Hakielimu yatoa Tamko Adhabu iliyosababisha Kifo cha Mwanafunzi Mwanza, yaiomba Serikali Kiswahili kitumike Kufundishia

Na Hussein Ndubikile, Dar es Salaam

Taasisi ya Hakielimu imeiomba Serikali kurejea upya  mapendekezo yanayotolewa na wadau wa elimu  kuhusu matumizi ya Lugha ya kiswahili kama lugha ya kufundishia ngazi ya sekondari.

Rai hiyo imetolewa na Mkurugenzi Mtendaji wa taasisi hiyo Dkt. Jonh Kalage wakati akizungumza na wanahabari  jijini Dar es salaam kufuatia tukio la adhabu iliyopelekea kifo cha Mwanafunzi Gloria Faustine wa Kidato cha kwanza katika Shule ya Sekondari Mwinuko Manispaa ya Ilemela Mkoani Mwanza.

Amebainisha kuwa watoto wanaotoka shule za msingi na hasa za umma kuingia kidato cha  kwanza wanakua hawajawa tayari kuweza kutumia lugha ya kiingereza katika kuzungumza na kujifunzia hivyo kutumia kiswahili kama lugha ya kufundishia sekondari itatoa fursa kwa watoto kujifunza kwa ufasaha na kufundishwa vema kingereza na lugha nyingine kama lugha za kigeni.

Amesisitiza kuwa wanapendekeza dhana ya adhabu chanya kupewa mkazo katika mafunzo darasani na kazini kwa walimu ili kuwasaidia kuepukana na matumizi ya adhabu za kikatili akitolea mfano wakati wa mafunzo kwa vitendo kwa walimu utoaji wa adhabu unaweza kuwa moja ya eneo la tathmini.

" Hakielimu hatupingi kutumia lugha ya kingereza sekondari, bali tunapinga lugha hii ya kingereza kutumika kama lugha ya kufundishia, pia tunaendelea kusisitiza matumizi ya adhabu chanya na vichocheo chanya katika kuimarisha nidhamu na kujifunza,amesema Dkt Kalage.

Kwa upande wake, Mshauri  Mwelekezi wa Hakielimu Wilberforce Meena amesema.kwamba taasisi hiyo haipingi matumizi ya lugha ya kingereza katika shule za sekondari bali lugha hiyo iwe kama lugha ya kigeni kwa ajili ya mawasiliano huku  lugha ya kiswahili itumike kama lugha ya kufundishia.