MATHIS BOLLY: YOSO ALIYERITHISHWA JEZI YA DROGBA IVORY COAST

 Mathis Bolly, akiwajibika dimbani akiwa na jezi namba 11 ya nahodha wa Ivory Coast Didier Drogba. Hii ilikuwa ni mechi ya ushindi wa 3-0 iliyovuna Ivory Coast dhidi ya Gambia.

Bolly akiwa katika jezi namba 35 ya klabu yake ya Fortuna Düsseldorf inayoshiriki Ligi Kuu ya Ujerumani Bundesliga.

ABIDJAN, Ivory Coast

Kuelekea safari ya Ivory dhidi ya Gambia nah ii ya juzi dhidi Taifa Stars, kocha wa Ivory Coast, Sabri Lamouchi akatangaza kumpa Bolly jezi ya namba 11 ya kikosi chake, miezi michache tangu yoso huyo alipochagua kuichezea nchi hiyo na kuikacha ile ya Norway alikozaliwa

KUTEMWA kikosini kwa nahodha wa kikosi cha Tembo wa Ivory Coast kilichotua nchini kuivaa timu ya taifa ya Tanzania, kulizua maswali miongoni mwa wadau wa soka la Afrika kuwa nani ataitwa badala yake? Nani atavalishwa jezi yake (namba 11)?

Lakini pia je, beji ya unahodha ya Drogba atavaa nani? Karibia maswali yote yalipata majibu kufikia jana jioni wakati Stars iliposhuka ndani ya dimba la Taifa kuwavaa wageni wao hao Tembo wa Ivory Coast, naamini kila swali lilipata jibu muafaka.

Hapa tunamuangalia yoso Mathis Gazoa Kippersund Bolly ‘Mathis Bolly,’ kijana mwenye miaka 22 aliyeitwa kujaza nafasi ya Drogba kikosini, lakini heshima yake ikasogezwa mbele zaidi kwa kuvalishwa jezi namba 11 ya kikosi cha timu ya taifa ya Ivory Coast.

Mathias Bolly ni jina jipya katika soka la Afrika, ambaye ukiondoa kupangwa kama nyota wa akiba juzi dhidi ya Stars, mechi pekee kwa kinda hilo kuvaa jezi za Ivory Coast ilikuwa ya ushindi wa mabao 3-0 dhidi ya Gambia, mechi iliyopigwa Juni 8, siku ambayo Taifa Stars ililala 2-1 dhidi ya Morocco jijini Marrakech.

Kuelekea safari ya Ivory dhidi ya Gambia nah ii ya juzi dhidi Taifa Stars, kocha wa Ivory Coast, Sabri Lamouchi akatangaza kumpa Bolly jezi ya namba 11 ya kikosi chake, miezi michache tangu yoso huyo alipochagua kuichezea nchi hiyo na kuikacha ile ya Norway alikozaliwa.

Uamuzi tata uliozua utetezi kwa kocha Lamouchi

Kitendo Bolly kupewa jezi ya Drogba, kilizua shaka na wasiwasi miongoni mwa mashabiki wan chi hiyo, kwamba huenda kocha amehitimisha rasmi zama za mkali wao huyo kikosini kwa kumtema kiaina, lakini Lamouchi akafungua mdomo kujitetea.

Lamouchi anasema kuwa, hajafunga milango kwa Drogba, bali alilazimika kuigawa jezi hiyo kutokana na kanuni ya Fifa inayotaka nyota 23 kikosini kugawiwa jezi kuanzia namba moja hadi 23 bila kuiruka yoyote pasipo sababu ama idhini maalum.

“Watu hawapaswi kufikiria kwamba nimemtupa moja kwa moja nje ya kikosi mshambuliaji Drogba,” alijitetea Lamouchi.

“Nilichofanya ni kutekeleza sheria za soka chini ya Shirikisho la Soka Afrika (Caf) na lile la kimataifa Fifa kwa kuigawa kila jezi moja kwa kila mchezaji.

“Kuna wachezaji 23 kikosini ambao wanapaswa kuvaa kuanzia namba 1 hadi 23 na mtu anahitaji kuivaa hiyo jezi namba 11 wakati Drogba anapokuwa nje ya kikosi hiki kama ilivyotokea,” alifafanua Lamouchi katika mahojiano yake na Supersport.

Kuonesha hajamtema moja kwa moja, Lamouchi amemtaka Drogba kujiweka fiti kabla ya Agosti itakapokuwa ikijiandaa kwa mechi ya mwisho dhidi ya Morocco, ili kurejea kikosini na atavaa jezi yake namba 11 ‘aliyorithishwa’ Bolly kwa muda tu.

Mathias Bolly ni nani na ametokea wapi?

Mathis Gazoa Kippersund Bolly, ni Mu-Ivory Coast aliyezaliwa Novemba 14, 1990 nchini Norway na kuanzia maisha ya soka la utoto katika klabu ya vijana wadogo ya Holmlia iliyofungua milango ya kipaji chake katika idara ya kiungo wa kati.

Mwaka 2008 akiwa na umri wa miaka 18, Bolly akaihama akademi yake hiyo na kusajiliwa na mabingwa mara tano wa Ligi Kuu ya Norway, iitwayo Lillestrøm Sportsklubb, ambayo kwa sasa inatambulika kama  Tippeligaen inayoshirikisha timu 16.

Kuanzia hapo, akawa mhimili wa kikosi cha Lillestrøm hadi mapema mwaka huu, alipoihama klabu hiyo na kutua Fortuna Düsseldorf inayoshiriki Ligi Kuu ya Ujerumani Bundesliga. Uhamisho huo, ukahitimisha maisha yake Lillestrøm alikocheza mechi 60 na kufunga mabao saba.

Ni uhamisho uliombatana na uamuzi wa yoso huyo kukataa mwito wa kuichezea timu ya taifa ya Norway na kuchagua kuchezea Ivory Coast, kama kanuni na sheria za Fifa zinavyomruhusu.

Uamuzi huo ndio uliomsukuma Lamouchi kumjumuisha kikosini ili kupigania safari ya Ivory Coast nchini Brazil zinakofanyika fainali zijazo za Kombe la Dunia, kisha kumpa jezi ya nahodha Drogba aliyetemwa kwa sababu za majeruhi.

Je atadumu nayo huku akimudu kuitendea haki jezi hiyo? Ni suala la kusubiri na kungoja, lakini majibu ya awali yalipatikana kupitia alichokionesha katika mechi ya Ivory Coast dhidi ya Gambia Juni, ingawa alikalia benchi katika mechi dhidi ya Taifa Stars juzi.

WASIFU

JINA KAMILI: Mathis Gazoa Kippersund Bolly

KUZALIWA: Novemba 14, 1990

ALIKOZALIWA: Norway

KLABU YA SASA: Fortuna Düsseldorf

NAFASI DIMBANI: Kiungo

NAMBA YA JEZI: 35

Makala hii imeandaliwa na Salum Mkandemba kwa msaada wa mashirika ya habari

Barua pepe: mkandemba@yahoo.com

Simu namba: 0789 947 744