WATENDAJI WA USHIRIKA NCHI WAONYWA KUTOA POSHO ZA WAJUMBE WAKATI WA MADA ZINAPOKUWA ZIKIWASILISHWA KWENYE MIKUTANO

Kaimu Naibu Mrajisi Udhibiti wa Tume ya Maendeleo ya Ushirika Collins Nyakunga akitoa mada jana kwenye mkutano wa 26 Chama Kikuu cha Wakulima wa Tumbaku Kanda ya Magharibi (WETCU) ulifanyika mjini Tabora.

 

NA TIGANYA VINCENT 

Tume ya Maendeleo ya Ushirika imewaonya watendaji na viongozi wa Vyama vya Ushirika nchini kuacha tabia ya utoaji wa posho kwa wajumbe wake kipindi cha uwasilishaji wa taarifa ya mapato na matumizi ili kuwafanya waache kusikiliza kinachowasilishwa.

Kauli hiyo imetolewa jana mjini Tabora na Kaimu Naibu Mrajis Udhibiti wa Tume ya Maendeleo ya Ushirika Collins Nyakunga wakati wa Mkutano wa 26 wa Chama Kikuu cha Wakulima wa Tumbaku Kanda ya Magharibi (WETCU).

Alisema baadhi ya viongozi na watendaji wamekuwa wakitumia kipindi ambacho taarifa ya mapato na matumizi inawasilisha kulipa posho kwa wajumbe ili kuwafanya wasisikilize kwa umakini na hatimaye wasiwe na muda wa kuhoji sehemu zenye mapungufu na dosari.

Nyakunga alisema utoaji wa posho za wajumbe na wageni waalikwa hazipaswi kuingilia na uwasilishaji wa taarifa zozote kwa kuwa kufanya hivyo kunaonyesha viongozi na watendaji kuna kitu wanaficha.

Aidha aliwataka wajumbe wanapokuwa kwenye Mkutano ni vema wakasikiliza kwa makini na pindi wanapoona sehemu kuna mapungufu wawe huru kuhoji kwa ajili ya kuujenga ushirika ulio imara badala ya kuacha mapungufu yaendelee bila kuchukua hatua hali inayoweza kuudhofisha ushirika wao.

Akisoma hotuba ya mgeni rasmi, Katibu Tawala Msaidizi Mkoa wa Tabora Raphael Nyanda alivitaka vyama vyote vya Ushirika kuhakikisha vinafunga vitabu vya hesabu ndani ya miezi mitatu baada yam waka wa fedha kuisha na kuviwasilisha kwa Mkaguzi wa Nje.

Alisema baada ya ukaguzi matokeo yake yasomwe katika Mkutano Mkuu wa Ushirika ili wajumbe wafahamu mwenendo mzima wa Ushirika kwa ajili ya kuchukua hatua kama wanaona viongozi wao wanawapeleka pabaya.