RIPOTI YA MATUMIZI YA RASILIMALI YAZINDULIWA

Na Mwandishi Wetu

SERIKALI imetakiwa kujenga utawala bora katika kusimamia rasilimali kama vile madini, mafuta na gesi asilia kwa lengo la kuwanufaisha wananchi.

Akizungumza na wandishi wa habari katika uzinduzi wa ripoti ya utafiti matumizi ya rasilimali hizo, Mjumbe Jumuiya ya Taasisi ya ‘Revenue Watch’ Silas Olan’g, alisema utafiti huo ulifanyika katika nchi 58 duniani.

Alisema imebainika kuwa bado kuna changamoto mbalimbali katika kusimamia rasilimali hizo, serikali kutokuwa wazi kwa wananchi kuhusu matumizi ya rasimali hizo.

Olan’g alisema katika ripoti ya mwaka 2010 kuhusu usimamizi wa rasilimali hizo Tanzania ilikuwa ya tano kati ya nchi zaidi ya 30 za kiafrika ambapo safari hii imekuwa ya 27 kati ya 58.

Alisema kutokana na nafasi hiyo inaonesha kuwa mwaka huu wa 2013 imeweza kupiga hatua katika utawala bora pamoja usimamizi rasilimali hizo.

Hata hivyo, alisema bado nafasi hiyo si ya kujivunia kwani iko kwenye eneo dhaifu, hivyo bado juhudi zinahitajika katika kuongeza uwazi wa kutoa taarifa.

 Olan’g alisema ripoti hiyo pia imeonelea kuwa kuna ulazima kwa watunga sera kutunga sheria ya uhuru wa habari ambayo itamlazimisha mwenye taarifa kuwapatia wananchi habari inayohusu usimamizi wa rasilimali hizo.

“Kama inavyofahamika kuwa ukimya wakutokuwa wazi na kutoa taarifa kwa jamii hali hiyo inatia shaka kwani ifahamike usiri ni sawa na kichaka cha rushwa”alisema Olan’g.

Naye mgeni rasmi Askofu Munga aliitaka serikali kuhakikisha inasimamia rasilimali hizo kwa ajili ya jamii kwa ujumla na si kwa kikundi cha watu wachache.

“Uanajua tangu serikali hii imeingia madarakani haijawafanyia chochote jamii zaidi ya kujiandaa na uchaguzi mkuu wa mwaka 2015”alisema Askofu Munga.

Alitoa wito kwa viongozi wa serikali kuwa pindi wapatapo nafasi yakwenda nje ya nchi kujifuza jinsi nchi za wenzao zilivyoweza kupiga hatua katika usimamizi wa rasilimali hizo  lazima waweke maslahi na uzalendo kwa ajili ya Taifa na si kujali posho tu.