BABA YAKE AMIR KHAN AKANA MWANAYE KUVUNJIKA MIKONO ULINGONI

Bondia Amir Khan kulia akimsukumizia konde zito mpinzani wake Carlos Molina

LOS ANGELES, Marekani

“Baada ya Amir kumpiga Molina kulikuwa na baadhi ya uvimbe mikononi, lakini hakuna sehemu yoyote ya mkono ama vidole iliyovunjika. Lilikuwa jambo dogo lililotusukuma kumuona daktari na kuweka kila kitu wazi”

BABA mzazi wa bondia Amir Khan, Shah amezikata taarifa alizoziita za uongo kuwa mwanaye huyo amevunjika mikono yote miwili - wakati alipokuwa akipambana na kushinda Jumamosi dhidi ya Carlos Molina.

Tetesi juu ya kuumia kwa kwa Khan zilisema kuwa, mkali huyo mzaliwa wa Bolton, yuko katika hali mbaya akiuguza majeraha ya mikono yote miwili baada ya pambano hilo lililopigwa jijini Los Angeles, Marekani na kuongeza sasa yu shakani kurudi ulingoni hapo Aprili mwakani.

Lakini akionekana kukerwa na taarifa hizo, Shah baba wa mkali huyo jana amesema: “Madai haya ni upuuzi uliovuka mipaka.

“Baada ya Amir kumpiga Molina kulikuwa na baadhi ya uvimbe mikononi, lakini hakuna sehemu yoyote ya mkono ama vidole iliyovunjika. Lilikuwa jambo dogo lililotusukuma kumuona daktari na kuweka kila kitu wazi.

“Kama bondia hamalizi pambano kutokana na kupondeka kwa mikono yake, labda hiyo inaweza kumnyima fursa ya kudhibiti makonde ya adui yake ulingo — na walioona pambano lile watakubali kwamba Amir alipangua makonde mengi tu ya Molina.”

Baada ya kumdunda Molina na kumaliza mfululizo wa vichapo, Khan anatarajia kurejea ulingoni hapo Aprili 13 — katiika pambano linaloweza kuwa dhidi ya Victor Ortiz.

Wakati huo huo, Kampuni ya Kimarekani inayompromoti Khan ya Golden Boy imejinasibu kujaa matumaini ya kupata saini za mabondia watatu wa kufanya nao kazi. Mabondia hao ni waliokuwa katika kikosi cha Uingereza kilichopata mafanikio katika Olimpiki kiangazi jijini hapa.

Mkali wa uzani wa 'Heavyweight' Anthony Joshua anaongoza orodha ya mabondia wanaopigiwa hesabu na Golden Boy, pamoja na Anthony Ogogo na Luke Campbell.

Mkurugenzi Mkuu wa Golden Boy, Richard Schaefer alikiri mchakato huo na kusema: “Binafsi yangu natarajia kuwapa mikataba mabondia hawa na kuwaweka chini ya himaya yangu na kuwalea ipasavyo.”