BARCELONA: MAN UNITED INAPOTEZA MUDA TU!

BARCELONA, Hispania

Chanzo cha ndani klabuni Nou Camp kimefichua kwamba, Rais wa Barca amesisitiza kuwa klabu yake haitomuuza kiungo wake Fabregas, hata kama Man United itatuma ofa ya tatu - baada ya mbili za awali kukataliwa

WAKATI klabu ya FC Barcelona ikiisisitizia Manchester United kwamba kiungo wake mahiri Cesc Fabregas hauzwi, beki wa kati wa Barca, Gerard Pique ameitaka klabu yake hiyo ya zamani kutopoteza muda kupeleka ofa ya tatu, baada ya mbili kukataliwa.

Man United ilithibitisha juzi Jumatatu kuwania saini ya kiungo na ikaboresha ofa yake na kufikia dau la pauni milioni 30, lakini taarifa nchini hapa zikaeleza namna miamba hiyo ya Nou Camp ilivyokataa ofa hiyo.

"Fabregas hauzwi," chanzo cha ndani klabuni Barcelona kilipasha Jumatatu jioni na kuongeza: "Rais wa klabu (Sandro Rosell), ameweka wazi kila kitu kuhusu hilo kwa Man United."

Bosi mpya Old Trafford, David Moyes mapema hiyo hiyo juzi alikiri kuwa uenda klabu yake ikalazimika kukubali kushindwa kwa jaribio lao hilo.

Alipoulizwa kama anaweza kukata tamaa kumng’oa Fabregas Nou Camp, Moyes alisema: "Nadhani hatua hiyo inaweza kuja, lakini nadhani wakati unapoonesha nia ya kupata saini ya mchezaji mzuri, unatakiwa kutumia kila nafasi, nami nitafanya hivyo.

"Mimi nina matarajio kwamba nitaendelea kupigania ujio wake.

"Kwa sasa naweza kukwambia kitu kimoja kwamba, Ed Woodward (Kaimu Mtendaji Mkuu Man United) anashughulikia hilo ili kuwezesha utimilifu wake na tuna matumaini makubwa kuwa kila kitu kitakuwa sawa karibuni."

Aidha, Pique ambaye aliihama Man United na kutua Barca, ameibuka na kuambia Red Devils kuwa: “Man United inapoteza muda wake.

“Ikumbukwe ilichukua muda mrefu kwa Fabregas kutimiza ndoto yake ya kurejea nyumbani na kamwe hawezi sasa kuipoteza.

“Hapa ni nyumbani, ni sehemu ambapo familia yake ilipo, nay eye akiwa hapa anacheza pamoja na marafiki zake wa karibu. Yeye ametuambia sisi kuwa anajisikia furaha na fahari na angependa kuendelea kubaki nasi Nou Camp.”

BBC Sports/The Sun