Pigo Futuhi, Karume Kenge afariki dunia

  NA SALUM    MKANDEMBA

MUIGIZAJI mahiri wa vichekesho wa Kundi la Futuhi, linalorusha michezo yao kupitia StarsTv, Dickson Pamba maarufu kwa jina la Karume Kenge (pichani), amefariki dunia leo alfajiri baada ya kuugua kwa muda mrefu.

Kwa mujibu wa muigizaji mwenzake wa Kundi la Futuhi, Sharobaro wa Kihaya, Karume Kenge amefariki dunia saa 10 alfajiri ya kuamkia Jumamosi Oktoba 27, wakati akipatiwa matibabu katika Hospitali ya Rufaa ya Bugando, Jijini Mwanza.

“Ni kweli Karume Kenge amefariki dunia alfajiri ya leo majira ya saa 10 katika Hospitali ya Rufaa ya Bugando, tayari mwili wa marehemu umehifadhiwa chumba cha maiti hospitalini hapo,” alisema Sharobaro.

Aliongeza kuwa, mipango ya mazishi inafanyika nyumbani kwao Nyegezi na kwamba hawajajua atazikwa lini kwa sasa, ingawa familia inafikiria kusafirisha mwili wa marehemu kwenda kuzikia kwao Ukerewe mkoani humo. 

Karume Kenge ni msanii wa pili wa Kundi la Futuhi kufariki dunia, baada ya Omary Dude ‘Mzee Dude,’ kufariki dunia jioni ya Januari 27 mwaka 2014, katika hospitali hiyo hiyo ya Bugando alikokimbizwa hapo siku moja kabla.

Mzee Dude alifariki dunia kutokana na maradhi ya figo na kutokana na kifo chake na hiki cha sasa cha Karume Kenge, inalifanya Kundi la Futuhi kubakiwa na wasanii Sharobao wa Kihaya, Brother K ‘Wa Kukurupuka’, Mama Njelekela, Gongalai, Mjaluo na Njelekela ‘Emoro’.