GSM yaweka Sh Bilioni 2.1 udhamini mwenza Ligi Kuu Tanzania Bara, yataja sababu kuingia kudhamini

Makamu wa Kwanza wa Rais wa Shirikisho la Soka Tanzania (TFF), Athuman Nyamlani (Kulia) na Mkurugenzi wa Uwekezaji GSM Group, Mhandisi Hersi Said (kushoto) wakionyesha mfano wa hundi ya mkataba huo uliosainiwa leo jijini Dar es Salaam.

 

 Na Hussein Ndubikile, Dar es Salaam

Kampuni ya GSM Group, imeingia mkataba kwa miaka miwili na Ligi Kuu Tanzania Bara wenye thamani ya Sh 2.1 kuwa mdhamini mwenza wa ligi hiyo.

Mkataba huo umesainiwa leo jijini Dar es Salaam na Makamu wa Kwanza wa Rais wa  Shirikisho la Soka la Tanzania (TFF) Athumani Nyamlani pamoja na Mkurugenzi wa Uwekezaji wa kampuni hiyo Mhandisi,Hersi Said.

Akizungumza katika hafla ya utiaji saini mkataba huo Mkurugenzi wa Uwekezaji wa Kampuni hiyo, Mhandisi Hersi amesema kuwa utazinufaisha moja kwa moja timu zinazoshiriki Ligi kuu Bara.

" Kampuni ya GSM Group imeona kuna haja ya kuendelea kuisapoti tasnia ya mpira wa miguu hapa nchini kwa kuongeza nguvu udhamini wa ligi jambo hili litachochea ukubwa wa ligi yetu," amesema Mhandisi Hersi.

Amepongeza juhudi zinazofanywa na Bodi ya Ligi kwa kufaninikisha ligi kupiga hatua hivyo wadau wa soka wanatakiwa kuiunga mkono.

Amebainisha kuwa kampuni hiyo imeamua kuwa mdhamini mwenza kutokana na imani na uongozi wa sasa wa TFF huku akiongeza kuwa ana imani mkataba huo utakwenda vizuri.

Amesisitiza kuwa mkataba huo hauna mahusiano yoyote na klabu zilizozo chini ya udhamini wa kampuni hiyo na kufafanua hakutakuwa na upangaji wa matokeo bali umelenga uona kuondoa changamoto za kiuchumi ya timu zinazoshiriki.

Kwa upande wake, Makamu wa Kwanza wa Rais wa TFF, Nyamlani ameishukuru kampuni ya GSM Group kua mdhamini mwenza ambao wameufanya kwani una manufaa kwa timu zilizo ligi kuu kutatua changamoto mbalimbali na kwamba uongozi wa TFF umejipanga kutumia vyema fedha za wadhamini.

Pia amesema wadau wa soka wanatakiwa kuendelea kuiunga mkono kampuni hiyo ili iendelee kuisaipoti ligi hiyo pamoja na kuwaomba wadau wengine kujitokeza kuidhamini kwa kuiga mfano wa uwekezaji huo.