Total Yatoa Sh. Mil. 65 kwa Vijana Wakitanzania

NA MWANDISHI WETU

KAMPUNI ya Total Tanzania Limited, imetoa Sh. Mil. 65 kwa vijana wa Kitanzania watatu baada ya kuibuka washindi wa shindano la kuandika mradi wa kijasiriamali lilizoanza Oktoba mwaka 2018.

Hayo yamesemwa na Mkurugenzi Mkuu wa Total Tanzania Ltd, Tarik Moufaddal wakati akitoa taarifa kwa mgeni rasmi Naibu Waziri wa Kazi, Ajira na Vijana, Anthony Mavunde katika hafla ya kuwazawadia washindi fedha hizo iliyofanyika jijini Dar es Salaam.

Mkurugenzi huyo alisema ili kupatikana kwa washindi hao watatu walipokea zaidi ya maandiko 600 ya miradi ya ujasiriamali ambapo majaji walipitia na kubakiza 100, 15 hadi watatu ambao wametangazwa jana.

Moufaddal alisema mwitikio ulioneshwa na vijana katika shindano hilo kijasiriamali umewapa mwamko wa kuendelea nalo kwa miaka ijayo.

"Mradi wa shindano la kijasiriamali umekuwa na manufaa ambapo zaidi ya maombi 600 yalipokelewa na jana tumepata washindi watatu ambapo wamefanikiwa kupata shilingi milioni 65," alisema.

Mkurugenzi huyo alisema  mshindi kwanza ni Doreen Noni ambaye amepata Sh.Mil  30, Sai Michale mshindi wa pili Sh.Mil 20 na Prince Tilya mshindi wa tatu Sh.Mil.15.

Kwa upande wake Mkurugenzi wa Sheria na Mahusiano Total Tanzania Marsha Msuya alisema Sh.Mil 200 zimetumika kufanikisha shindano hilo.

Alisema pamoja na washindi kupatikana bado Total Tanzania Ltd itatumia zaidi ya milioni 20 kwa ajili ya kugharamia mafunzo kwa kipindi cha miezi mitatu kwa washindi.

"Sisi tumejipanga kushirikiana na Serikaki katika kuinua jamii ya Watanzania na shindano hili ni sehemu ya mchango wetu kwa jamii kwani tumesaidia ujenzi wa madarasa, vyoo na kutoa elimu ya usalama barabarani," alisema.

Akizungumzia shindano hilo la kijasiriamali, Naibu Waziri Mavunde alisema ni la kuigwa na wadau wengine ili kuounguza adha ya ukosefu wa ajira.

Mavunde alisema Watanzania wengi wanahitaji ajira na kujiajiri hivyo walichofanya Total ni jambo zuri la kuigwa na kuendelezwa.

"Tafiti zinaonesha zaidi ya Watanzania milioni 22.3 wanaweza kufanya kazi ambapo wengi ni kundi la miaka 15 na kuendelea.

Tafiti hiyo inaonesha katika idadi hiyo wenye ujuzi wa juu ni asilimia 3.6, 16.9 ujuzi wa kati na 79.6 ujuzi wa chini hivyo bado elimu ya ujuzi inahitajika," alisema.

Naibu Waziri alisema serikali imejipanga kikamilifu kutoa elimu ya ujuzi kwa Watanzania milioni 4.4 ifikapo 2021 huku malengo makubwa yakielekezwa kwa vijana.

Alisema pia serikali imejipanga kufikia wananchi 18,500 katika mikoa 12 kuwapatia elimu ya kilimo kitalu nyumba ili kuongeza ajira.

Mavunde alisema atahakikisha washiriki waliofika 15 bora mawazo yao yanachukuliwa na kuendeleza na kuipongeza Total Tanzania Ltd kwa uthubutu waliouonesha kuwezesha vijana.

Mshindi wa kwanza Noni ambaye aliwasilisha wazo la kijasiriamali lenye lengo la kuelkmisha jamii namna ya kukabiliana na msongo wa mawazo alisema atatumia fedha hizo kubadilisha jamii ya kitanzani kwa kuilimisha.

Alisema vijana wengi wanakabiliana na changamoto ila wamekosa watu wa karibu wa kujadiliana nao namna ya kupambana na hali hiyo