BAADA YA FISTULA, WAZIRI MKUU AITAKA NMB KUGEUKIA MAGONJWA MENGINE

 

Waziri Mkuu Kassim Majaliwa pamoja na Afisa Mtendaji Mkuu wa NMB, Ruth Zaipuna (kulia) wakimkabidhi Afisa Mtendaji Mkuu wa hospitali ya CCBRT, Brenda Msangi mfano wa hundi yenye thamani ya Sh. Mil. 600 wakati wa mbio za hisani za NMB Marathon 2022 ‘Mwendo wa Upendo’ kwa ajili ya kusaidia matibabu ya akinamama wenye Fistula wanaotibiwa katika hospitali ya CCBRT. Mbio ziliandaliwa na Benki ya NMB zilianzia na kuishia kwenye viwanja vya Leaders Kinondoni jijini Dar es Salaam, mwishoni mwa wiki. Kushoto ni Mwenyekiti wa Bodi ya NMB, Dk. Edwin Mhede. (NA MPIGA PICHA WETU).

Waziri Mkuu Kassim Majaliwa (katikati) akiongoza mbio hisani za NMB Marathon 2022 ‘Mwendo wa Upendo’ zilizoanzia na kuishia kwenye viwanja vya Leaders Kinondoni jijini Dar es Salaam. Mbio hizo zilizoandaliwa na Benki ya NMB, zililenga kukusanya kiasi cha Sh. Mil. 600 za kusaidia matibabu ya akinamama wenye Fistula wanaotibiwa katika hospitali ya CCBRT. Kulia ni Afisa Mtendaji Mkuu wa NMB, Ruth Zaipuna na wa pili kulia ni Mwenyekiti wa Bodi ya NMB, Dk. Edwin Mhede. 

Mwenyekiti wa Bodi ya NMB, Dk. Edwin Mhede (kulia), akimvisha medali Waziri Mkuu Kassim Majaliwa wakati wa mbio za hisani za NMB Marathon 2022 ‘Mwendo wa Upendo’ zilizoanzia na kuishia kwenye viwanja vya Leaders Kinondoni jijini Dar es Salaam, mwishoni mwa wiki. Mbio hizo ziliandaliwa na Benki ya NMB kwa ajili ya kusaidia matibabu ya akinamama wenye Fistula wanaotibiwa katika hospitali ya CCBRT. Katikati ni Afisa Mtendaji Mkuu wa NMB, Ruth Zaipuna.

 

 Na Mwandishi Wetu

WAZIRI Mkuu Kassim Majaliwa, ameiomba Bodi ya Wakurugenzi ya Benki ya NMB chini ya Mwenyekiti wa Bodi, Dk. Edwin Mhede na Menejimenti ya benki hiyo chini ya Afisa Mtendaji Mkuu Ruth Zaipuna, kuendeleza Mbio za Hisani za NMB Marathon licha ya kuvuka lengo la kukusanya Sh. Bil. 1 katika kipindi cha miaka miwili.

NMB Marathon zilianzishwa mwaka jana 2021, lengo likiwa kukusanya Sh. Bil. 1 katika kipindi cha miaka minne (sawa na Sh. Mil. 250 kila mwaka), lakini mwitikio chanya ukawezesha kukusanya Sh. Mil. 400 mwaka jana na kisha Mil. 600 mwaka huu na kufikia lengo ndani ya miaka miwili.

Akizungumza wakati wa kutoa shukrani kwa waandaaji, wadhamini na washiriki, mwishoni mwa mbio hizo katika viwanja vya Leaders Club, Kinondoni jijini Dar es Salaam Jumamosi Oktoba Mosi, Waziri Mkuu Majaliwa alisema baada ya kuvuka lengo hilo, ni wakati sahihi sasa makusanyo yatokanayo na mbio yakaelekezwa kwingine.

“Niipongeze Bodi ya Wakurugenzi NMB chini ya Mwenyekiti, Dk. Edwin Mhede na Menejimenti ya benki hii chini ya Afisa Mtendaji Mkuu, Ruth Zaipuna kwa uratibu wa jambo hili zuri.

“Wito wangu kwa NMB, malengo yalikuwa kukusanya fedha za fistula kiasi cha Sh. Bil. 1 katika kipindi cha miaka minne, bahati nzuri tumefikia lengo ndani ya miaka miwili, niwasihi endeleeni kutafuta maeneo mengine ya kusaidia kama vile magonjwa ya saratani.

“Mwakani mbio hizi ziwepo na miaka ijayo ziwepo pia, makusanyo yakasaidie changamoto zingine. Pia kuwe na mbio endelevu, kwa ajili ya sio tu kukusanya fedha za kusaidia matibabu, bali pia liwe jukwaa la mazoezi ambayo ni mhimili wa afya  ya kila Mtanzania katika ujezni wa taifa,” alibainisha.

Waziri Mkuu Majaliwa, alikiri kuvutiwa na ubunifu wa NMB uliozaa Mbio za Hisani za NMB Marathon, huku akizipongeza Kampuni za Bima za Sanlam na UAP, kwa udhamini mnono uliowezesha kuvuka lengo la makusanyo ya kusaidia matibabu ya kinamama wenye Fistula nchini.

“Shukrani pia kwa wadhamini walioamua kuiunga mkono NMB wakiongozwa na Kampuni ya Sanlam na UAP, ambao wameota kiasi kikubwa zaidi, Sanlam Sh. Mil. 150 na UAP Sh. Mil. 100. Kwa kweli Sanlam, UAP na wadhamini wengineo tunawashukuru, kama tunavyowashuku wakimbiaji wote.

“Niwasihi wakimbiaji, wadhamini, waandaaji NMB na CCBRT, tuendeleze ‘Mwendo wa Upendo,’ tusichoke kuchangia, kwani wahenga walisema kutoa ni moyo. Pamoja na jitihada kubwa za Serikali katika kuboresha mazingira na miundombinu ya afya, bado inahitaji uungwaji mkono na Watazania na wote,” alisema.

Kwa upande wake, Afisa Mtendaji Mkuu wa NMB, Ruth Zaipuna, alisema ukubwa wa tatizo la Fistula nchini, ambako kuna wagonjwa takribani 10,000, ambao wanaongezeka kwa mwaka wagonjwa 3,000, huku wanaotibiwa wakiwa ni 1,300 pekee, uliwasukuma kujitoa kusiadia eneo hilo la jamii.

Alimshukuru Waziri Mkuu Majaliwa kwa kukubali kuwa sehemu ya walioshiriki tukio hilo, lililofanyika chini ya kaulimbiu ya Mwendo wa Upendo, uliolenga kurejesha tabasamu usoni mwa kinamama wasio na uwezo wa kumudu gharama za matibabu ya Fistula yanayofikia takribani Sh. Mil. 4.

“Kiasi cha Sh. Bil. 1 tulichokusanya katika miaka miwili hii badala ya minne, kinaenda kugharamia matibabu ya fistula kwa zaidi ya wanawake 250 kwenye Hospitali ya CCBRT.

“Wanawake 10,000 wana Fistula kote nchini na kuna ongezeko la watu 3,000 kila mwaka, wakati wanaotibiwa ni takribani kinamama 1,300 tu. Kwahiyo tukaona umuhimu wa kuongeza nguvu ya makusanyo ili kusaisdia zaidi, kwani Mil. 4, ni kiasi kikubwa mno kwa Mtanzania wa kawaida kumudu kugharamia matibabu.

“Hii ndio siri iliyotusukuma kuona umuhimu wa kuharakisha zaidi, kwani wagonjwa wapo wengi na wana uhitaji, ambao haupaswi kusubiri miaka minne. Leo tumekamilisha lengo kwa miaka miwili, tunawashukuru Watanzania waliojitoa kusaidia kulikomboa kundi la kinamama wasiojiweza pale CCBRT,” alisisitiza.

Kwa nyakati tofauti, Mkurugenzi Mtendaji wa Kampuni ya Sanlam, Julius Magabe na Mkurugenzi Mtendaji wa UAP, Donard Muthem aliyewakilishwa na Aulerio Kimario, walifichua kwamba afya ya jamii ni miongoni mwa vipaumbele vyao kama taasisi kongwe za Bima na kwamba ndio siri ya udhamini wao mnono.