JOWUTA yakubaliwa uanachama IFJ

Na Mwandishi Wetu

CHAMA cha Wafanyakazi wa Vyombo vya Habari Tanzania (JOWUTA) kimekubaliwa kuwa mwanachama wa Shirikisho la Kimataifa la Vyama vya Waandishi wa Habari (IFJ).

Maombi ya JOWUTA yalikubaliwa na IFJ katika kikao chake cha Kamati ya Utendaji  kilichofanyika Julai 9, 2020, jijini Brussels nchini Ubelgiji. 

IFJ inawakilisha waandishi wa Habari wapatao 600,000 katika nchi 140 duniani hivyo JUWUTA kupata uanachama ni hatua muhimu kwa waandishi wa habari nchini.

Kwa mujibu wa Mwenyekiti wa JOWUTA Claud Gwandu, chama hicho kiliwasilisha rasmi maombi ya kujiunga na IFJ mwishoni mwa Juni, 2020.

"JOWUTA inaamini katika mshikamano wa pamoja baina ya mwandishi wa habari mmoja, vyama vya waandishi wa habari na kampuni za habari kwa kuwa ndiyo njia sahihi ya kutatua changamoto zinazowakabili waandishi wa habari nchini na duniani kote," alisema.

Gwandu ameeleza kuwepo kwa faida kubwa kwa JOWUTA kujiunga IFJ kama taasisi na kwa mwanachama mmoja mmoja hasa kipindi hiki ambacho sekta ya habari duniani inakabiliwa na matatizo ambayo baadhi yake yanazuia waandishi wa habari kutimiza majukumu yao.

"Baadhi ya faida za JOWUTA kuwa mwanachama wa IFJ ni pamoja na wanachama wake kupata fursa za kushiriki katika mafunzo, semina na mikutano mbalimbali inayoandaliwa na shirikisho hilo moja kwa moja au kupitia ofisi yake ya Afrika yenye makao yake makuu jijini Dakar nchini Senegal.

“Katika kipindi hiki tunahitaji sana kuwajengea uwezo waandishi wanachama wetu na waandishi wa habari kwa ujumla katika maeneo mbalimbali, kama kuandika habari za uchaguzi kwa ufasaha, habari za maendeleo, sayansi na teknolojia na kama inavyofahamika kuwa elimu ni ghali, hivyo nafasi hii itasaidia kuongeza kasi ya kuwajengea  wanachama wetu," alisema Gwandu.

Katika barua yake, Katibu Mkuu wa IFJ Anthony Bellanger amesema shirikisho hilo linafurahi kuona JOWUTA inajiunga katika umoja wa vyama vya wafanyakazi vya waandishi wa habari na vyama vya habari duniani.

JOWUTA ilisajiliwa rasmi Julai 26, 2018, ambapo Novemba 30, 2019 ilifanikiwa kupata viongozi katika mkutano mkuu wa uchaguzi uliofanyika jijini Dodoma. 

Uchaguzi huo ulifanyika kwa mujibu wa Katiba ya chama hicho na sheria ya Ajira na Mahusiano Kazini ya mwaka 2006.

Kwa sasa JOWUTA ina wanachama zaidi ya 300 waliopo katika mikoa mbalimbali nchini, lakini pia tangu kusajiliwa kwake imefanikiwa kuendesha mafunzo ya Usalama na Usawa wa Kijinsia kwa waandishi wa habari wanawake 204 katika mikoa ya Dar es Salaam, Morogoro, Dodoma, Mbeya, Iringa, Arusha, Mwanza, Tabora na Tanga.