WAZIRI KUUNDA KITENGO CHA POLISI CHA USIMAMIZI WA MANGIRA

DAR ES SALAAM, Tanzania

WAZIRI wa Nchi wa Ofisi ya Makamu wa Rais (Mazingira), Dk Trezya Huvisa, amesema wizara hiyo, inatarajia kuanzisha Kitengo cha Polisi ambacho kitasimamia utunzaji na kuwakamata wale wote wataochangia uharibifu wa mazingira.

Huvisa aliyasema hayo jijini Dar es Salaam leo, wakati alipokuwa akizungumza na wandishi wa habari, kuhusu maadhimisho ya Siku ya Mazingira itakayofanyika Machi 3 mwaka huu kwenye viwanja vya Tanganyika Parkers jijini.

Alisema kitengo hicho kitafanya kazi hiyo, ya kuwadhibiti watu wanaofanya uharibifu wa mazingira kwa kushirikiana kwa karibu na jamii ambayo inawatambua baadhi ya watu hao.

“Ni vyema tunapoazimisha siku hii tutafakari kwa kina changamoto mbalimbali zinazochangia uharibifu mkubwa wa mazingira”alisema.

Huvisa, alisema siku hiyo imetengwa kwa lengo la kukumbushana juu ya umuhimu wa kutunza na kuhifadhi mazingira barani Afrika.

Aidha, kila mmoja wenu atumie fursa hiyo kwa kuelimisha na kukumbshana kuhusu  wajibu wa kuyatunza mazingira kwa manufaa kila mtu na vizazi vijavyo.

“Ujumbe wa Siku ya Mazingira Afrika mawaka huu ni Ushirikiano wa Nchi za Afrika katika ktekeleza dhana ya Uchumi wa Kijani,  ili kukuza uchumi na kuhifadhi mazingira barani Afrika”alisema.

Vilevile alisema ujumbe huo unahimiza ushirikiano wa kila mtu kutimiza wajibu wa kukabiliana na uharibifu wa mazingira unaosababishwa na matumizi ya rasilimali yasiyoendelevu.

Huvisa alisema kwa mfano dhana ya uchumi wa kijani inahimiza kila mtu kuhifadhi mazingira kwa kufanya shughuli za uchumi zisizoharibu mazingira.

Alizitaja shughuli hizo kuwa ni pamoja na kutumia nishati jadifu, majiko banifu, nishati mbadala, kupunguza uzalishaji wa taka na kuhakikisha miji yote inakuwa safi.

Huvisa alitumia fursa hiyo, kwa kuwakumbusha Watanzania wajibu wa kutii Sheria ya mazingira ya Mwaka 2004, kwa kila mwananchi kuifahamu Sheria hiyo ya Mazingira na kuitekeleza inavyotakiwa.