Hukumu kesi ya kujeruhi Novemba 6

NA SULEIMAN MSUYA, MOROORO

MAAKAMA ya Mwanzo Mikongeni, wilayani Mvomero mkoani Morogoro Novemba 6 mwaka huu inatarajia kutoa hukumu ya kesi ya kujeruhi inayowakabili wafugaji watatu Sperwa Kishakwii (16), Kashuma Kishakwii (18) na Daniel Babalai (18) wanaodaiwa kuinigiza mifugo kwenye msitu wa hifadhi wa asili wa kijiji cha Kihondo,

 Kesi hiyo ilikuja mahakamani Oktoba 30 mwaka huu kwa ajili ya ushahidi wa upande wa wawalalamikiwa ambapo ushahidi wa pande zote mbili umekamilika ikiwemo ushahidi wa mpelelezi wa kesi hiyo uliotolewa na Askari polisi mwenye namba G 4290 DC Adonis wa Kituo cha Polisi Doma.

Akitoa ushahidi mahakamani hapo Mpelelezi wa kesi, alidai kuwa mnamo Oktoba 8 mwaka huu saa 11 jioni alipokea taarifa ya kuwepo kwa vurugu hizo kwenye kijiji cha Kihondo ambapo waliongozana na askari mwenzie DC- Juma hadi eneo la tukio na kukuta vurugu zikiwa zimekwisha.

Alidai waliamua kwenda eneo lililokuwa na watu wengi kijijini hapo na kubaini kuwepo kwa majeruhi wawili ambao  ni Emmanuel Willnely aliyejeruhiwa kwa kuvunjwa mguu wa kulia na Exavery Pius aliyejeruhiwa kichwani na mkono wa kushoto.

Alisema majeruhi hao walikimbizwa Zahanati ya kijiji kwa matibabu na kuhamishiwa Kituo cha Afya cha Kororo  ambapo baadae kupelekwa Hospitali ya Rufaa mkoani Morogoro kutokana na hali zao kutokuwa nzuri.

DC Adonis alidai mahakamani hapo kuwa baada ya majeruhi kupelekwa hospitali alirejea ofisi ya mtendaji wa kijiji na kabla hajafika alikutana na kundi la ng’ombe  179 ambao hawakuwa na mchungaji huku wakifanana na 12 waliokamatwa awali  ambapo alilazimika kuwaweka pamoja na kufikia jumla ya ng’ombe 191.

Aidha alidai kuwa washtakiwa hao watatu walifika polisi siku iliyofuata yaani Oktoba 10 mwaka huu na kutoa maelezo baada ya kuitwa kwa njia ya simu kupitia kwa wazazi wao kufuatia wao kukimbia na siku iliyofuata Oktoba 11 mwaka huu kesi yao ilifikishwa mahakamani.

Mashahidi upande wa utetezi akiwemo mzazi wa mshtakiwa namba 1 na 3, Kishakwii Kailanga (45) alidai mahakamani hapo kuwa, wachungaji wake wa ng’ombe wapo wawili ambao wote kwa pamoja walikwenda kuchunga siku ya tukio na kwamba alipowahoji kabla ya kwenda polisi wamefanya nini walipotoka kuchunga wadai hawakufanya chochote.

Aidha awali washtakiwa hao namba moja Sperwa Kishakwii (16) na mshtakiwa namba tatu Kashuma Kishakwii (18) walidai mahakamani hapo kuwa siku ya tukio hawakwenda kuchunga ng’ombe na badala yake walienda watoto wengine waliopo nyumbani kwao na kuwataja kwa majina moja moja kuwa ni Nuhu na    Leba. 

Mshtakiwa namba mbili Daniel Babalai (18) alidai mahakamani hapo kuwa siku ya tukio hakuwa mchungaji ambapo walichunga watoto wengine ambapo yeye aliitwa polisi kukagua ng’ombe wake waliopotea baada ya ng’ombe kukamatwa polisi na kisha kuwekwa rumande.

Awali ilidaiwa mahakamani hapo washtakiwa hao waliwajeruhi kwa fimbo na marungu askari wa kamati ya ulinzi wa msitu wa asili wa Kihondo uliopo kata ya Doma ambao ni Emmanuel na Exavery.

Hakimu wa Mahakama hiyo Mussa Lilingani alisema, amelazimika kuahirisha kesi hiyo ya kujeruhi namba 155/2019 hadi Novemba 6 mwaka huu itakapokuja kwa ajili ya hukumu na kwamba dhamana za washtakiwa zinaendelea kuwa wazi.