Hatma mapendekezo 107 ya Mawaziri SADC leo

NA SULEIMAN MSUYA

 

HATMA ya mapendekezo 107 yaliyopendekezwa na Baraza la Mawaziri la Jumuiya ya Maendeleo Kusini mwa Afrika (SADC) itajulikana leo kupitia mkutano wa viongozi wakuu wa nchi 16 wanaokutana leo na kesho jijini Dar es Salaam.

Mapendekezo hayo watawasilishwa kwenye Mkutano wa 39 wa Wakuu wa Nchi na Serikali wa SADC utakaofanyika Agosti 17 na 18 jijini Dar es Salaam kwa uamuzi.

Nchi 16 zinazounda SADC ni Tanzania, Malawi, DRC Congo, Namibia, Angola, Afrika Kusini, Shelisheli, Mauritius, Comoro, Madagascar, Botswana, Eswatini, Zambia, Zimbabwe, Msumbiji na Lesotho.

Akizungumza na waandishi wa habari baada ya kumalizika kikao cha mawaziri, Mwenyekiti wa Baraza la Mawaziri la SADC, Profesa Palamagamba Kabudi alisema wao kama mawaziri wanawajibika kupeleka mapendekezo kwenye vikao vya wakuu wa nchi ili wafanye maamuzi.

Kabudi alisema baraza hilo limekutana kwa siku mbili ambapo lilifanya majadiliano mapana na kukubaliana kupeleka pamendekezo 107 mbele ya viongozi wakuu ili waweze kufanya maamuzi kwa mujibu wa utaratibu wa SADC.

“SADC ina mifumo yake ya kufanya kazi ambapo kamati zinakutana hatua kwa hatua hadi kufikia hatua ya Marais hivyo haya mapendekezo 107 tuliyoyapitisha yanasubiria uamuzi wa Marais wapitishe au wasipitishe,” alisema.

Kwa mujibu wa Kabudi mapendekezo hayo moja linahusu SADC kukubali lugha ya Kiswahili kuwa lugha rasmi ya nne ambayo inatumiwa na jumuiya hiyo katika vikao na mikutano.

Profesa Kabudi akizungumza kuhusu Kiswahili, aliwashukuru wajumbe wa baraza kuona Kiswahili kinafaa kupendekezwa kuwa lugha rasmi ya SADC na hatua hiyo inadhihirisha kuthamini mchango Baba wa Taifa la Tanzania, Mwalimu Julius Nyerere katika ukombozi wa nchi za kusini mwa Afrika.

Profesa Kabudi alisema Kiswahili kilitumika kama lugha ya ukombozi kwa wapigania uhuru, lakini pia kinatumika kwenye nchi nyingi ikiwamo Somalia, Uganda, Rwanda, Burundi, DRC, Kaskazini mwa Zambia na inafundishwa kwenye vyuo vikuu 53 duniani. 

Alisema Afrika Kusini inaanza kukifundisha katika shule za msingi na sekondari hivyo ni wazi kwa siku chache zijazo kitasambaa SADC nzima.

Alisema matarajio yake ni kuona Rais John Magufuli ambaye anatarajiwa kupokea kijiti cha Uenyekiti anahutumia kwa lugha ya Kiswahili iwapo viongozi wenzake wataridhia iwe lugha rasmi ya SADC.

Kuhusu biashara ndani ya SADC, alisema, “Nchi za jumuiya ziongeze biashara kati yao, kwani takwimu za biashara zinaonesha iko chini sana kwa asilimia 20. Maana yake asilimia 80 ya bidhaa zinatoka nje ya ukanda wetu. Tukiongeza biashara kati yetu tunaongeza uwezo wa kutengeneza ajira”.

Kabudi ambaye ni Waziri wa Mambo ya Nje na Ushirikiano wa Afrika Mashariki, alitaja mapendekezo mengine kuwa kuhusu miradi ya maendeleo, vijana, jinsia na mengine mengi.