DC UYUI AAGIZA KUKAMATWA KWA WADAI WA MILIONI 53 ZA MBEGU ZA PAMBA ZA MSIMU ULIOPITA

NA TIGANYA VINCENT

MKUU wa Wilaya ya Uyui, Gift Msuya, amewaagiza Watendaji wa Vijiji kushirikiana na Jeshi la Akiba(Mgambo) kuwakamata wakulima wote ambao hawakulima zao hilo licha ya kuchukua mbegu na dawa za kuua wadudu waharibifu wa pamba msimu uliopita.

Aliagiza kuchukua hatua hiyo baada ya wakulima hao kushindwa kulima pamba na wengine kutorosha pamba na kwenda kuuzia maeneo mengine jambo ambalo limesababisha kushindwa kulipa deni lao la shilingi milioni 53 wanazodaiwa na Kampuni za Kahama Cotton Company Limited na Kahama Oil Mill wiki hii.

Msuya alitoa kauli hiyo jana wakati wa ziara ya Mkuu wa Mkoa wa Tabora Aggrey Mwanri kwenye kampeni yake ya kuhamasisha kilimo ikiwemo cha pamba katika Kijiji cha Migungumalo.

Alisema alisema deni hilo wanaodaiwa wakulima limesababisha Kampuni hizo kukataa kulipa deni la ushuru wa Halmashauri ya Wilaya ya Tabora wanaodaiwa wa shilingi milioni 46 zinazotokana na mauzo ya kilo milioni 1.2 za msimu uliopita.

Msuya alisema uchelewashaji wa fedha hizo kutoka Kampuni hizo kwa ajili ya ushuru wa Halmashauri umesababisha kukwamisha baadhi ya shughuli za maendeleo ikiwemo za ujenzi wa vyumba vya madarasa.

Kwa upande wa Mkuu wa Mkoa wa Tabora Aggrey Mwanri amemuagiza Afisa Ushirika kuorodhesha wakulima wote wanaodaiwa na kukabidhi majina ya wakulima hao ambao hawataki kulipa ili hatua zichukuliwe dhidi yao.

Alisema haiwezekani mkulima achukue mbegu bila kupanda na kuacha bila kudaiwa na kuongeza kuwa ni vema ikiwezekana kwa yule mwenye mifugo ataoa ili kulipa deni.

Katika hatua nyingine Mkuu huyo wa Wilaya alisema kwa mujibu wa Sheria ndogo ndogo za Halmashauri ya Wilaya ya Tabaora kila kaya ni lazima ilime ekari tatu za mazao ya chakula na ekari tatu za mazao ya chakula.

Alisema asie tekeleza jambo hilo anavunja Sheria na hatua kali dhidi yake zitachukuliwa.