BENITEZ: TUNAKUJA KUWASHIKA FERGIE, MANCINI

Kocha wa Chelsea, Rafael Benitez

 

YOKOHAMA, Japan

“Watu uniuliza maswali kama ubingwa wa England kwa msimu huu ni mbio za farasi wawili wa jiji la Manchester?. Lakini ki-uhalisia, kwa pointi tatu kwa mechi moja, kama unashinda mechi mbili au tatu mfululizo, unakuwa umejiongezea kujiamini”

WAKATI kesho Jumapili mchana wakishuka kwenye dimba la International kuumana na Corinthians katika fainali ya Klabu Bingwa ya Dunia, kocha wa Chelsea, Rafael Benitez, anaamini kikosi chake kinaweza kuzalisha morali ya kutwaa ubingwa wa Ligi Kuu msimu huu.

Ndoto za Benitez zinakuja wakati akikiongoza kikosi chake kucheza fainali ya Dunia ngazi ya klabu dhidi ya Corinthians, huku vinara wa Ligi Kuu Man United leo Jumamosi wanasaka ushindi wa kupanua wigo wa pointi zao na Chelsea kufikia 13.

Lakini Benitez anaamini kwamba kama wataibuka na ushindi dhidi ya Corinthians ya Brazil katika fainali ya kesho jijini hapa, utakuwa ujumbe mahususi kwa Alex Ferguson na Roberto Mancini kuwa The Blues imerejesha rasmi nguvu za kuwania taji.

Benitez kocha wa zamani wa Liverpool anayeandamwa na jinamizi la kutopendwa na mashabiki klabuni Stamford Bridge tangu alipomrithi Roberto Di Matteo, alisema: “Kabla ya kuja hapa, nilikuwa nasikia ofa kibao za kunihitaji kufanya kazi na klabu tofauti.

“Ningeweza kupata na kufanya kazi katika nchi za Hispania au Italia, ama China, na kupata pesa kubwa ya mshahara katika klabu kwa miaka 10. Lakini nilikuwa nasubiri kikosi cha daraja la juu. Nataka kushindana kutwaa mataji.

“Watu uniuliza maswali kama ubingwa wa England kwa msimu huu ni mbio za farasi wawili wa jiji la Manchester (Man United na Man City)?. Lakini ki-uhalisia, kwa pointi tatu kwa mechi moja, kama unashinda mechi mbili au tatu mfululizo, unakuwa umejiongezea kujiamini.

“Kama tutashinda na kutwaa ubingwa wa dunia ngazi ya klabu hapa na tukacheza kama tulivyocheza katika nusu fainali Alhamisi, huku tukiboresha kiwango chetu kwenda mbele kwa uwiano sawa, tunaweza kurejea katika mbio za ubingwa wa Ligi Kuu.

“Kiasi cha mechi ngapi? Mimi sijui hilo. Wengine wanaweza kufanya hivyo pia. Lakini baada ya ushindi wa mechi tatu au nne katika kinyang’anyiro, kujiamini kwetu kunaweza kuwa juu. Sasa kwa nini isiwezekane,? Alimaliza Benitez kwa swali.