NMB yaahidi neema kwa wachimbaji wadogo

Afisa Mkuu wa Wateja Wadogo na wa Kati, Filbert Mponzi kutoka NMB akizungumza na wachimbaji wadogo wa madini wa mkoa wa Geita, kwenye jukwaa la mtaji wa Maendeleo.

 Naibu Waziri wa Madini, Stanslaus Nyongo, akizungumza na wachimbaji wadogo wa madini wa Mkoa wa Geita, kwenye jukwaa la mtaji wa Maendeleo mkoani humo lililodhaminiwa na Benki ya NMB. (Na Mpiga Picha Wetu).

Na Mwandishi Wetu, GEITA 

 

BENKI ya NMB imeahidi  kutoa mikopo kwa wachimbaji wadogo zaidi ya 400 mkoani Geita.

Mkuu wa Kitengo cha Wateja Wakubwa wa NMB, Filbert Mponzi, alitoa kauli hiyo mwishoni mwa wiki katika Kongamano la siku tatu la Jukwaa la Mtaji na Maendeleo Geita lililoshirikisha wachimbaji wadogo zaidi ya 400.

Alisema hadi sasa benki imekopesha zaidi ya Sh. Bilioni 40 kwa Wafanyabiashara Wadogo na wa Kati (SME’s) na kuwa wachimbaji nao ni sehemu ya wanufaika hao.

Aliwataka wachimbaji hao kujenga tabia ya kufanya biashara zinazozingatia weledi wa kutunza kumbukumbu za fedha na kufungua akaunti za vikundi, ili kuweka hai nafasi ya kukopesheka katika taasisi za kifedha nchini kwa ustawi wa biashara zao na taifa kwa ujumla.

“Kwa sasa changamoto zinazokwaza wachimbaji ni ukosefu wa akaunti za benki za vikundi, ambazo zinaweza kuruhusu kukopesheka. Njia sahihi kwenu kwa sasa ni kuunda vikundi na kujirasimisha, ili kuweza kupata mikopo katika taasisi za kifedha.

“Tunaamini kuwa, iwapo mtaufanyia kazi ushauri wetu na elimu mliyopata hapa, mkaweka mfumo rasmi wa kukopesheka kwa mtu mmoja mmoja ama vikundi, tutawaptia mikopo. Tutaendelea kuelimisha wafanyabiashara ya madini, ili kuwaongezea chachu ya kuweka akiba na kukuza mitaji,” alisema Mponzi.

Akizungumza wakati wa kufunga kongamano hilo,  Naibu Waziri Madini, Stanislaus Nyongo, aliipongeza NMB, kuwa benki kinara katika kusaidia harakati za kijamii na kuwakaribisha Geita kuwaunga mkono wachimbaji wadogo.

Naye Mkuu wa Mkoa wa Geita, Injinia Gabriel Luhumbi, aliwataka washiriki waungane na kuunda vikundi imara vyenye uongozi makini unaotimiza wajibu kulingana na katiba za vikundi.

 “Muunganike, muwe na vikundi imara. Mara nyingi mikopo ya uwezeshaji inakuja kwa vikundi,” alisema.