MWANAMKE ADAI FIDIA YA ZAIDI YA BILIONI 1.5 HOSPITALI YA KAIRUKI

 Na Mwandishi Wetu

Mwanamke Florah Lengwana, amefungua shauri la madai katika Mahakama Kuu jijini Dar es Salaam dhidi ya Hospitali ya Kairuki na Daktari George Chugulu, akidai zaidi ya billioni 1.5 za kitanzania kama fidia kwa madai ya uzembe na uharibifu uliosababishwa wakati akipatiwa matibabu mwaka 2018 na 2019.

Katika shauri hilo, mwanamke huyo anataka kulipwa 800m/- kama fidia ya uharibifu uliosababishwa, 80m/- kama malipo ya adhabu, 700m / - kama uharibifu wa jumla na amri zingine kwamba hospitali hiyo na daktari walikuwa wazembe, hivyo kumsababishia madhara.

Bibi Lengwana, ambaye ni mlalamikaji, anaishutumu hospitali hiyo na daktari wake, ambao kwa pamoja ni walalamikiwa, kwa uzembe ambao ulisababisha madhara makubwa yasiyorekebishika ambayo yalisababisha kuondolewa kwa kizazi, hivyo kupoteza tena tumaini au nafasi yoyote ya kushika mimba au kuzaa watoto.

Shauri hilo liko mbele ya Jaji Lilian Itemba na limepangwa kusikilizwa Octoba 21, mwaka huu mara baada ya pande mbili zinazohusika kushindwa kufikia makubaliano kwa njia ya usuluhishi.

Inaelezwa katika hati ya madai kuwa Julai 2, 2018, wakati hakuwa mgonjwa au kusikia maumivu yoyote, mlalamikaji alikwenda hospitalini kwa madhumuni ya kufanya "Paps Mear", uchunguzi wa saratani ya kizazi, ambayo hapo awali alikuwa akifanya kawaida kila baada ya miaka mitatu.

Alipofika kwenye mapokezi ya hospitali hiyo na baada ya kusajiliwa, mlalamikaji alishauriwa kuwa kabla ya kufanyiwa uchunguzi wa Paps Mear lazima kwanza amuone Daktari wa magonjwa ya wanawake, ambaye alikuwa Dk Chugulu kwa kujaza fomu za NHIF ili aweze kuhudumiwa.

Inaelezwa kuwa Mlalamikaji alimweleza (Dk. Chugulu) historia fupi ya kiafya ambaye naye aliagiza afanye vipimo vingine kadhaa, pamoja na Hysterosalpingography (HSG). Suala la uchunguzi wa Paps Mear halikushughulikiwa.

Badala yake, aliendelea kusema, Dk Chugulu alimshauri mlalamikaji huyo afanye vipimo vya utasa kabla ya kuruhusiwa kufanya uchunguzi wa Paps Mear. Anadai mama huyo kuwa ushauri wa daktari na jinsi alivyoshughulikia swala lake ulijaa uzembe na usiokubalika.

Hata hivyo, walalamikiwa wote kwa pamoja wamekanusha vikali madai hayo mazito katika hati yao ya pamoja ya utetezi na wanamtaka mlalamikaji huyo athibitishe madai hayo. Kwa kuongezea t, Daktari Chugulu anapinga kuwa na uhusiano wowote na Hospitali ya Kairuki.

Walalamikiwa wanasema kuwa mlalamikaji alifika hospitalini Julai 2, 2018, akitaka ushauri wa daktari kuhusu malalamiko yake yanayohusiana na kutokuwa na ujauzito kwa zaidi ya miaka sita tangu amzae mtoto wake wa pekee aliyezaliwa baada ya kufanyiwa matibabu tofauti katika hospitali kadhaa.

Wanaeleza kuwa baada ya kuelezea maisha yake na historia ya matibabu, Daktari Chugulu alishauri kufanya vipimo alivyofanyiwa mlalamikaji, ambavyo vilikuwa muhimu kujua sababu ya shida zake na hatua inayowezekana ya kusaidia katika kutatua shida hiyo.

Walalamikiwa wanasema kuwa hakukuwa na uzembe au kitu chochote kibaya kwa ushauri uliopewa mlalamikaji, ushauri ambao aliukubali kwa yeye kusaini Fomu za NHIF na kuonesha utayari wa kufanyiwa vipimo vya matibabu katika maabara na idara ya Radiolojia ya hospitali hiyo.