WANACHAMA WA WETCU WATAKIWA KUCHAGUA VIONGOZI WAADILIFU AMBAO HAWATAGUEZA USHIRIKA KICHAKA YA KUJIPATIA FEDHA

NA TIGANYA VINCENT

SERIKALI ya Mkoa wa Tabora imewaonya wanachama wa Chama Kikuu cha Wakulima wa Tumbaku Kanda ya Magharibi (WETCU) kutochangua viongozi wenye historia wizi , ubadhilifu na wenye matendo ambayo ni kinyume cha Sheria za Nchi kwa kuwa haitasita kuwaondoa kama watawachagua.

Kauli hiyo imetolewa jana mjini Tabora na Mkuu wa Mkoa wa Tabora Aggrey Mwanri katika hotuba yake iliyosomwa na Katibu Tawala Msaidizi Raphael Nyanda wakati wa Mkutano wa 26 wa WETCU ambao pamoja na ajenda nyingine ni uchaguzi wa viongozi.

Alisema viongozi wanaotakiwa ni wale waadilifu na waaminifu na wenye maono ya kuwaletea wanachama maendeleo na kuweka maslahi ya wanachama mbele badala ya kufikiria maslahi binafsi ili kuinua ushirika nchini.

Mwanri alisema baadhi ya wanachama wanaomba kuchaguliwa kwa ajili ya maslahi binafsi na kutaka kugeuza Ushirika kuwa maficho ya kuwanyonya wakulima na kuwafanya washindwe kuendelea.

“Mwanachama wa ushirika anayetaka kugombea lazima ajipime kama yuko safi na mwadilifu  na sio kibaka mzoefu ndio aombe kuchaguliwa kuwaongoza wenzake” alisema.

Mwanri aliwataka wanachama kuwaondoa mara moja watu wanaofanya ujanja ujanja kwa ajili ya kutaka kujiingiza katika uongozi wa ushirika kwa nia ya kuwanyonya wakulima kabla mambo hajaharibika.

Naye Kaimu Naibu Mrajis Udhibiti wa Tume ya Maendeleo ya Ushirika Collins Nyakunga alisema kuwa endapo wanachama watafanya makosa ya kuchagua viongozi wowote kwa ushawishi wa fedha , Ofisi ya Mrajis haitasita kuwaondoa.

Aliongeza kiongozi atakayebainika kuingia madarakani kwa kutumia fedha ataondolewa madarakani hata kama ameshachaguliwa na hatua nyingine za kisheria zitachukuliwa dhidi yake.

Nyakunga alisema mtu anayetafuta uongozi katika Ushirika lazima awe ni yule ambaye yuko tayari kuwasidia wanaushirika kusonga mbele na kujiletea maendeleo na sio kuwadidimiza.