JAMII YATAKIWA KUHIFADHI MISITU

Maofisa Mawasiliano wa Wizara mbalimbali zinazohusika na rasilimali misitu wakiwa na maofisa wa Shirika Kuhifadhi Misitu Asili Tanzania (TFCG) baada ya kumaliza mkutano wao mkoani Morogoro.

NA SULEIMAN MSUYA, ALIYEKUWA MOROGORO

SERIKALI imeshauriwa kuhamasisha jamii kuhifadhi misitu ya vijiji ili miradi maendeleo inayohitaji maji kuwa endelevu.

Ushauri huo umetolewa na Meneja Mradi wa Kuleta Mageuzi katika Sekta ya Mkaa Tanzania (TTCS), Charles Leonard wakati wa mkutano wa siku moja wa maofisa Mawasiliano wa Wizara zinazohusiana na misitu uliofanyika mkoani Morogoro.

Leonard alisema  TTCS chini ya usimamizi wa Shirika la Kuhifadhi Misitu ya Asili Tanzania (TFGC), Mtandao wa Jamii wa Usimamizi wa Misitu Tanzania (Mjumita) na Shirika la Kuendeleza Nishati Asili Tanzania (TaTEDO), wamekuwa wakihamasisha uhifadhi endelevu wa misitu hivyo serikali inapaswa kuongeza nguvu.

Alisema mradi wa TTCS umeweza kushirikiana na wanavijiji wa vijiji 30 katika wilaya za Kilosa, Mvomero na Morogoro kuhifadhi misitu kwa mfumo endelevu na matokeo yake yamekuwa chanya.

Meneja huyo alisema miradi mikubwa kama ujenzi wa Mradi wa Kuzalisha Umeme wa Julius Nyerere (JNHPP) utaweza kuwa endelevu iwapo uhifadhi na utunzaji wa misitu hasa ya vijiji utakuwa endelevu na shiririkishi.

"Niseme wazi kuwa mradi kama JNHPP hauwezi kuwa endelevu iwapo misitu itaisha na njia ya kuifanya iwe endelevu ni serikali kushirikiana na sisi na wanavijiji ili kuitunza misitu ya vijiji ambayo ni asilimia 45 ya misitu yote kwa endelevu," alisema.

Leonard alisema mradi wa TTCS tangu kuanza kwake mwaka 2012 umewezesha kuingizia vijiji na wanavijiji zaidi ya Sh.Bil.3 na uhifadhi kuimarika.

Alisema mradi huo ambao unafikia ukomo mwezi Novemba mwaka huu umeweza kuboresha huduma za kijamii kama elimu, afya, miundombinu, kilimo na uchumi.

Akitoa mada katika mkutano huo Ofisa Uhusiano wa TFCG, Bettie Luwuge alisema wamekutana na maofisa kutoka Wizara ya Maliasili na Utalii, Ardhi, Nyumba na Maendeleo ya Makazi, Nishati, Mazingira, Kilimo, Ofisi ya Rais Tawala za Mikoa na Serikali za Mitaa 

(Tamisemi) na wadau mbalimbali ili kuwa na kauli moja kuhusu uhifadhi.

Luwuge alisema kupitia maofisa mawasiliano hao ni wazi jamii itapata taarifa kwa haraka kuhusu utunzaji na uhifadhi misitu kwa dhana ya uendelevu.

"Wananchi ndio mlinzi mkubwa katika utunzaji wa misitu hivyo inatakiwa kunufaika na rasilimali hiyo ili iweze kutunza kiundelevu," alisema.

Ofisa huyo aliwataka maofisa hao kutumia nafasi zao kuwashawishi viongozi wa wizara zao kuunga mkono jitihada hizo za uhifadhi endelevu.

Kwa upande wao maofisa mawasiliano Issa Sabuni, Jaina Msuya, Mathew Kwembe, Sophia Masuka, Rachel Lugoe walisema wadau hao wanapaswa kuungwa mkono kwa kuongeza juhudi za kutoa elimu.

Walisema mikakati ijikite kwenye utumiaji wa mitandao ya kijamii na vyombo vya habari vya vilivyopo vijijini kuelimisha jamii kuhusu dhana nzima ya utunzaji wa misitu.