Singida United yashusha Waserbia

Mkurugenzi wa Singida United, Festo Sanga (katikati), akimtambulisha kocha mpya wa timu hiyo, Mserbia Dragan Popadic (kushoto), akiwa na msaidizi wake, Dusan Momcilovic. (Na Mpiga Picha Wetu).

NA MWANDISHI WETU

UONGOZI wa Singida United, umevunja benki kwa kuwasajili makocha wawili kutoka Serbia kwa ajili ya kuifundisha timu hiyo, ambayo msimu huu imekuwa haina makali sana.

Timu hiyo imemleta Dragan Popadic ambaye atakuwa Kocha Mkuu na kuamua kuja na Msaidizi wake, Dusan Momcilovic.

Singida United imemleta Popadic kuchukua mikoba ya Hemed Suleiman ‘Morocco’ ambaye ana majukumu ya kitaifa ya maandalizi ya timu ya Tanzania chini ya miaka 17, ‘Serengeti Boys’.

Popadic mwenye rekodi kubwa nchini alipokuwa akiwanoa mabingwa watetezi wa Ligi Kuu Tanzania Bara (TPL), Simba SC ameungana na miamba ya soka katikati ya nchi Singida United, kwa ajili ya kuongeza nguvu hususani kwa kipindi hiki cha kuelekea Sportpesa Cup, ASFC na Ligi Kuu.

Kwa mujibu wa Mkurugenzi wa Singida United, Festo Sanga, anasema wanaimani na makocha hao kuja kuleta mafanikio ndani ya kikosi hicho.

“Popadic atakuwa kocha mkuu wa timu akisaidiwa na Dusan ambaye pia ni raia wa Serbia, kwa kipindi cha mechi zaidi ya 10 Singida United imekuwa na matokeo yasiyoridhisha.

“Hivyo wamiliki wa timu hiyo wameamua kuwapa kazi Waserbia hao ili kurejesha makali ya kikosi hiki kilichofika fainali ya Kombe la Shirikisho (ASFC) msimu uliopita,” anasema.

Sanga anasema; “Makocha walikuwepo na kikosi tayari wameshapewa taaarifa na kukabidhiwa majukumu mengine ndani ya Singida United.”