ROBERTO MANCINI ATIMULIWA RASMI MANCHESTER CITY

Roberto Mancini

MANCHESTER, England

Kocha Msaidizi Brian Kidd, atakiongoza kikosi hicho kuelekea mwisho wa msimu huu na baadaye ziara ya maandalizi ya msimu ujao, itakayofanyika huko Marekani kuanzia mwishoni mwa mwezi huu

HATIMAYE Roberto Mancini juzi usiku alifukuzwa rasmi kazi ya kuinoa Manchester City, takribani mwaka mmoja tangu alipoiwezesha klabu hiyo kuvunja mwiko wa miaka 44 ya kutotwaa taji la Ligi Kuu ya hapa.

Klabu hiyo yenye makao yake makuu kwenye dimba la Etihad, ilisema: "imeshindwa kufikia malengo yake ndani ya uwanja, licha ya kuambulia kufuzu michuano ijayo ya Ligi ya Mabinmgwa Ulaya."

Kocha msaidizi Brian Kidd, anakamata rasmi hatamu za uongozi kuelekea mwisho wa msimu huu na ziara ya kikosi chake kwa ajili ya maandalizi ya msimu ujao huko Marekani inayoanza mwishoni mwa mwezi huu.

Kocha wa Malaga, Manuel Pellegrini raia wa Chile, anatajwa kuwa ndiye mrithi anayetarajkiwa kutangazwa kujaza pengo la Mancini, anayedaiwa kujiandaa kuingia mkataba wa kuinoa AS Monaco ya Ufaransa.

Jumapili usiku, Pellegrini, 59, ambaye alitumia msimu mmoja wa 2009/10 akiinoa Real Madrid, alikana taarifa kuwa kuna mazungumzo baina yake na City ya kumrithi Mancini na kuwa kocha mpya Etihad.

Man City katika taarifa yake kuhusu kutimuliwa rasmi kwa Mancini, 48, ilimshukuru Mtaliano huyo kwa kazi nzuri aliyoifanyia klabu hiyo tangu alipojiunga Desemba 2009.

Lakini klabu ilisema kushindwa kufanya vema kufiki ‘malengo maalum’ na haja ya klabu "kuendeleza mfumo chanya wa masuala ya jumla yahusuyo soka Etihad," vimechangia kumfukuzisha kazi.

Hiyo inamaanisha kuwa, msamiati wa ‘masuala ya jumla yahusuyo soka’ umeangalia mambo mengi kuizunguka klabu, na si dawati la ufundi na chumba cha kuvalia pekee, bali pia inahusisha kwa mfano mfumo wa soka la vijana – kuelekea kikosi cha wakubwa.

"Rekodi ya Mancini inaongea yenyewe, akiwa hapa alipata upendo na heshima kubwa kutoka kwa mashabiki," alisema Mwenyekiti Khaldoon Al Mubarak na kuongeza: "Alifanya vema kama alivyoahidi na alifanikiwa kutwaa medali na mafanikio mengine."

Mancini aliyetua Etihad kujaza pengo la Mark Hughes, amedumu klabuni hapo kwa miaka mitatu na nusu akiiwezesha klabu hiyo kutwaa Kombe la FA mwaka 2011 na ubingwa wa Ligi Kuu mwaka jana – miaka 44 tangu ilipotwaa kwa mara ya mwisho.

Baada ya ubingwa huo, Julai 2012, Mancini alisaini mkataba wa miaka mitano ya kuendelea kutumikia klabu hiyo, ambao sasa City imeuvunja na kumlipa kitita chake.

Badala yake ameambulia kuvuliwa ubingwa na majirani zao Manchester United, huku akiaga hatua ya makundi Ligi ya Mabingwa Ulaya na kuichapwa fainali ya FA Jumamosi iliyopita mbele ya vibonde wa Ligi Kuu wanaoshuka daraja Wigan.

BBC Sport