu hiyo hiyo.

Fisoo alisema hakika ni fursa ya kipekee na ninapenda kuchukua nafasi hii kuwahamasisha wadau wote waliopo katika Tasnia yetu kuitumia nafasi hii ipasavyo ili kuweza kujifunza, kubadilishana ujuzi na hatimaye kupata kazi zenye maudhui ya hali ya juu kutoka hapa hapa Afrika.

Naye Ofisa Uhusiano wa MultiChoice Tanzania, Grace Mgaya alimalizia kwa kueleza kuwa ukurasa huu ni wa wazi kwa watu wote hususani wadau wa filamu waliopo hapa nchini na Afrika kwa ujumla.