Waziri Mkuu mgeni rasmi Uzinduzi wa Vituo vya Huduma Pamoja Shirika la Posta

 

Waziri wa Mawasilano na Teknolojia ya Habari, Dkt. Faustine Ndungulile, akizungumza na Kaimu postamasta mkuu wa shirika hilo alipotembelea kaunta za vituo vya huduma ya pamoja.

Waziri wa Mawasiliano na Teknolojia ya Habari Dkt. Faustine Ndungulile akizungumza na wanahabari kuhusu kuelekea Uzinduzi wa Vituo vya Huduma ya Pamoja utakaofanyika Viwanja vya Posta Kuu Septemba 6 mwaka huu.

 

Na Hussein Ndubikile, Dar es Salaam

Waziri Mkuu Kassim Majaliwa anatarajiwa kuwa mgeni rasmi katika Uzinduzi wa Vituo vya Huduma Pamoja  (One Stop Service Centres) ndani ya Shirika la Posta Tanzania (TPC) utakaofanyika Septemba 6 mwaka huu  katika Viwanja vya Posta Kuu jijini Dar es Salaam

Hayo yamesemwa jijini Dar es Salaam na Waziri wa Mawasiliano na Teknolojia ya Habari Dkt. Faustine Ndungulile wakati akizungumza na wanahabari kuhusu huduma zitakazopatikana kwenye vituo hivyo pamoja na maboresho yaliyofanyika kwenye shirika hilo.

Amesema kuwa vituo hivyo vikizinduliwa itakuwa ni utekeleza wa Ilani ya Chama cha Mapinduzi (CCM) inayosisitiza utoaji huduma bora za posta kwa wananchi ambazo zitapunguza foleni katika taasisi za umma wakisubiri kupatiwa huduma.

" Tunaenda kuzindua huduma ya pamoja tunafanya hivi kutekeleza ilani ya CCM hatutaki wananchi wapange foleni tunataka wapate huduma bora bila hilo kutokea siku ya jumatatu Waziri Mkuu atazindua vituo katika Jengo la Posta," amesema Dkt. Ndungulile.

Amebainisha kuwa ndani ya vituo kutapatikana huduma za taasisi mbalimbali zikiwemo uhamiaji, usajili wa vizazi na vifo (RITA), usajili wa makampuni na majina ya biashara (BRELA), huduma za utambulisho wa namba za mlipa kodi (TIN), Vitambulisho vya Taifa (NIDA), Bima ya Afya (NHIF), halmashauri pamoja na huduma za wastaafu.

Amesisitiza kuwa vituo hivyo vitaanza katika mikoa ya Dar es Salaam na Dodoma na kwamba awamu ya kwanza itahusisha mikoa 10 ambayo ni Arusha, Kigoma, Mbeya, Zanzibar, Morogoro, Lindi na Tanga.

Ameongeza kuwa tayari zimetengwa Dola Mil 150 kwa ajili ya Mradi wa Tanzania ya Kidijitali na kwamba kuna fedha zitaingizwa katika uboreshaji vituo hivyo huku akikazia baadaye kutakuwa na dirisha moja litakalotoa huduma hizo.

Amefafanua kuwa ndani ya miezi tisa serikali imefanya maboresho mbambali ikiwemo kulilifua upya shirika hilo, kuanzisha posta ya kidijitali pamoja na biashara ya mtandao ambapo wajasiriamali 300 wamejisajili na kuunganishwa katika posta laki sita na kwamba mtu akijisajili anapata faida ya bidhaa zake kuonekana dunia nzima pamoja kutatua changamoto ya wizi wa mtandaoni.

Katika hatua nyingine Dkt. Ndungulile amesema shirika la posta limeendelea kutambulika duniani hivi karibuni baada ya kushinda nafasi mbili ikiwemo ya Baraza la Utawala na Uendeshaji huduma za posta zote zikitolewa na Shirika la Posta Duniani.

Dkt. Ndungulile amesema kampuni zote za simu zimepewa utaratibu wa kuwasiliana na wateja kwa kutumia namba 100 na si vinginevyo hivyo mteja atakayepigiwa tofauti na namba hiyo atoe taarifa ili hatua zichukuliwe.

Kwa upande wake Kaimu PostaMasta Mkuu wa shirika hilo, Macrice Mbodo amesema awamu ya kwanza ya vituo hivyo mwezi Disemba mwakani, awamu ya pili itahusisha kuunganisha mifumo ya taasisi katika dirisha moja itaanza Januari mwaka 2023 hadi Januari, 2024.

Amesema vituo 17 vitaongezwa katika awamu ya pili ikihusisha Mkoa wa Pwani, Iringa, Tabora, Kagera, Rukwa, Simiyu, Mtwara, Manyara, Songwe, Katavi, Njombe na Geita.

Pia amesema awamu ya tatu ya vituo hivyo itaanza mwezi Julai 2024 hadi 2025 na huduma zitahamishwa kutoka ngazi za wilaya hadi mikoa.

Aidha, amesema kuwa kupitia huduma mpya zilizoanzishwa ikiwemo duka mtandao shirika hilo linapata aslimia 3% na mwenye duka anapata asilimia 97% na kwamba huduma za posta kiganjani ambazo hutumia simu janja zimeingiza zaidi ya Sh bilioni 3.