NZEGA MJI TOKA JANUARI HADI MACHI IMETOA MIKOPO YA MILIONI 90 KWA VIKUNDI 42

Katibu Tawala Mkoa wa Tabora Msalika Makungu akitoa maelekezo ya Mkoa katika Baraza la Madiwani lilifanyika leo.

Na Tiganya Vincent

 

HALMASHAURI ya Mji wa Nzega hadi sasa imefanikiwa kutoa mikopo ya shilingi milioni 90 kwa vikundi mbalimbali. 

Kauli hiyo imetolewa jana na Mkurugenzi Mtendaji wa Halmashauri hiyo Philemon Magesa wakati wa kikao cha Baraza la Madiwani.

Alisema shilingi milioni 40 zimetolewa kwa vikundi 26 vya wanawake, shilingi milioni 33.6 wamekopeshwa vikundi 12 vya vijana na vikundi vinne vya watu wenye ulemavu wamekopeshwa shilingi milioni 16.

Magesa alisema vikundi vya wanawake na walemavu wamekuwa warejeshaji wazuri ukilinganisha na vikundi vya vijana.

Alisema hadi hivi sasa kwa kutumia Kitengo cha Sheria wanaendelea kuwafuatilia na kuwachukulia hatua wadaiwa wanaosumbua ikiwemo kuwafiksha katika vyombo vya sheria.

Magesa aliongeza kuwa katika kufuatilia madeni wamefanikiwa kurejesha shilingi milioni 17.7 ambapo kati ya hizo milioni 5.3 zimerejeshwa na vikundi vya vijana , milioni 9.3 zimerejeshwa na wanawake na milioni 3.1 zimerejeshwa na vikundi vya watu wenye ulemavu.

Kwa upande wa Katibu Tawala Mkoa wa Tabora Msalika Makungu ameipongeza Halmashauri ya Mji wa Nzega  kwa kuweza kutoa Mikopo ya Vikundi vya Wanawake, Vijana na wenye Ulemavu kwa asilimia 100. 

Aliutaka uongozi wa Halmashauri hiyo kuhakikisha wanawafuatilia wadaiwa kwa ajili ya  kurejesha fedha walizokopeshwa ili ziweze kusaidia vikundi vingine. 

Katika hatua nyingine Halmashauri ya Mji wa Nzega hadi sasa imefanikiwa kukusanya shilingi bilioni 1.2  ambayo ni sawa na asilimia 61 ya lengo la  shilingi bilioni 2.

Alisema hadi mwisho wa mwaka wa fedha huo wanatarajia kuviuka lengo la kitaifa.