Mkojo wa Sungura kutumika kukufukuza wadudu shambani

NA TATU MOHAMED 

CHUO Kikuu cha Mzumbe kimekuja na  ubunifu wa mkojo wa Sungura kutumika kwa kilimo cha matunda na mbogamboga ili kufukuza wadudu waharibifu. 

Katika kufanya tafiti zake, imegundulika kuwa mkojo wa Sungura unaharufu kali hivyo  sio rafiki kwa wadudu hasa wale waharibifu katika  mboga zenye jamii ya maua na matunda.

Akizungumza katika maonesho ya 46 ya biashara ya Kimataifa (DITF) maarufu kama 'Sabasaba' yanayoendelea jijini Dar es Salaam, Mwanafunzi wa Sayansi ya Uzamili Chuo Kikuu cha Mzumbe, Nelson Kissanga alisema wamekuja na ubunifu huo ambao utawasaidia wakulima kutokupata hasara kwa mazao yao kuliwa na wadudu.

"Wadudu  ni waharibifu katika mbogamboga na mboga zenye jamii ya maua pamoja na matunda kwani  wanapenda kuvutiwa sana na mvuto wake katika kufata harufu nzuri ya maua hasa yanapochanua.

"Kwahiyo mkojo wa Sungura ni mbadala wa utumiaji wa kupuliza madawa katika mbogamboga na matunda ambapo yanakuwa na madhara kwa watu wengi. Pia ni  fursa  kwa watu wengi kwani unapowafuga Sungura na kupata mkojo wao,mfugaji anapaswa kujenga banda la juu (ghorofa)kidogo hivyo wanapokojoa kunakuwa na kinga zinazokuwa zinakinga mkojo wao," alisema Kissanga.

Aidha alisema mkojo huo hauna shida yoyote  kwa watumiaji kwani hauna kemikali yoyote, unakuwa ni mkojo halisi unaotoka kwa Sungura.

Aliongeza kuwa, hiyo itawasaidia  watu kubadilika kutumia vyakula venue kemikali na kula    vitu vya asili kwani gharama za kemikali katika kununua zinakuwa juu kuliko mkojo wa Sungura. 

"Tumeongeza mnyororo wa thamani wa  mfumo huu wa mkojo wa  sungura ni rafiki wa mazingira na rahisi kutumia tunaomba watu wawe tayari kuupokea na kuutumia waone kama fursa," alisisitiza.

Kwa upande wake, Mwanafunzi wa Chuo cha Mzumbe Maziku Maziku, alisema wamebuni teknolojia ya Unikopa katika kusaidia wanafunzi kukopa  mkopo wa simu,fedha na laptop.

Alisema unikopa katika vyuo vikuu imekuja  baaada ya mikopo kuonekana wanafunzi wanakuwa na changamoto mbalimbali katika kupata mitaji.

"Wanafunzi wengi wanakutana na changamoto ya kupata fedha kwa urahisi zaidi kwani wanakopeshwa hawana dhamana ya  nyumba na fedha kwahiyo mfumo huu ni rahisi kwao kwani hauna riba yoyote,"alisema

Alisema mpaka sasa wanawanafunzi 1320 ambao wamejisajili  katika  mfumo huo  kutoka Chuo Kikuu Cha Dar es Salaam (UDOM), Mzumbe, Ardhi pamoja na UDOM.