WATANZANIA WATAKIWA KUTUMIA FURSA YA CHAKULA

Mwenyekiti wa wabunge wa Bunge la Afrika Mashariki (EALA), Makongoro Nyerere, akizungumza na viongozi wa jumuiya za wafanyabiashara wa soko la Kariakoo jijini Dar es Salaam jana. Makongoro na baadhi ya wabunge hilo waliwahamasisha wafanyabiashara hao kuchangamkia furs za soko la Afrika Mashariki. (Picha na Said Powa)

NA NEEMA MWAMPAMBA

WABUNGE wa Bunge la Afrika Mashariki Tanzania wamewataka wafanyabiashara wa Tanzania kutumia fursa ya biashara ya mazao ya chakula kwani ndio nchi inayotegemewa katika jumuiya hiyo.

Hayo yalisemwa jjijini Dar es Salaam na Wabunge wa Jumuiya hiyo walipokutana na Wafanyabiashara wa soko la kariakoo ambalo ndio soko kuu linalozikutanisha nchi wanachama.

Wabunge hao walisema biashara ya mazao ya chakula ikitumiwa vyema na wafanyabiashara itasaidia kuleta ushindani kutokana na Tanzania  kuwa na ardhi kubwa yenye rutuba.

Mbunge Abdalah Mwinyi alisema nchi za afrika mashariki kwa asilimia kubwa zinategemea chakula kutoka Tanzania na kuwa hiyo ndio fursa pekee ambayo ikifanyiwa kazi itapunguza malalamiko kwa watu wanaozani ni wasindikizaji.

Alisema watanzania wengi wamekuwa wakilima chakula kwaajili ya kujikidhi wenyewe na kuwataka kubadilika kwa kufanya kilimo biashara. 

Alisema kwasasa Tanzania itakuwa mnufaikaji mkubwa katika chakula kwa kuhudumia  watu milioni 160 kutoka nchi sita za jumuiya ambapo kariakoo ndio kiini cha chakula.

“Sasa watanzania wanatakiwa kubadilika mlime kilimo kwa biashara,tunahudumia nchi zote tunajua soko lina ushindani mimi naamini kilimo kitatutoa”alisema Mwinyi.

Kwa upande wake meneja soko hilo Florens Seiya aliiomba serikali kufanyia marekebisho miundombinu katika soko hilo kwani ipo iliyokaa kwa zaidi ya miaka 42.

Alisema miundo mbinu ya umeme, maji safi na maji taka ni miongoni mwa vitu vinavyochangia wafanyabiashara katika soko hilo kufanya kazi katika mazingira magumu na kuiomba serikali kufanya marekebisho.