ALEX FERGUSON, PEP GUARDIOLA WATETA TENA

Pep Guardiola akiwa na Alex Ferguson

 

NEW YORK, Marekani

Mhispania huyo ni chaguo namba moja la United kujaza pengo la Fergie, akifuatiwa na kocha anayeinoa Real Madrid, Mreno Jose Mourinho, huku bosi wa Everton, David Moyes, 49, pia ni chaguo la Bodi ya Klabu pamoja na Ferguson mwenyewe

ALEX Ferguson kwa mara nyingine jana amekutana na Pep Guardiola jijini hapa wiki hii, huku kocha huyo wa zamani wa Barcelona bado akisuasua kuamua juu ya hatima yake ya kurudi kufundisha soka.

Ferguson Mskochi anayeinoa Manchester United, amepaa kwenda Big Apple akiwa na mkewe Cathy kwa ajili ya mapumziko mafupi kuelekea Sikukuu ya Krismasi.

Lakini Fergi akakutana na Guardiola — ambaye alishakutana naye mara mbili hapo kabla, katika jiji hili - ambalo mabosi wote hao wanamiliki majumba ya kifahari ya kuishi.

Haijawekwa wazi kilichowakutanisha na kujadili, huku kukiwa na maswalia kama kocha huyo wa United mwenye miaka 71 kama mwishoni mwa msimu huu anaweza kutanua wigo wa kuendelea kubaki Old Trafford alikokaa kwa miaka 26 sasa.

Guardiola anaweza kupatikana kujaza pengo la Fergie kutokana na ukweli kuwa hana timu, huku akitajwa kuwa mlengwa namba moja wa klabu hiyo, ingawa pia wanafainali wa msimu uliopita wa Ligi ya Mabingwa Ulaya, Bayern Munich na Chelsea zimeripotiwa kumsaka kwa udi na uvumba.

Mhispania huyo ni chaguo namba moja la United kujaza pengo la Fergie, juu ya kocha anayeinoa Real Madrid Jose Mourinho, huku bosi wa Everton, David Moyes, 49, pia ni chaguo la Bodi ya Klabu pamoja na Ferguson mwenyewe.

Guardiola, 41, aliacha kuinoa klabu yake ya Barca mwishoni mwa msimu uliopita baada ya kutwaa mataji matatu ya Ligi Kuu ya Hispania 'La Liga,' na mawili ya Ligi ya Mabingwa Ulaya - yote akiichapa United katika fainali.

Mourinho anajiandaa kutimka Real Madrid kiangazi hiki, lakini watu wengi wanatambua ukweli kuwa Old Trafford si miongoni mwa sehemu ambnazo anaziangalia kwa jicho la kutamani kufanya kazi.